Berita si meriah kerna Kerajan Dibata sangana iberitaken i sebelang doni bagi si enggo ikataken Jesus. (Matius 24:14) Iceritaken i Pustaka bas buku Daniel maka Kerajan enda eme pemerentahen Dibata. Bas pasal 2 buku e, itulisken ramalen kerna kerajan-kerajan ntah pe pemerentahen manusia si erkuasa, mulai kin Babilon mbarenda seh ngasa gundari. Kerna masa depan, ayat 44 ngataken,

“Ipanteki Dibata nu langit me sada kerajan si la ermasap-masap. Ndigan pe la tertaluken, tapi ikernepkenNa me seh keri kerajan-kerajan si deban, janah kenca bage pajek ia rasa lalap.”

Ramalen enda bage pe ramalen si deban bas Pustaka ngataken maka kerajan manusia igantiken pagi alu Kerajan Dibata si erban doni enda aman ras dame. Uga nge pagi kegeluhenta i bas Kerajan Dibata? Enda me piga-piga janji si luar biasa si lanai ndekah terjadi.

• LANAI PAGI LIT PERANG

  Masmur 46:10, “Ipengadi [Jahwe] perang i belang-belang doni enda, panah iripukkenNa, lembing ipenggelkenNa.”

  Bayangken uga keadan doni enda adi kepentaren ras bahan-bahan si gundari ipake guna erban senjata, pagi ipake gelah erguna man manusia labo guna munuh manusia! Janji enda banci tuhu-tuhu terjadi adi Kerajan Dibata nggo merentah.

• LANAI PAGI LIT PINAKIT

  Jesaya 33:24, “Lanai pagi lit si sakit ringan i bas negerinta.”

  Bayangken bas doni enda lanai pagi lit si menderita perban sakit jantung, kanker, malaria, ras pinakit si deban. Lanai pagi iperluken rumah sakit bage pe tambar. Sempurna kesehatenta. Enda masa depan si pasti man kalak si tading i doni.

• LANAI PAGI KURANG PANGAN

  Masmur 72:16, “Mbuahlah page i belang-belang negeri, uruk-uruk dem alu ulih juma.”

  Ihasilken doni pagi pangan si cukup man manusia, kerina kalak banci ndatken pangan. Lanai pagi lit kalak si la man ntah pe kurang gizi.

• LANAI PAGI LIT SI MESUI, CEDA ATE, RAS KEMATEN

  Ketangkasen 21:4, “Iapusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit. Sebap kai si terjadi mbarenda nggo lanai lit.”

   Enda ertina kegeluhen si sempurna seh rasa lalap bas pardis i doni! Enda me si nggo ijanjiken Dibata Jahwe si perkeleng, si Nciptaken kita.

Berlebihen nge akapndu janji-janji e? Memang nterem kalak merhat ndatken kegeluhen bagi si ijanjiken bas Pustaka ndai, tapi lit si erban nterem kalak la tek lit kegeluhen si rasa lalap. La ateta mamang kerna si e, perban lenga pernah lit manusia si la mate-mate bagi si ijanjiken ndai.

Manusia nggo iperbudak dosa ras kematen janah menderita perban pinakit, ceda ate, bage pe masalah. Nggo ndekah kel iadapi manusia si e kerina, emaka nterem kalak nggo biasa akapna janah akapna ka memang nggo kin bage arusna. Tapi enda labo tujun Dibata Jahwe man manusia.

Gelah tek kita man janji Dibata, ikatakenNa alu jelas, “La mulihken man bangKu alu sia-sia, tapi isehkenna kai si Kurencanaken, dingen ilakokenna kai Kusuraken.”​—Jesaya 55:11.

Ikataken bas Pustaka, Jahwe eme Dibata si “la banci erbual.” (Titus 1:2) Perban nggo ijanjikenNa masa depanta si luar biasa, banci jadi tersungkun-sungkun kita: Tuhu nge manusia banci nggeluh rasa lalap bas Pardis i doni? Kai si arus silakoken gelah banci pagi nggeluh i Pardis? Bas halamen seterusna banci idatndu keterangen guna njawap penungkunen-penungkunen enda.