KATA-KATA e itulis ribun tahun si nggo lewat. Si nulissa eme Raja Salomo si pentar. Ikatakenna maka merhat kel manusia nggeluh rasa lalap. Tapi gendek kel umur manusia janah ugapa pe pasti nge mate. E me sebapna iusahaken manusia mbarenda nari gelah reh gedangna umurna. Melala cataten sejarah bage pe turi-turin kerna kai saja si ilakoken manusia gelah banci gedang umurna.

Contohna Raja Gilgames arah Sumeria. Melala turi-turin kerna kegeluhenna. Misalna, iceritaken kerna uga tutusna atena ndarami cara gelah manusia la banci mate amin gia arus iadapina erbage bahaya. Tapi tetap ia gagal.

Bas abad si peempatken sope Masehi, iusahaken piga-piga ahli kimia i Cina erban ramuan si banci erban gedang umur manusia. Kepeken bas ramuan e lit dungna zat merkuri ras arsenik. Menurut kalak e, e me si erbanca piga-piga kaisar Cina mate. Bas abad pertengahen i Eropa, lit piga-piga ahli kimia si ndarami cara gelah banci ipan manusia emas. Iakap kalak e banci gedang umur manusia adi ipanna emas perban emas ndekah tahan.

Gundari, sangana ka idarami ahli biologi ras ahli genetika ngkai maka manusia metua. Enda me buktina maka labo ate manusia metua janah mate. Tapi kai nge hasilna usaha kalak e?

Lit piga-piga ilmuwan si mpelajari sel manusia janah idatna me lebih 300 teori guna njelasken ngkai maka manusia metua janah mate. Pudi wari enda, banci iban ilmuwan sel binatang ras sel manusia la metersa metua. Perban si e, lit piga-piga kalak bayak si mereken dana gelah banci terus idarami ilmuwan ngkai maka manusia mate. Kai hasilna?

Banci la metersa metua. Lit ilmuwan si tek maka manusia metua perban kai si terjadi bas telomer, eme ujung kromosom si lit bas tiap sel. Telomer e ngelindungi informasi si lit bas gen sanga sel erbuena. Sanga si e terjadi, reh gendekna telomer ndai. E me si erbanca sel lanai banci erbuena janah dungna metua me kita.

Bas tahun 2009, lit sekalak si dat hadiah Nobel gelarna Elizabeth Blackburn. Enggo idatna ras  timna sada enzim si banci erban telomer la metersa gendek. Alu bage, sel pe la meter metua. Amin pe bage, iakui kalak e maka situhuna labo telomer si erban gedang umur manusia.

Ngubah informasi bas sel. Sanga nggo metua sel manusia janah lanai terpelimbaruina bana, banci ikirimna informasi si salah ku sel si fungsina njaga daya tahan tubuh. Dungna banci terjadi peradangen, mesui siakap, janah sakit kita. Pudi wari enda, lit ilmuwan bas Prancis si nggo berhasil iubahna informasi bas sel si ibuat arah kalak si nggo metua, janah piga-piga kalak e umurna lebih 100 tahun. Ikataken Profesor Jean-Marc Lemaître selaku ketua tim penelitin e maka situhuna sel banci nge la metua.

Enterem ilmuwan si ngataken maka melala situhuna si banci ilakoken gelah manusia la metua. Aminna pe bage, la melala si banci ilakoken gelah ergedangna umur manusia. Memang mulai abad si pesepuluh siwahken nggo ergedangna umur manusia. Tapi enda terjadi perban nggo iteh manusia njaga kebersihen, nggo tehna ka uga carana gelah la kena pinakit si menular, janah lit ka antibiotik ras vaksin. Amin gia bage, ikataken piga-piga ahli genetika maka umur manusia nggo lanai banci itambahi.

Kira-kira 3.500 tahun si nggo lewat, itulis Musa bas Pustaka bagenda, “Dekahna kami nggeluh lit pitu puluh tahun, adi kami megegeh banci jadi seh waluh puluh tahun. Tapi kesusahen e me ayam-ayam geluh kami, pedas-pedas keri umur si gendek e, jenari lesap me kami.” (Masmur 90:10) Aminna pe terus iusahaken manusia gelah reh gedangna umurna, tapi tetap saja nge seri umur manusia si gundari ras si nggeluh bas jaman Musa.

Tapi, umur penyu banci lebih 150 tahun, janah lit ka batang kayu, misalna batang kayu si seh kel galangna eme sequoia si ribun tahun umurna. Emaka, adi ibandingken umur manusia ras umur piga-piga binatang ntah pe batang kayu, banci saja tersungkun-sungkun kita, ‘Engkai maka umur manusia 70 ngasa 80 tahun ngenca?’