Pernah nge kam tersungkun-sungkun kerna masa depanndu ras keluargandu? Bayak ntah mesera nge kam pagi, meriah nge kapndu ntah lang? Gedang nge pagi umurndu ntah lang? Nggo ribun tahun ipikir-pikirken kalak penungkunen si bage.

Ipelajari para ahli kira-kira kai pagi si terjadi i doni. Amin pe melala si iperkirakenna terjadi, tapi piga-piga gagal. Contohna, bas tahun 1912, Guglielmo Marconi, penemu radio, mperkiraken, “Lanai pagi lit perang kenca nggo lit radio.” Selain si e, peminpin i bas Perusahan Decca Records si nulak grup musik the Beatles bas tahun 1962, tek ia maka grup pemain gitar lanai bo pagi terkenal.

Nterem si dungna mindo petunjuk kerna masa depan ku ilmu gaib. Deba mindo petunjuk ku kalak si ngeramal arah bintang. Kerna ramalen bintang ntah pe zodiak lit rusur iban bas majalah ntah koran. Si debanna ka mindo petunjuk ku peramal si nina banci “mbaca” masa depan alu kartu ramal, nomor-nomor, ntah pe garis tan.

Guna meteh masa depan, mbarenda nari piga-piga kalak nungkun man peramal eme imam-imam si dilaki ntah pe si diberu si ngataken maka nggo ibereken Dibata man kalak e keterangen kerna masa depan. Misalna, Raja Kroesus arah Lidia nari ngirimken hadiah si merga kel man peramal i Delfi, Junani, gelah banci itehna kai hasilna adi iserangna Kores arah Persia. Ikataken peramal e maka ihancurken Kroesus me “sada kerajan si mbelin” adi iserangna Kores. Perban tek ia maka pasti ia menang, lawes me Kroesus erperang, tapi kerajan si mbelin si ihancurkenna eme kerajanna sendiri!

Ramalen si la jelas arah peramal e la lit gunana; amin pe ramalenna terjadi tapi la itehna pihak siapai si menang. Kerina si lit bas Kroesus bene me perban ramalen si salah e. Kalak si gundari si atena meteh masa depan, banci nge ndatken hasil si terulin?