Nina Dibata man Adam, “Adi ipanndu [buah batang kayu e], la banci lang mate kam.” (Kejadin 2:17) Adi nggo iteh Dibata ugapa pe metua nge Adam janah dungna mate, labo mungkin iberekenNa perentah e ndai. Iteh Adam ka maka adi la ipanna buah batang kayu e labo ia mate.

Seumpama la pe ipan Adam ras Hawa buah batang kayu ndai, banci denga nge kalak e nggeluh, sebap mbue nge batang kayu si lit buahna bas taman e. (Kejadin 2:9) Adi la ipan kalak e buah ndai, ibuktikenna me maka patuh ia man Dibata si nciptaken ia. Enda pe jadi bukti maka iakui kalak e lit hak Dibata mereken petunjuk man kalak e.

Gelah banci siteh ngkai maka Adam ras Hawa mate, perlu siperdiateken sada peristiwa si mpengaruhi kita kerina. Erbual Setan si Iblis erkelangken nipe. Nina Pustaka, “I bas kerina rubia-rubia daraten si ijadiken Dibata, nipe me si cerdikna. Nungkun nipe man diberu ndai, nina, ‘Tuhu kin ikataken Dibata man bandu maka la banci ipanndu sada pe buah batang kayu si i bas peken enda?’”—Kejadin 3:1.

Ngaloi Hawa, “Kerina buah batang kayu si lit i bas peken enda banci nge ipan kami, seakatan buah kayu si i tengah peken. Ikataken Dibata man kami maka la banci pan buahna, jemak pe ola. Adi ipan tah ijemak kami, mate kami.” Ikataken nipe ka bana, “Labo tuhu e, labo kam mate. Bage nina Dibata, perban ietehNa kenca ipanndu, bali kam ras Dibata, meteh si bujur ras si jahat.” Alu bage, ikataken Setan maka Jahwe perbual janah la iberekenNa kai si mehuli man Adam ras Hawa.​—Kejadin 3:2-5.

Tek Hawa nandangi kai si ibegina. Itatapna batang kayu ndai janah mejile kel iakapna buahna, dungna merincuh kel ia! Iputikkenna me buah e janah ipanna. Kenca si e nina Pustaka, “Jenari iberekenna man perbulangenna si rassa i je, janah ipan perbulangenna ka.”​—Kejadin 3:6.

Seh kel getemna pusuh Dibata ngidah anak si ikelengiNa sengaja ngelawan Ia! Kai si ilakoken Dibata? IkatakenNa man Adam, “Mulih ka kam ku taneh, sabap i je nari kam ijadiken. I bas taneh nari kam ijadiken, janah jadi taneh ka kam mulihken.” (Kejadin 3:17-19) Erkiteken si e, mate me Adam bas umur 930 tahun. (Kejadin 5:5) Labo Adam lawes ku surga ntah pe nggeluh bas ingan si deban. Sope iciptaken Jahwe Adam arah abu taneh, labo ia lit. Emaka kenca mate ia, lanai bo  ia lit janah jadi abu ka ia mulihken. Seh kel sedihna!

Perban sengaja Adam ras Hawa la patuh, lanai kalak e sempurna janah lanai banci nggeluh rasa lalap. Perban lanai sempurna janah nggo erdosa, sakit me kalak e janah reh tuana. Tapi labo kalak e saja si kena akibatna, anak-anakna pe ikut dungna la sempurna. Nina Roma 5:12, “Dosa masuk ku doni arah sekalak manusia [Adam], janah dosa e maba kematen. Akibatna, kematen nggo ngelangketi kerina manusia sebap kerina manusia nggo erdosa.”

Nina Pustaka, dosa ras kematen e seri ras “kain si nutupi kerina kalak bage pe kain si nutupi kerina bangsa.” (Jesaya 25:7, Terjemahan Dunia Baru) Enda ertina la lit manusia si banci bebas arah dosa bage pe kematen. Nina Pustaka, “Kerina manusia mate erkiteken Adam.” (1 Korinti 15:22) Emaka, lit penungkunen si bali bagi penungkunen Rasul Paulus, “Ise nge si nelamatken aku arah daging si maba ku kematen enda?” Adi menurutndu, ise?​—Roma 7:24.