Bas awal artikel enda nggo sibahas kerna uga Kroesus itipu peramal arah Delfi, hasilna italuken raja Persia ia. Bas Pustaka, melala nubuat ntah pe ramalen, salah sadana eme ramalen kerna raja Persia, ramalen e terjadi tepat bagi si iramalken.

Lit 200 tahun sebelum raja e lahir, nggo ikataken nabi Jesaya maka gelarna Kores, ijelaskenna ka uga carana naluken Babilon, kota si hebat.

Jesaya 44:24, 27, 28, “Kuperentahken man lawit si mbages, ‘Kerahlah! Kubahan maka lau belinndu jadi kerah.’ Kempak Raja Kores Kukataken, ‘Kam merentah guna Aku, lako ndalanken sura-surangKu. Kam merentahkenca maka Jerusalem ipanteki mulihi, janah palas Rumah Pertoton ipajekken ka pagi.’”

Menurut Herodotus ahli sejarah Junani, ialihken tentera Kores paliren Lau Eprat si ngkelilingi kota Babilon. Strategi Kores enda erban tenterana banci masuk ku kota ngelewati lau e. Kenca nggo irebutna kota e, ibebasken Kores kalak Jahudi si itaban i Babilon janah ipediatna gelah ibangun kalak e mulihi Jerusalem, si nggo ihancurken 70 tahun si lewat.

Jesaya 45:1, “[Jahwe] enggo milih Kores jadi raja. IangkatNa ia naluken bangsa-bangsa; isuruhNa nangtangi kuasa raja-raja, janah kerabangen kuta-kuta italangi [Jahwe] man bana.”

Kalak Persia masuk ku kota ngelewati dua lapis pintu si paguh i tembok kota, si ipediat talang bage saja. Adi iteh kalak Babilon rencana Kores, pasti la ipeturutna gerbang arah lau e talang. Tapi e nggo terjadi, kota e nggo talu.

Ramalen si luar biasa enda eme sada arah melala ramalen i bas Pustaka si nggo terjadi. a La bagi ramalen manusia si rehna arah dibata-dibata palsuna, ramalen Pustaka rehna arah Dibata si benar si ngataken, “Bena-benana nari enggo Kunubuatken kerna kedungenna, nai-nai nari enggo Kuturiken kai si nandangi jadi.”​—Jesaya 46:10.

Dibata si benar ngenca, si gelarna Jahwe, si banci ngataken bage. Erti gelarNa eme “Ia si Erbanca Jadi.” Enda ertina lit kuasaNa guna meteh ras erban masa depan terjadi bagi sura-suraNa. Enda erban kita tek maka pasti itepatiNa kerina si nggo ijanjikenNa.

Tehndu nge kai si nggo iramalken bas Pustaka kerna jamanta gundari? Kira-kira 2.000 tahun si nggo lewat, ikataken Pustaka “reh me masa si sulit” bas “wari-wari pendungi.” Pendungi man kai? Labo man doni ntah pe manusia, tapi man perubaten, penindasen, ras penderitan si ialami manusia ribun tahun dekahna. Mari sinen piga-piga ramalen si jadi ciri-ciri “wari-wari pendungi.”

2 Timotius 3:1-5, “I bas wari-wari pendungi . . .  manusia pagi ngkelengi dirina saja, mata duiten, tual, meganjang rukur, tukang hina, la patuh man orang tua, la meteh ngata bujur, la setia, la lit kekelengenna, la nggit arih-arih, tukang pitnah, la ikuasaina dirina, merampus, la atena ngena si mehuli, penghianat, keras kepala, sombong, lanai diatena Dibata tapi kesenangenna saja si idaramina, tempa-tempa isembahna Dibata tapi la idalankenna kai nina Dibata.”

Payo nge akapndu sipat-sipat si bage nggo reh jelasna gundari? Isadarindu nge maka kita gundari nggeluh ras kalak si mentingken bana, mata duiten, janah sombong? Iperdiatekenndu nge maka kalak si gundari mbue kel tuntutenna janah la ia nggit arih-arih ras kalak si deban? Pasti rusur idahndu anak-anak la patuh man orang tuana janah buen kalak si ngutamaken kesenangenna asangken Dibata. Reh warina reh kelekna sipat si bage ndai kerina.

Matius 24:6, 7, “Ibegi kena pagi sora perang ras berita-berita kerna perang. . . . Bangsa pagi ngelawan bangsa ras kerajan ngelawan kerajan.”

Iperkiraken, lit lebih 100 juta kalak si mate perban perang mulai tahun 1914, jumlah enda buen asangken jumlah penduduk bas piga-piga negara. Ukuri uga buena iluh si mambur, ceda ate, ras penderitan perban perang enda. Iperdiateken bangsa-bangsa nge si enda kerina janah lanai ia erperang?

Matius 24:7, “I japa pe kurang pangan.”

Ikataken Program Pangan Dunia, “Situhuna cukup nge pangan man kerina kalak, tapi lit 815 juta kalak si mesera akapna ndarami nakanna, ertina sada arah siwah kalak medem alu beltek si kosong. Janah, sada arah telu kalak kurang gizi.” Iperkiraken lit telu juta anak si mate tiap tahunna perban la man.

Lukas 21:11, “I japa pe terjadi pagi gempa si megegeh.”

Tiap tahun, lit 50.000 gempa si banci igejapken manusia. Kira-kira 100 gempa si ncedai bangunen-bangunen, janah lit sada gempa si megegeh kel tiap tahun. Iperkiraken, antara tahun 1975 ras tahun 2000, lit 471.000 kalak si mate perban gempa.

Matius 24:14, “Berita si meriah kerna Kerajan e iberitaken pagi man manusia i belang-belang doni guna kesaksin man kerina bangsa, kenca si e reh me kedungen e.”

Saksi-Saksi Jahwe, si buena lebih waluh juta, mberitaken berita si meriah kerna Kerajan Dibata bas lebih 240 negeri. Iberitaken kalak e berita si meriah ku kota-kota, kuta-kuta si ndauh, bas kerangen, bage pe ku deleng. Ikataken bas ramalen e maka adi nggo cukup akap Dibata pendahin e, “reh me kedungen e.” Kai maksudna? Maksudna, kedungen man pemerentahen manusia si igantiken pemerentahen Kerajan Dibata. Kai si ijanjiken Dibata sanga merentah pagi KerajanNa? Teruslah baca gelah datndu jawapenna.