La mungkin kita banci nggeluh adi la lit sinar matawari. Batang kayu banci erbulung, erbunga, erbuah, ntah pe ngasilken biji perban lit sinar matawari. Perban matawari, lau bas taneh banci iserap urat batang kayu janah lau e nangkih ku bulung, jenari jadi uap air.

Ibereken Dibata kita udan ras musim rani. Udan erban taneh banci ngasilken pangan si banci erban kita puas janah ermeriah ukur. Emaka, udan e sada hadiah si meherga i bas Dibata nari.

Enterem perbapan kuatir ngasup nge ia ntah lang mereken pangan ras paken man keluargana. Tapi cuba ukuri kai nina Kata Dibata enda, * “Perdiateken min perik-perik i langit. La ia nuan benih ntah pe rani ntah pe nimpan i bas lumbung, tapi ibere Bapak kena si i surga nge ia man. La kin ergan kena asangken perik-perik e?”​—Matius 6:25, 26.

“Erlajarlah i bas bunga nari si turah i bas taneh si la iurus. . . . [Raja] Salomo si seh kel muliana pe, pakenna la bagi salah sada bunga e jilena. Jadi, adi ibereken Dibata paken si bage man bunga-bunga si turah bage saja, . . .  terlebih ka kena.”​—Matius 6:28-30.

Perban banci ibereken Dibata pangan ras paken man banta, pasti banci ka isampatiNa kita guna ndatken keperlunta si deban. Adi siusahaken ngelakoken peraten Dibata, banci ipasu-pasuNa asil jumata ntah pe isampatiNa kita ndatken dahin guna ncukupi keperlunta.​—Matius 6:32, 33.

Banci turah kekelengenta man Dibata sanga siukuri kerina pemereNa si mehuli bagi matawari, udan, perik, ras bunga-bunga. Bas artikel seterusna, sibahas kari uga cara Dibata ngerana man manusia.