PERBAN orang tuanta si pertama, Adam ras Hawa, la patuh man Dibata, kerina manusia ikut erdosa janah mate. Amin gia bage, peraten Dibata nandangi manusia labo berubah. I bas Pustaka si Badia, mulih-ulih ikataken Dibata maka peratenNa lenga berubah.

• “Kalak bujur me si ndatken bagin taneh i bas negeri e, janah ringan [“nggeluh,” Terjemahan Dunia Baru (NW)] ia i je rasa lalap.”​—Masmur 37:29.

• “Kematen imasapken [Jahwe] si Erdolat seh rasa lalap. IapusiNa iluh i bas mata kerina jelma nari.”​—Jesaya 25:8.

• “Musuh terakhir si nandangi ikernepken eme kematen.”​—1 Korinti 15:26.

• “Lanai pagi lit kematen ras ceda ate. Tangis ntah pe si mesui lanai pagi lit.”​—Ketangkasen 21:4.

Uga cara Dibata ‘nasapken kematen’ pagi? Bagi si ituriken ndai, jelas ikataken Pustaka maka ‘kalak bujur nggeluh rasa lalap.’ Tapi nina ka, “I bas pertibi enda labo lit kalak serta [“bujur,” NW], si katawari pe mehuli perbahanenna.” (Pengerana 7:20) Emaka, perban kerina manusia nggo erdosa, lanai nge kalak e banci nggeluh rasa lalap i doni? Ntah nggo ibatalken Dibata janjiNa ndube? Labo bage, sebap “Dibata . . . la banci erbual.” (Titus 1:2) Adi bage, kai nge si ilakoken Dibata gelah tetap terjadi sura-suraNa nandangi manusia?

Perban keleng ate Dibata Jahwe manusia, ibanNa cara guna nasapken kematen eme alu mereken tebusen. Tebusen maksudna erga guna mbebasken sekalak jelma si iculik. I bas Pustaka, tebusen pe banci ka ertina erga si arus igalari guna ganti rugi. Perban kerina manusia nggo erdosa janah pasti naring mate, emaka nina Pustaka, “Ise pe la banci nebusi kesahna, ntah pe nggalari tebusna man Dibata. Sabap tebusen guna geluh manusia meherga kal kap, e maka kai saja pe igalarkenna la pernah cukup.”​—Masmur 49:8, 9.

Sanga lit manusia si la sempurna mate, si igalarina hukumen dosana ngenca, la banci itebusna bana bage pe la banci itebusna dosa kalak si deban. (Roma 6:7) Emaka perlu kita sekalak jelma si sempurna janah la erdosa guna mereken geluhna, labo guna nebus dosana tapi guna nebus dosanta kerina.​—Heber 10:1-4.

E me sebapna isuruh Dibata Jesus ku doni. Lahir ia jadi sekalak manusia si sempurna janah la erdosa. (1 Petrus 2:22) Ikataken Jesus, reh ia guna “mereken kegeluhenna selaku tebusen jadi penukar man nterem jelma.” (Markus 10:45) Mate ia guna nggalari dosa-dosanta janah ibebaskenna kita arah kematen gelah banci kita nggeluh.​—Johanes 3:16.

Bagi si ikataken Pustaka, nggo siadapi gundari “masa si sulit si dem kiniseran.” Enda me buktina kita nggeluh bas “wari-wari pendungi” doni si jahat enda. (2 Timotius 3:1) Kenca wari-wari pendungi e, ‘ihakimi me kalak si la nembah Dibata janah ikernepken me kalak e.’ (2 Petrus 3:3, 7) Tapi kalak si keleng atena Dibata la ikernepken janah datna pasu-pasu eme “kegeluhen si rasa lalap.”​—Matius 25:46.

Seh kel teremna kalak si banci ka nggeluh rasa lalap sanga nggo ipekeke pagi. Ibuktiken Jesus  maka kalak mate banci nggeluh mulihi sanga idahina kota Nain. Lit i je mate anak sekalak diberu si nggo mbalu, sada e ngenca anakna. ‘Mekuah kel ate Jesus’ diberu e, emaka ipekekena anakna e. (Lukas 7:11-15) Ikataken Rasul Paulus, “Pengarapenku man Dibata . . . lit kekeken i bas si mate nari, eme kekeken kalak si benar, bage pe kalak si la benar.” Arapen kerna kekeken e bukti si luar biasa maka keleng kel ate Dibata manusia.​—Perbahanen Rasul-Rasul 24:15.

Seh kel teremna kalak si banci nggeluh rasa lalap. Nina Pustaka, “Kalak bujur me si ndatken bagin taneh i bas negeri e, janah ringan [“nggeluh,” NW] ia i je rasa lalap.” (Masmur 37:29) Sanga si e pagi, meriah kel ukur kalak e sebap banci igejapkenna kai si itulis Rasul Paulus kira-kira 2.000 tahun si nggo lewat, nina, “O kematen, i ja kemenangenndu? O kematen, i ja bisandu?” (1 Korinti 15:55) Kematen e musuh manusia si seh kel kejamna. Tapi pasti nge imasapken pagi!