Tuhu nge Doni Enda Nandangi Ikernepken?
Banci saja enggo tehndu lit ikataken bas Pustaka maka doni enda nandangi kiamat ntah pe ikernepken. (1 Johanes 2:17) Tuhu nge e maksudna lanai pagi lit jelma si nggeluh i doni? Tuhu nge ikernepken pagi doni enda ntah pe lanai banci iingani?
JAWAPEN ARAH PUSTAKA NANDANGI DUANA PENUNGKUNEN E, LANG!
Kai Pagi si La Ikernepken?
MANUSIA
Nina bas Pustaka: Iciptaken Dibata doni enda “labo perban la lit tujunna tapi guna iingani.”—JESAYA 45:18.
DONI
Nina bas Pustaka: “Sada keturunen reh janah sada keturunen lawes, tapi doni tetap bas inganna seh rasa lalap.”—PENGERANA 1:4.
ENDA ERTINA: Doni enda labo ndigan pe ikernepken janah tetap pagi lit si ngianisa. Adi bage, kai nge maksudna ikernepken pagi doni enda?
CUBA UKURI: Bas Pustaka, kedungen doni enda ipeseri ras kai si terjadi bas jaman Nuah. Paksa si e, doni “dem kejahaten.” (Kejadin 6:13) Tapi Nuah kalak si benar. Emaka selamatken Dibata Nuah ras keluargana, janah kernepkenNa kalak jahat alu banjir si mbelin. Bagenda nina Pustaka kerna si terjadi paksa si e, “Alu banjir si mbelin, doni bas jaman si e ikernepken.” (2 Petrus 3:6) Kai nge si ikernepken? Labo doni enda, tapi kalak jahat si nggeluh i doni. Emaka sanga kataken Pustaka doni enda nandangi ikernepken, labo maksudna doni enda pagi si ihancurken. Tapi, si ikernepken eme kalak jahat si lit i doni enda bage pe pemerentahen manusia.
Kai Pagi si Ikernepken?
KEJAHATEN RAS MASALAH
Nina bas Pustaka: “Ntisik nari lanai lit kalak jahat. Daramindu pe pagi kalak e bas inganna, lanai kalak e lit i je. Tapi kalak si meteruk ukur ndatken doni enda pagi, meriah kel pagi ukur kalak e perban dem kedamen i je.”—MASMUR 37:10, 11.
ENDA ERTINA: Ikernepken Dibata pagi kerina kejahaten. Memang, Banjir si Mbelin si terjadi bas jaman Nuah labo engkernepken kejahaten seh rasa lalap, sebap kenca banjir e pe jahat ka dungna perbahanen kalak ras susah banna kerina kalak. Tapi ntisik nari kernepken Dibata kerina kejahaten. Pagi “lanai lit kalak jahat,” bagi si ikataken pemasmur ndai. Kernepken Dibata pagi kejahaten alu KerajanNa janah KerajanNa e pagi si merentah kerina kalak si patuh man baNa.
CUBA UKURI: Meriah nge ukur pemerentahen bas doni enda ndukung Kerajan Dibata? Lang. Ikataken bas Pustaka maka la diate kalak e Kerajan Dibata tapi itentangna Kerajan e. (Masmur 2:2) Kai akibatna? Igantiken Kerajan Dibata pagi kerina pemerentahen manusia janah “Kerajan e ngenca pagi si lit seh rasa lalap.” (Daniel 2:44) Tapi engkai maka pemerentahen manusia arus ikernepken?
KAI SI IPERLUKEN?—Pemerentahen Manusia Arus Ikernepken
Nina bas Pustaka: “Manusia la erkuasa nentuken . . . perdalanna.”—JEREMIA 10:23.
ENDA ERTINA: Manusia labo iciptaken guna merentah manusia. Pemerentahen manusia la berhasil janah la ngasup ndungi masalahna.
CUBA UKURI: Menurut salah sada artikel arah Britannica Academic, tiap pemerentahen la ngasup “ndungi kerina masalah si lit i doni bagi kelihen, wabah penakit, kalak si mesera, bencana alam, ras perang ntah pe kejahaten si debanna.” Nina artikel e ka, “Piga-piga kalak . . . tek maka kerina masalah ndai banci dung adi sada ngenca pemerentahen i doni enda.” Tapi, amin pe kerina pemerentahen manusia ersada, labo kalak e ngasup ndungi kerina masalah ndai sebap kalak e la sempurna. Kerajan Dibata ngenca si ngasup ndungi kerina masalah si lit i doni enda seh rasa lalap.
Emaka, la perlu kita mbiar kerna kedungen doni enda. Perban menurut Pustaka adi enggo reh kedungen doni enda, kejahaten lanai pagi lit. Pasti meriah ukurta perban doni si jahat enda igantiken pagi alu doni si mbaru si seh kel ulina!
Ndigan nge si e kerina terjadi? Bas artikel seterusna banci kari siteh jawapenna.
