Meherga siakap sada hadiah erkiteken si merekenca eme kalak si nihamati ntah si erkuasa. Meriah ka ukurta aminna pe hadiah e murah perban si meresa eme keluarganta ntah pe teman meriahta. Bage me si igejapken Jordan paksa datna hadiah arah Russel, si ituriken bas pemena artikel ndai. Uga enda jadi andingen kerna tebusen?

Si pemena, ituriken Pustaka, ”Dibata . . . nuruh AnakNa si tonggal ku doni enda, gelah kita nggeluh arah ia.” (1 Johanes 4:9) Bukti maka Dibata Si Mada Kuasa si mere tebusen erban pemere e tuhu-tuhu meherga. Kerna Dibata, ikataken pemasmur, ”Gelah ietehna maka Kam [Jahwe] Si Meganjangna i datas kerina doni enda.” (Masmur 83:19) La banci sidat pemere arah ise pe si ganjangen asa Dibata.

Si peduaken, Dibata e ’Bapanta’. (Jesaya 63:16) Engkai? IbereNa kita kegeluhen. Bagi bapa si ermediate man anak-anakna, iperdiatekenNa kita lalap. Ikataken Dibata man kalak Eperaim, ”O [Eperaim], anak kesayangenKu, buah barangKu si keleng ateKu . . . i bas kam lalap ukurKu, mekuah kal ateKu.” (Jeremia 31:20) Gundari pe bage denga nge perasan Dibata man umatNa. Dibata labo saja Si Nepa kita tapi Ia pe Bapa ras Temanta si setia. Enda tuhu-tuhu pemere si seh kel mehergana bas Dibata nari.

Sada hadiah jadi meherga perban ibereken alu keleng ate, labo perban terpaksa. Kalak si mentingken bana mere alu ǹgarapken ulih.

Perban ngkelengi kita, ibere Dibata anakNa. Nina Pustaka, ”Dibata enggo ncidahken kekelengenNa man banta alu nuruh anakNa si tonggal” guna nehken peratenNa eme ”gelah kita nggeluh arah Ia”. (1 Johanes 4:9) Iarapken Dibata nge ulih arah pemereNa e? Lang! ”Pertebusen si ibahan Jesus Kristus” ncidahken ”lias ate” Dibata si la metunggung ialoken.—Roma 3:24.

Engkai maka pemere Dibata e ncidahken ”lias ateNa”? Nina Pustaka, ”Kristus mate asum kita perdosa denga! Arah e Dibata enggo encidahken keleng ateNa man banta.” (Roma 5:8) Amin gia manusia la ergegeh janah erdosa denga, kekelengen Dibata si la mentingken bana ngiahken Ia ertindak. Enda labo upahta janah la pernah banci sigalari kelengenNa e. PemereNa e jadi bukti si mbelinna kerna kekelengenNa.

Sada hadiah jadi meherga perban lit pengorbanen arah si merekenca. Paksa nggit kalak mereken sikerajangenna si mehergana man banta, pasti siergai kel hadiah e perban pengorbanenna e.

Ibereken Dibata sikerajangenNa si nikelengiNa, eme ”AnakNa si tonggal”. (Johanes 3:16) Ribun tahun dekahna sanga Dibata nepa si nasa lit, Jesus erdahin ras Jahwe janah Jesus jadi ”sumbul keriahenNa”. (Masmur 8:30) Jesus me ”Anak kekelengenNa” ras ”rupa Dibata si teridah”. (Kolose 1:13-15) Enda me hubungen si rembakna si pernah lit.

Payo, ”AnakNa kal pe la itahanNa”. (Roma 8:32) Ibere Jahwe sikerajangenNa si mehulina man banta. La lit hadiah si terergan asangken si e.

Banci saja hadiah jadi meherga erkiteken tuhu-tuhu iperluken janah ngasak kel. Misalna, paksa lit pinakitndu si mekelek, tapi la lit senndu nggalari pertambarndu, pasti meriah kal ukurndu adi lit sekalak jelma si nggalarisa! Enda pasti pemere si meherga kel!

”Sabap bali ras kerina manusia mate erkiteken persadanna ras Adam, bage me pe kerina manusia ipegeluh mulihi erkiteken persadanna ras Kristus.” (1 Korinti 15:22) Selaku kesusuren Adam, kerina kita erban salah janah dungna ”mate”, la lit si ngasup nilahken penakit ras kematen ntah pe erban dirina dame ras Dibata. Selaku manusia si erdosa, la banci siban dirinta ntah ise pe ’nggeluh mulihi’. Nina Pustaka, ”Ise pe la banci nebusi kesahna, ntah pe nggalari tebusna man Dibata . . . Kai saja pe igalarkenna la pernah cukup.” (Masmur 49:8, 9) Emaka siperluken penampat erkiteken kita la ngasup nggalari tebusen janah dirinta pe la banci siselamatken.

Kekelengen Jahwe si mbelin enda jadi ”tambar” si iperluken guna nelamatken kegeluhen, emaka arah Jesus ”kerina manusia ipegeluh mulihi”. Uga carana? Dareh ”AnakNa e mbersihken kita i bas kerina dosa nari”. Kiniteken man dareh Jesus mbuka dalan ndatken pengalemen dosa  ras kegeluhen si rasa lalap. (1 Johanes 1:7; 5:13) Kai manpaat tebusen man kalak si nikelengi si nggo mate? ”Bagi kematen reh arah sekalak manusia, bage me pe kekeken i bas si mate nari reh arah sekalak manusia [Jesus].”—1 Korinti 15:21. *

Dibata ngenca ulu Si Meganjangna i bas mere. IbereNa Jesus jadi tebusen ncidahken kekelengen Dibata si mbelinna janah la lit kekelengen si terbelinen asangken si e. La lit si ngasup bagi Jahwe melumbarna. La lit si banci mbebasken kita arah dosa ras kematen, selain tebusen. La terturiken uga ulina pemere Dibata kerna tebusen.