MELALA agama i sebelang doni setuju gelah peminpin agamana la erjabu, misalna Gereja Katolik Roma, erbage gereja Ortodoks, Buddha, ras si debanna. Deba erpengakap maka kebiasan la erjabu iban guna nutupi lagu langkah si la mehuli i bas peminpin agama.

Tuhu kin Pustaka si Badia ngajarken maka pelayan Kristen la banci erjabu? Gelah sidat jabapna, mari siperdiateken uga perukuren Dibata ras bena-benana kerna si e.

Menurut Encyclopædia Britannica, kalak si ”netapken diri guna la erjabu ntah erpantang seks, si biasana jadi peraturen si sah bas agama” enda igelari nggeluh selibat. Bas tahun 2006, Sri Paus Benediktus ngataken man kalak Roma Kuria maka nggeluh alu la erjabu lit hubungenna ras ”kebiasan bas pendungi jaman rasul-rasul”.

Situhuna, bas kalak Kristen abad si pemena la lit kebiasan la erjabu. Rasul Paulus si nggeluh bas abad si pemena mpersingeti kalak si erkiniteken nandangi ”kesah-kesah si erbual” janah ajaren ’la banci erjabu’.—1 Timotius 4:1-3.

Bas tahun seratusen, gereja ”Kristen” Barat erban kebiasan gelah la erjabu. Buku Celibacy and Religious Traditions ngatakensa, ”Enda me carana ngelawan kerincuhen daging bas Kerajan Roma.”

Kenca tahun 201, persadan gereja bage pe si igelari ka Bapak Gereja ngiahken kalak gelah la erjabu. Nina kalak enda hubungen seks la pantas janah la sentudu ras pendahin  peminpin agama. Tapi, Encyclopædia Britannica mpebetehken maka ”ope denga tahun 1000, nterem peminpin agama ntah pe uskup nggo lit ndeharana”.

Peraturen nggeluh alu la erjabu i bas peminpin Gereja Katolik Roma isahken sanga peminpin agama Katolik runggu i Roma bas tahun 1123 ras 1139 si igelari Konsili Lateran. Peraturen e ipake seh asa gundari gelah kuasa ras bangunen gereja la isusurken man anak peminpin gereja e.

Pustaka si Badia nuriken uga perukuren Dibata kerna nggeluh la erjabu. Nina Jesus kerna kalak si la erjabu e, ”Idilo guna dahin i bas Kinirajan Surga.” (Matius 19:12) Rasul Paulus pe mpebetehken man kalak Kristen si nggit ngusih ia i bas la erjabu ”guna berita si meriah”.—1 Korinti 7:37, 38; 9:23.

Jesus ras Paulus nggejapken maka ulin la erjabu. Tapi ikataken Jesus kerna la erjabu e maka ”labo kerina kalak ngaloken kata enda”. Janah labo ka perban pengaruh pengikutna. Sanga isuratken Paulus ”kerna kalak si langa erjabu” janah nina, ”La lit i bas aku perentah TUHAN, tapi kusehken pendapatku man bandu.”—Matius 19:11; 1 Korinti 7:25.

Pustaka pe ncidahken maka bas abad pemena nterem kalak Kristen si erjabu seri bagi rasul Petrus. (Matius 8:14; Markus 1:29-31; 1 Korinti 9:5) Erkiteken paksa si e nterem kalak si erlagu langkah la mehuli i Roma, isuratken Paulus kerna sekalak si ngepkep perpulungen si erjabu ”ndeharana arus sada ngenca” janah ’anak-anakna ngikutken katana.’—1 Timotius 3:2, 4.

Penjelasen ndai ncidahken maka labo lit ajaren kerna la banci erjabu, tapi bagi si ipebeteh-ken bas Pustaka maka ”si dilaki arus nehken tugasna man ndeharana” janah ”ula tulak kerincuhenndu pekepar”. (1 Korinti 7:3-5) Jelas me, nggeluh alu la erjabu labo pemindon Dibata janah labo wajip man kalak Kristen.

Adi kin nggeluh la erjabu e labo kewajipen, engkai maka nina Jesus ras Paulus ulin la erjabu? Perban buen kesempaten kalak si la erjabu guna mbarken berita si meriah. Kalak si la erjabu banci mere terbuen janah la perlu ngukuri kearun ate si inanami kalak si erjabu.—1 Korinti 7:32-35.

Lit pengalamen arah David si ngadi arah pendahina si galang gajina i Kota Meksiko guna pindah ku kuta si ndauh i Kosta Rika guna ngajarken Pustaka si Badia. Lit nge ulihna man David bas ia la erjabu e? Nina, ”Kugejapken kel! Perban aku lenga erjabu, reh nukahna kuakap nyesuaiken diri ras adat bage pe ingan si mbaru.”

Claudia si lenga erjabu janah pindah ku ingan si merluken terbuen perberita, ngataken, ”Meriah kel kuakap ngelayani Dibata. Paksa kugejapken maka ermediate kel Ia, kinitekenku reh paguhna janah aku pe reh rembakna ras Dibata.”

La perlu aru atendu gia la erjabu. Nina Claudia ka, ”La soal kam erjabu ntah lang, kam pasti ermeriah ukur adi berendu si mehulina man Dibata Jahwe.”—Masmur 119:1, 2.