Pedah Pustaka: “Ula min kena mata duiten janah puaslah kena nandangi kai si lit.”​—Heber 13:5.

Gundari, melala kel barang si tempa-tempa arus situkur. Tapi menurut Pustaka, situhuna banci kita ‘puas nandangi kai si lit’ bas kita. Uga carana?

Ula “mata duiten.” Enterem kalak jadi jahat, lanai diatena kesehatenna, keluargana, temanna, janah lanai tehna mela perban ia mata duiten. (1 Timotius 6:10) Situhuna, kai si idatna la sebanding ras kai si nggo ikorbankenna. Kalak si mata duiten “la pernah bias akapna.”​—Pengerana 5:10.

Ula pentingen iakapndu erta asangken kalak. Memang perlu nge kita piga-piga barang perban lit gunana banta. Tapi erta la banci ngkelengi ras ngergai kita, manusia ngenca si banci ngelakokenca. Emaka, daramindulah teman situhu-tuhu. (Kuan-kuanen 17:17) Pasti puas geluhndu.

Pedah Pustaka: “Keriahen desken tambar si mereken kejuah-juahen.”​—Kuan-kuanen 17:22.

Teruslah siusahaken gelah meriah ukurta, sebap enda seri ras “tambar si mereken kejuah-juahen” sanga kita sakit. Tapi, uga carana gelah banci meriah ukurta sanga kita sakit?

Teruslah ngata bujur. Adi siukuri lalap masalahta, dungna ‘geluhta dem alu perbeben.’ (Kuan-kuanen 15:15) Tapi ikataken Pustaka gelah ‘terus kita ngata bujur.’ (Kolose 3:15) Sidaramilah kai saja si mehuli si banci erban kita ngata bujur. Misalna, uga jilena matawari terbenam, uga segarna angin si rembus, bage pe uga manisna percirem kalak si keleng ateta. Amin gia si e kerina tempa biasa saja, tapi banci erban meriah ukurta.

Sampatilah kalak si deban. Amin pe sangana kita sakit, ingetlah maka “riahen kap i bas mere asangken i bas ngalo.” (Perbahanen Rasul-Rasul 20:35) Sanga iergai kalak kai si nggo silakoken, pasti meriah kel ukurta piah dungna lanai siukuri kel masalahta. Banci reh riahna ukurta adi meriah siban ukur kalak.

Pedah Pustaka: ‘Pastiken kai si lebih penting.’​—Pilipi 1:10.

Adi lanai lit waktu perbulangen ras ndeharana ras-ras, banci rontang perjabunna. Emaka arus iban kalak e perjabunna jadi salah sada si pentingna bas geluhna.

Usahakenlah gelah lit waktu kena ras-ras. Ula min perbulangen ras ndehara sibanban jangna, tapi banlah rencana guna ras-ras ngelakoken piga-piga kegiaten. Nina Pustaka, “Ulin dua kalak asangken sekalak-sekalak.” (Pengerana 4:9) Banci kena ras-ras erdakan, olahraga, gawah-gawah, ntah pe si debanna si banci erban meriah ukur.

Buktikenlah kekelengenndu. Nina Pustaka perbulangen ras ndehara arus sikeleng-kelengen janah siergan. (Epesus 5:28, 33) Banci erpaguhna perjabun kena adi rusur kena cirem, sidakepen, ntah pe mereken hadiah amin gia kitik. Janah ingetlah, man teman geluhndu ngenca kam banci mesra.​—Heber 13:4.