Kita Iciptaken gelah Nggeluh Rasa Lalap
PASTI kerina manusia merhat ia gedang umurna janah ermeriah ukur. Bayangken banci kam nggeluh seh rasa lalap janah la pernah sakit! Banci melala waktundu ras keluargandu bage pe temanndu, banci kam gawah-gawah ku japa pe, janah banci ka ipelajarindu kai pe si meriah akapndu. Pasti luar biasa kel!
Engkai maka merhat kita nggeluh rasa lalap? Nina Pustaka, Dibata me si erbanca lit sura-suranta nggeluh rasa lalap. (Pengerana 3:11) Ikatakenna ka maka “Dibata kekelengen kap.” (1 Johanes 4:8) Perban keleng ate Dibata kita, la mungkin ibereNa banta sura-sura nggeluh rasa lalap adi la kita banci nggeluh rasa lalap.
Jelas me, ise pe labo nggit mate. Janah, nina Pustaka kematen e “musuh.” (1 Korinti 15:26) Lit si nguda denga pe nggo mate, si debanna kenca nggo metua. Tapi si pasti kerina nge dungna kalak mate. Ngukuri kerna si e, nterem kalak mbiar mate. Mungkin nge lanai pagi lit kematen?
ATE DIBATA NGGELUH KITA RASA LALAP
Labo sura-sura Dibata manusia mate. Arah buku Kejadin i bas Pustaka, banci siteh maka ate Dibata manusia nggeluh rasa lalap i doni. Iciptaken Dibata Jahwe doni janah isikapkenNa ka kerina si iperluken manusia gelah banci nggeluh ermeriah ukur. Kenca si e, iciptakenNa manusia si pertama eme Adam, janah ibanNa ia tading bas pardis i Taman Eden. Kenca bage “itatap Dibata, janah idahNa maka kerina si enggo ijadikenNa tuhu-tuhu mehuli.”—Kejadin 1:26, 31.
Sempurna Adam iciptaken Dibata. (Ulangen 32:4) Hawa pe, ndehara Adam, sempurna perukuren bage pe dagingna, la kurang kai pe. Nina Jahwe man kalak e, “Ertuahlah kam jadi nterem, demi dingen taluken doni enda, kuasai kerina nurung, perik-perik i awang-awang, bage pe kerina rubia-rubia i daraten.”—Kejadin 1:28.
Pasti ndekah maka banci idemi Adam ras Hawa doni enda. Arus lit lebe anak-anak Hawa, janah anakna e pe arus ka lit anak-anakna, e maka banci dem doni enda bagi sura-sura Dibata. (Jesaya 45:18) Masuk akal nge isuruh Jahwe Adam ras Hawa ndemi doni enda, adi terjeng ngenen anak ras kempuna saja kalak e nggeluh?
Selain si e, ibereken Dibata ka tugas gelah ikuasai Adam binatang-binatang. Isuruh Dibata ia erban gelar binatang-binatang janah pasti ndekah ngelakokenca. (Kejadin 2:19) Tapi gelah banci ikuasai Adam binatang-binatang e, arus ipelajarina lebe kerna binatang-binatang e janah arus itehna uga cara ngurussa. Pasti ndekah kel ngelakokenca!
Perban isuruh Dibata Adam ras Hawa ndemi doni enda janah ngkuasai binatang-binatang, banci siteh maka sura-sura Dibata gedang min umur kalak e. Janah memang gedang kel umur Adam.
ATE DIBATA MANUSIA NGGELUH RASA LALAP BAS PARDIS I DONI
GEDANG KEL UMUR KALAK E
Adam, 930 tahun
Metusalah, 969 tahun
Nuah, 950 tahun
Gundari, 70-80 tahun
Bas Pustaka, banci siteh maka seh kel gedangna umur kalak si mbarenda. Misalna Adam. Nina Pustaka, “I bas umur 930 mate ia.” Janah, lit ka enem kalak si deban si umurna lebih 900 tahun! Gelarna eme Set, Enos, Kenan, Jaret, Metusalah, ras Nuah. Kalak e kerina nggeluh sope reh Banjir si Mbelin bas jaman Nuah, janah umur Nuah 600 tahun sanga reh Banjir e. (Kejadin 5:5-27; 7:6; 9:29) Engkai maka banci gedang kel umur kalak e?
Kerina kalak e ndeher denga ku kesempurnan, ntah pe ndeher denga ku masa manusia pernah sempurna. Banci saja e me alasenna ngkai maka gedang kel umur kalak e. Tapi ngkai maka adi sempurna kita, banci gedang umurta? Janah uga carana kematen e imasapken pagi? Gelah banci siteh jawapna, perlu siangkai lebe ngkai maka kita reh tuana janah dungna mate.
Mungkin Menarik Ka Kapndu
AJAREN PENTING ARAH PUSTAKA
Engkai maka Iban Dibata Doni Enda?
Mejile kel doninta enda. Jarakna ku matawari pas kel, kemiringenna pe pas, perputaren ras kecepatenna pe tepat. Engkai maka iban Dibata melala kel si mehuli i doni enda?
