KEGELUHEN manusia si gundari la bagi sura-sura Dibata. Arusna min kalak si tading i doni enda kalak si nggit iajari Dibata, patuh man perentah-perentahNa, janah nggit ngusih sifat-sifatNa. Ate Dibata ermeriah ukur min kalak e, melala si banci ipelajarina, janah erban doni enda jadi pardis.

• “IpengadiNa perang i belang-belang doni enda.”​—Masmur 46:10.

• ‘Seh me waktu si itetapken guna ngkernepken kalak si ncedai doni.’​—Ketangkasen 11:18.

• “Lanai pagi lit si sakit ringan i bas negerinta.”​—Jesaya 33:24.

• “Kasa kai ulihna latih, tuhu-tuhu kal inanamina.”​—Jesaya 65:21, 22.

Kai nge si ilakoken Dibata gelah terjadi janji-janjiNa e? Enggo iban Dibata sada pemerentahen si sempurna si merentah doni pagi arah surga. I bas Pustaka ikataken maka pemerentahen e Kerajan Dibata. (Daniel 2:44) Jesus me si ipilih Dibata jadi Rajana. Nina Pustaka, “Ibere Dibata Jahwe ka pagi man [Jesus] tahta . . . , jadi Raja pagi ia.”​—Lukas 1:32, 33.

Sanga Jesus i doni, melala ibanna mukjizat guna nampati nterem kalak. Emaka tek kita adi nggo merentah pagi ia, pasti ndauh ulin geluhta asangken si gundari.

• Pernah ipepalemna kerina erbage pinakit. Emaka, banci ibanna kerina manusia sehat, la sakit-sakit.​—Matius 9:35.

• Banci ipengadina badai bas lawit. Emaka, banci iambatina bencana alam.​—Markus 4:36-39.

• Iberena ribun kalak man. Emaka, banci icukupina kai pe si iperluken manusia.​—Markus 6:41-44.

• Iubahna lau jadi anggur bas sada kerja-kerja. Emaka, tek kita banci ibanna meriah siakap geluhta.​—Johanes 2:7-11.

Bagenda me ate Dibata kegeluhen kalak si ngkelengi Ia. Kai nge si perlu ilakokenndu gelah datndu kegeluhen si bage? Lit “dalan” si arus idalanindu. Nina Pustaka, enda ‘dalan si nuju ku kegeluhen, janah piga-piga kalak ngenca si banci ndatkenca.’​—Matius 7:14.

Kai kin dalan kegeluhen e? Nina Dibata, ‘Aku kap Jahwe Dibatandu; Aku ngajari kam guna kiniulinndu, janah naruhken kam ku bas dalan si man dalanenndu.’ (Jesaya 48:17) Adi idalankenndu pedah enda, banci reh ulina kegeluhenndu.

Nina Jesus, “Aku kap dalan, kebenaren, ras kegeluhen.” (Johanes 14:6) Adi sidalanken kai si iajarken Jesus janah siusih ia, banci kita erteman ras Dibata janah meriah me ukurta.

Uga carana gelah banci siteh dalan kegeluhen e? Gundari melala kel agama. Tapi ipersingeti Jesus kita, “Labo kerina kalak si erlebuh man bangku, ‘O Tuan, Tuan,’ masuk ku bas Kerajan surga, tapi  kalak si ngelakoken peraten Bapakku si i surga nge.” (Matius 7:21) Nina ka, “Banci itandai kena kalak e arah buahna.” (Matius 7:16) Banci itehndu si apai agama si benar adi ipelajarindu Pustaka.​—Johanes 17:17.

Uga carana erdalan bas dalan kegeluhen? Salah sada carana, arus sitandai Si Nciptaken kita. Misalna, perlu siteh: Ise gelarNa? Uga kin sifat-sifatNa? IperdiatekenNa nge kita ntah lang? Kai si ngena ateNa? *

Labo terjeng erdahin, man, meriah-riah, ras erjabu ngenca manusia iciptaken Dibata. Ate Dibata sitandai min Ia janah kita jadi temanNa. Banci sibuktiken keleng ateta Ia adi silakoken kai si ngena ateNa. Nina Jesus, “Adi itandai kalak maka Kam ngenca Dibata situhu-tuhu, . . .  ialokenna me kegeluhen si rasa lalap.”​—Johanes 17:3.

Adi meriah atendu ibanndu ukur Dibata, banci saja arus ibanndu perubahen bas geluhndu. Pasti la menukah iakapndu. Tapi, adi nggo ibenakenndu erdalan bas dalan kegeluhen, tambah warina pasti tambah keriahen ukurndu. Adi lit penungkunenndu kerna Dibata, meriah ukur Saksi-Saksi Jahwe nampati kam ndarami jawapna bas Pustaka. Banci itentukenndu ndigan waktuna bage pe ingan si cocok iakapndu. Banci hubungindu kami bas situs www.pr418.com/btx.