Uga Cara Dibata Mpeseh JanjiNa?
Mulai kin tangtangna nari manusia iciptaken, enggo ngerana Dibata man manusia erkelangken malekat ras nabi-nabi. Janah, ibanNa ka gelah kataNa bage pe janji-janjiNa itulis. Ijanjiken Dibata maka bas wari si pepagi banci kita nggeluh alu ermeriah ukur. Adi bage, ja nari banci siteh kerna janji Dibata e gundari?
Berita arah Dibata nari lit bas Kata Dibata. (2 Timotius 3:16) Igunaken Dibata nabi-nabi guna nulisken beritaNa e. Uga carana? (2 Petrus 1:21) E banci ipeseri ras sekalak direktur si isuruhna sekretarisna nulis surat si isina bas ia nari. Pasti sikataken surat e surat direktur. Dibata pe bage, isuruhNa nabi-nabiNa nulis kai si lit i bas ukurNa. Emaka, aminna pe manusia si igunaken Dibata nulis Kata Dibata, isina bas Dibata nari.
KATA DIBATA BANCI IBACA ENTEREM JELMA
Seh kel pentingna berita Dibata e perban e “berita si meriah si la ermasap-masap.” Emaka merhat kel Dibata gelah ‘tiap bangsa, suku, bage pe bahasa’ banci mbacasa ras ngangkai isina. (Ketangkasen 14:6) E me sebapna Kata Dibata enggo lit bas lebih 3.000 bahasa, lengkap ntah pe lenga lengkap. La lit buku si deban si seri ras Kata Dibata.