LUAR BIASA KEL JANJI E! Nggo erjanji Dibata si Nciptaken kita maka banci kita nggeluh rasa lalap, i doni enda. Tapi nterem kalak la tek man janji e. Nina, ‘Kerina kalak mate nge pagi dungna.’ ‘Adi nggo nggeluh pasti naring mate.’ Lit ka si ngataken maka banci nge kita nggeluh rasa lalap, tapi la i doni enda. Kegeluhen si rasa lalap e banci sidatken adi kita nggo mate kenca e naik ku surga. Menurutndu uga?

Cuba ukuri lebe kai nina Pustaka kerna telu penungkunen enda: Uga dekahna nge arusna manusia nggeluh? Kai situhuna tujun Dibata man doni enda ras man manusia? Engkai maka manusia mate?

Arah kerina ciptan Dibata i doni, manusia si istimewana. Engkai? Ikataken bas Pustaka maka manusia ngenca si iciptaken bali bagi “tempas” Dibata janah “menam seri” ras Ia. (Kejadin 1:26, 27) Kai maksudna? Maksudna, nggo ibereken man manusia sipat-sipat si bali bagi sipat Dibata, misalna kekelengen ras keadilen.

Ibereken ka man manusia kengasupen gelah banci rukur, guna meteh apai si mehuli ras si la mehuli bage pe sura-sura gelah banci nandai ras ndeher ku Dibata. Enda me alasenna ngkai maka banci siergai uga luar biasana alam semesta enda, termasuk ka seni, musik, ras puisi. Si pentingna, manusia banci ndeher ras Pencipta. Enda me si erbanca manusia beda ras ciptan Dibata si debanna si lit i doni.

Emaka, ukuri enda: Ibereken Dibata nge man banta sipat-sipat si luar biasa ras kengasupen si banci terus sikembangken, adi kentisik ngenca ateNa kita nggeluh? Situhuna, ibereken Dibata man manusia sipat-sipat ras kengasupen si luar biasa enda gelah meriah siakap nggeluh rasa lalap bas doni enda.

Ikataken piga-piga kalak maka labo ate Dibata manusia nggeluh rasa lalap i doni. Nina, doni enda ingan sementara saja bo ngenca, eme ingan guna nguji manusia, cocok ntah lang ia nggeluh rasa lalap ras Dibata i surga. Tapi, adi payo kin bage, berarti Dibata kap si ertanggung jawap man kerina kesusahen ras kejahaten si lit i doni enda? Enda bertentangen kel ras sipat Dibata. Ikataken bas Pustaka, “Dibatandu setia dingen bujur; ilakokenNa  kai si mehuli dingen patut.”​—Ulangen 32:4.

Ijelasken bas Pustaka kai tujun Dibata man doni enda, “[Jahwe] kap empuna surga, doni iberekenNa man manusia.” (Masmur 115:16) Payo, nggo mejile iban Dibata doni enda, ingan tading manusia si tetap, janah nggo isikapkenNa kerina keperlunta gelah banci meriah siakap nggeluh i doni seh rasa lalap.​—Kejadin 2:8, 9.

“[Jahwe] kap empuna surga, doni iberekenNa man manusia.”—Masmur 115:16

Ijelasken ka bas Pustaka kai tujun Dibata man manusia. IperentahkenNa manusia pertama gelah ‘ndemi dingen naluken doni enda, ngkuasai kerina rubia-rubia i daraten.’ (Kejadin 1:28) Tuhu-tuhu luar biasa kel tugas si ibereken man kalak e guna ngurus ras erban kerina doni jadi Pardis! Janah enda banci inanami Adam ras Hawa bage pe keturunenna seh rasa lalap i doni, labo i surga.

Jadi, engkai maka kita mate? Ikataken bas Pustaka maka salah sada malekat si iciptaken Dibata, si dungna igelari Setan si Iblis, ncedai rencana si nggo iban Dibata bas taman Eden. Uga carana?

Ipengaruhi Setan manusia si pertama, Adam ras Hawa, gelah mberontak ngelawan Dibata. Sanga ikataken Setan maka itahan Dibata kai si mehuli man kalak e, eme hak guna mutusken kai si benar ras kai si jahat, ipilih kalak e ngikutken Setan janah ilawanna Dibata. Hasilna, mate me kalak e bagi si nggo ikataken Dibata. Lanai kalak e banci nggeluh rasa lalap bas Pardis i doni.​—Kejadin 2:17; 3:1-6; 5:5.

Pemberontaken Adam ras Hawa erpengaruh man manusia seh ngasa gundari. Nina Pustaka, “Dosa masuk ku doni arah sekalak manusia, janah dosa e maba kematen. Akibatna, kematen nggo ngelangketi kerina manusia.” (Roma 5:12) Kita mate perban nggo iwarisken orang tuata si pertama dosa ras kematen man banta, labo perban nggo itentuken Dibata ntah pe labo perban ‘rencana’ Dibata si la banci siangkai.

Pemberontaken bas Eden labo erban tujun Dibata man manusia ras doni gagal. Perban Dibata perkeleng ras adil, idaramiNa cara si deban si banci mbebasken manusia arah dosa ras kematen. Nina rasul Paulus, “Upah dosa eme kematen, tapi pemere Dibata eme kap kegeluhen si rasa lalap erkelangken Kristus Jesus Tuanta.” (Roma 6:23) Emaka “ibereken [Dibata] AnakNa si tonggal, gelah ise pe si erkiniteken man bana la ikernepken tapi ndatken kegeluhen si rasa lalap.” (Johanes 3:16) Perban nggit Jesus jadi korban tebusen, banci iulihken Jesus kerina si nggo bene iban Adam. a

Lanai ndekah terjadi me janji Dibata guna ngubah doni enda jadi Pardis. Banci kam nggeluh rasa lalap adi lakokenndu perentah Jesus enda, “Masuklah arah gerbang si sempit, erkiteken gerbang ras dalan si mbelang e nuju ku kematen, janah nterem kalak masuk arah e. Tapi gerbang si sempit ras dalan si mesera e nuju ku kegeluhen, janah piga-piga kalak ngenca si banci ndatkenca.” (Matius 7:13, 14) Payo, kam si milihsa uga masa depanndu. Jadi, kai nge pilihenndu?