Santi * nggo seh i Eropa perban ijanjiken kalak ia erdahin jadi tukang salon. Tapi nggo sepuluh wari dekahna lalap ia ipekpeki janah keluargana pe itindas adi mulih ia ku rumahna. Santi pe ipaksa erdahin jadi perlua-lua.

Tiap berngi ia igalari kalak 200 seh 300 euro (kira-kira 1,8 juta rupiah seh 2,7 juta rupiah) janah sen e ipakena nggalari utang si iban bosna 40.000 euro (kira-kira 360 juta rupiah). Nina Santi, ”Kiam nge ateku rusur, tapi kuinget ka ancamen kalak e man keluargangku. Aku nggo bagi kalak si kena siding.” Lit empat juta kalak ipaksa jadi perlua-lua i bas erbage negara, emaka pengalamen Santi nggo biasa.

Lebih 4.000 tahun si lewat, lit anak muda si gelarna Jusup, ia idayaken senina-seninana. Ia jadi budak si sangap bas rumah kalak Mesir. La bagi Santi, tangtangna Jusup iperlakoken alu mehuli, tapi dungna ia iperlakoken alu la adil. Perban itulakna pemindon ndehara tuanna, ituduh ia mperkosa janah ipenjaraken.—Kejadin 39:1-20; Masmur 105:17, 18.

Jusup jadi budak bas jaman si nai janah Santi jadi budak bas jaman gundari, kalak e duana nggo jadi korban perdagangen manusia. Ndayaken jelma nggo jadi pendahin guna ndatken keuntungen si mentingken bana.

Perang erban ernukahna ndatken budak. Kenca kampanye militer i Kanaan, isuruh Raja Mesir Thutmose III gelah ibaba 90.000 tahanen guna ijadiken budak si erban tambang, ingan nembah gana-gana, ras mbangun pipa lau.

 Menurut aturen Kerajan Roma, iperluken budak man perang janah arus erperang ka guna ndatken budak e. I bas abad pemena, iperkiraken jumlah budak hampir setengah penduduk Roma buena. Melala budak bas Mesir ras Roma iperlakoken alu kejam. Umur budak si erdahin bas pertambangen Roma kira-kira 30 tahun ngenca gedangna.

La lit si mperdiateken masalah kerna perbudaken e. Mulai tahun 1501 seh 1900, perdagangen manusia si ilakoken Afrika ras Amerika jadi bisnis si runtungna. Menurut laporen UNESCO, ’Lit kira-kira 25 juta seh 30 juta dilaki, diberu, ras anak-anak si itangko janah idayaken. Lit ratusen si mate arah ribun kalak paksa mentasi Atlantik. Sekalak budak si selamat, gelarna Olaudah Equiano nuriken, ”Ngeri kel janah lanai terturiken ngidah diberu si serko ras si nderkuhi suin perban nandangi mate, tapi e nggom biasa.”

Perbudaken labo cerita sedih saja. Menurut Organisasi Buruh Internasional, kira-kira 21 juta dilaki, diberu, ras anak-anak si ipaksa jadi budak janah ndatken upah si kitik ntah pe la iupahi. Gundari pe, budak erdahin bas pertambangen, bengkel, pabrik, ingan perlua-lua, ras pembantu. Perbudaken terus erbuena aminna pe ilarang.

Kerina si lit bas perbudaken merhat kel ndatken kebebasen. Bas abad pemena SM, lit terpuk pandikar si igelari Spartacus ras 100.000 budak ngelawan Roma tapi la berhasil. I Lawit Karibia, Hispaniola paksa tahun 1700-en, lit budak-budak si ngelawan man bosna. Dungna tahun 1804, perang sipil erban kalak enda bebas arah kiniseran si nggo 13 tahun dekahna jadi budak i perjuman tebu.

Pembebasen si luar biasana eme paksa lit kira-kira telu juta kalak Israel ibebasken arah perbudaken Mesir nari. Cocok kel kalak enda ibebasken. Pustaka nurikensa maka kegeluhen kalak Israel ipaksa erdahin ”alu perbudaken si kejam” i Mesir. (Keluaren 1:11-14) Firaun pe pernah mereken perentah gelah munuh anak si dilaki si  mbaru lahir gelah kalak Israel la reh teremna.—Keluaren 1:8-22.

Menarik kel kerna pemebasen Israel arah kalak Mesir si kejam erkiteken si mbebaskenca Dibata. Nina Dibata man Musa, ’Kueteh kerina kiniseranna emaka Aku nusur mulahi ia.’ (Keluaren 3:7, 8) Seh asa gundari, kalak Jahudi terus ngerayaken paskah tiap tahun guna mperingeti pembebasen e.—Keluaren 12:14

Ikataken Pustaka, ”Tuhan Dibatanta la ateNa ngena keputusen rayo-ayo.” Tek kita maka Dibata la mobah-obah. (2 Kronika 19:7; Maleaki 3:6) Iutus Dibata me Jesus guna ”erberita man kalak si tertaban, kalak si itindas ipulahi me”. (Lukas 4:18) Kalak si itindas saja nge si ipulahi? Lang. Jesus iutus guna mbebasken manusia arah perbudaken dosa ras kematen. Ijelaskenna, maka Kata Dibata me ”si mbebasken kam”. (Johanes 8:32) Gundari pe, ajaren Jesus mbebasken kalak i bas erbage cara.—Nen kotak ” Ibebasken Arah Perbudaken si Deban”.

Situhuna alu cara si beda, Dibata me si mbebasken Jusup ras Santi. Banci ogendu cerita kerna Jusup si luar biasa bas Pustaka buku Kejadin pasal 39 seh 41. Usaha Santi gelah bebas pe luar biasa ka nge.

Kenca ipelawes arah sada negara si lit bas Eropa, Santi berkat ku Spanyol. I je jumpa ia ras Saksi Jahwe janah mulai erlajar Pustaka si Badia. Erjuang ia mpehuli kegeluhenna, datna dahin janah erjanji ia man bosna si marenda guna nggalari utangna tiap bulan. Bas sada wari, itelpon bosna si marenda ia guna mindo maap janah ngataken lapadah galarina utangna e. Engkai? Kepeken, bosna si marenda e pe nggo erlajar Pustaka ras Saksi Jahwe! Nina Santi, ”Luar biasa kel cara Pustaka si Badia mbebasken kam.”

Ceda kel ukur Jahwe ngidah kalak Israel itindas kalak Mesir, gundari pe bage kang penggejapen Jahwe ngidah kinilaadilen. Guna nasapken kerina perbudaken, iperluken perubahen si mbelin i bas manusia. Erkiteken si e, ”Enggo ipadanken Dibata e me langit si mbaru ras doni si mbaru; i je me inganna keadilen.”—2 Petrus 3:13