BAYANGKEN sangana kam nonton film kerna kegeluhen sekalak artis. Ia sekalak pemain musik si seh kel terkenalna janah sor kel kam ngenenca. Tangtangna bas film e idahndu maka kitik-kitikna nari tutus kel atena main musik janah terus ia latihen. Kenca si e, rusur ia tampil bas konser-konser, seh ka ia ku luar negeri, janah dungna terkenal ia i sebelang doni. Tapi tambah warina, tambah ia tuana, janah dungna mate. Tamat me film e.

Film enda situhuna kisah nyata. La soal ia pemain musik, ilmuwan, atlet, ntah pe kalak terkenal si debanna, seri nge akhir ceritana. Uga pe suksesna kalak e, pasti nge kalak e metua janah dungna mate. Tapi adi la min ndai kalak e metua janah mate, pasti reh buena ka si banci ilakokenna.

Getem kel pusuhta ngidah si e, tapi enda me si terjadi pagi banta kerina. (Pengerana 9:5) Uga pe siban, tetap nge kita reh tuana janah dungna mate. Banci ka kita rempet mate perban sakit ntah pe kecelakan. Nina Pustaka, kita bali bagi kabut si erpagi-pagi si “kentisik ngenca lit, jenari bene.”​—Jakup 4:14.

Emaka, lit si erpengakap maka labo lit ertina geluh enda. Dungna bagenda carana rukur, “Man minem sajalah kita sebap pagi mate me kita.” (1 Korinti 15:32) Situhuna bage ia rukur perban itehna maka katawari paksa pe banci ia mate janah la lit arapenna bas wari si pepagi. Mon-mon, sanga mberat kel masalahta, banci saja tersungkun-sungkun kita, ‘Bage-bage saja nge geluh enda?’ I ja nge banci sidat jawapna?

Enterem si erpengakap maka ilmuwan ngenca si metehsa. Memang, nggo ergedangna umur manusia perban nggo ermajuna ilmu pengetahuan ras kedokteran. Gundari pe, lit ka piga-piga ilmuwan si sangana ndarami cara gelah banci tergedangen umur manusia. Kai pe pagi hasilna, tetap denga nge kita tersungkun-sungkun: Engkai maka kita metua janah dungna mate? Mungkin nge lanai pagi lit kematen? Sibahas kari e bas majalah enda, janah sijawap kari penungkunen: Bage-bage saja nge geluh enda?