Piga-piga kalak erpengakap maka Kata Dibata e enggo iubah. Tapi, ikataken Nabi Jesaya maka “kata Dibatanta tahan rasa lalap.” (Jesaya 40:8) Adi bage, engkai kita banci tek adi Kata Dibata, termasuk janji Dibata banci tetap terteki?

Ngasup Dibata njaga kataNa janah isina pe la iubah. Kata Dibata e itulisken nabi-nabi i bas bahan si banci ceda. Tapi gelah Kata Dibata e banci tetap lit, itulis piga-piga kalak me mulihi Kata Dibata e alu hati-hati. Ikirana janah iperiksana tiap huruf si itulisna gelah la lit huruf si itambahken, iubah, ntah pe ihapus. Aminna pe bage, perban la sempurna, lit sitik kesalahen bas piga-piga Kata Dibata si enggo itulis kalak e.

Enggo idat ribun tulisen si nai arah Kata Dibata. Adi lit sitik saja bedana sada tulisen ras tulisen si deban, banci siteh si benar alu mbandingkenca ras tulisen si debanna.​—Guna meteh keterangen terbuen, banci nenndu artikel “Apakah Isi Alkitab Telah Diubah?” bas jw.org/id.

Perdiateken sada contoh. Bas tahun 1947, idat suku Badui Arab tulisen arah sada bagin Kata Dibata bas gua-gua i deher Laut Mati. Tulisen-tulisen e igelari Gulungen Laut Mati. Kepeken enda enggo iban 2.000 tahun si lewat. Ahli-ahli mbandingken Gulungen Laut Mati e ras Kata Dibata si lit gundari. Kai hasilna?

Kepeken isi Kata Dibata si gundari seri ras tulisen e. * Kenca erbage-bage tulisen si nai iperiksa alu hati-hati, siteh maka isi Kata Dibata tuhu-tuhu rehna i bas Dibata nari. Tuhu-tuhu ipastiken Dibata gelah kataNa si lit bas Kata Dibata la iubah.

Emaka, sanga sibaca isi Kata Dibata tek kita maka isina e sitik pe la iubah. Bas artikel seterusna mari sibahas kai si banci sipelajari kerna Dibata arah nabi-nabiNa.