Carana Engkelengi Kalak si Deban
Perban kerina kita keturunen manusia si pertama eme Adam, kerina kita sada keluarga. Situhuna perban kita sada keluarga, iarapken Dibata kel gelah kita sikeleng-kelengen ras siergan. Tapi gundari mesera kel ndatken kekelengen. Janah perban Dibata perkeleng, la ateNa ngena ngidah kai si terjadi gundari.
KAI NINA KATA DIBATA KERNA SIKELENG-KELENGEN?
“Kelengilah temanndu manusia, bali ras kam ngkelengi dirindu.”—IMAMAT 19:18.
“Teruslah kelengi musuh-musuh kena.”—MATIUS 5:44.
KAI ERTINA ENGKELENGI KALAK SI DEBAN?
Perdiateken uga Dibata njelasken kerna kekelengen bas Kata Dibata si itulis bas 1 Korinti 13:4-7.
“Kekelengen e sabar ras melias.”
Cuba ukuri: Uga nge perasanndu sanga banndu kesalahen tapi kalak tetap sabar, mehuli, janah la merawa man bandu?
“Kekelengen e la percian.”
Cuba ukuri: Uga nge perasanndu adi lit kalak si curiga kel man bandu ntah pe cian atena kam?
Kekelengen e “la mentingken bana.”
Cuba ukuri: Uga nge perasanndu adi iergai kalak pendapatndu janah la pendapatna saja si ipaksakenna?
“Kekelengen e la ngkira kesalahen.”
Cuba ukuri: Iampuni Dibata kalak si erdosa si tuhu-tuhu robah. “Kentisik ngenca Tuhan nembeh, Ia labo rasa lalap merawa.” (Masmur 103:9) Adi kitik siban ukur kalak janah nggit ia ngampuni kita, pasti meriah ukurta. Emaka, siampuni ka lah kalak si erban kitik ukurta.—Masmur 86:5.
Kekelengen e ‘la ermeriah ukur erkiteken kai si la benar.’
Cuba ukuri: Pasti la kita senang adi lit kalak si ermeriah ukur sanga kita ngadapi masalah. Emaka, ula kita ermeriah ukur adi lit kalak si sangana ngadapi masalah, aminna pe pernah la mehuli perbahanenna man banta.
Banci sikelengi kalak si deban bagi cara-cara si enggo sipelajari ndai. Adi silakoken bage man kerina kalak, la soal ise pe ia, ipasu-pasu Dibata me kita. Bas artikel seterusna, sibahas kari carana nampati kalak si sangana merluken penampat.