Ipasu-pasu Dibata Kalak si Patuh man BaNa
Ikataken Nabi Musa, adi sipatuhi perentah Dibata, pasti kita ipasu-pasu Dibata. (Ulangen 10:13; 11:27) Patuh kita man Dibata labo perban mbiar kita iukumNa, tapi perban keleng ateta Ia. Sipat-sipatNa si mehuli erban keleng ateta Ia janah patuh man baNa. La ateta ngelakoken kai pe si erban kitik ukurNa. Nina Kata Dibata, “Engkelengi Dibata ertina patuh man perentah-perentahNa.”—1 Johanes 5:3.
Tapi kai hubungenna patuh man Dibata ras ndatken pasu-pasu? Mari siperdiateken.
1. PATUH MAN DIBATA ERBAN KITA PENTAR
“Aku, Jahwe, Aku kap Dibatandu. Si ngajarken kai si mehulina man bandu, Si mabai kam bas dalan si arus idalanindu.”—JESAYA 48:17, Terjemahan Dunia Baru.
Jahwe, Dibata si nciptaken kita, itandaiNa kita janah iberekenNa petunjuk-petunjuk guna negu-negu kita. Adi siikutken petunjuk si lit bas Kata Dibata, banci siban keputusen si mehuli. Emaka, perlu sipelajari kai si iajarkenNa, kenca si e sidalanken.
2. PATUH MAN DIBATA ERBAN KITA ERMERIAH UKUR
“Ermeriah ukur me kalak si megiken kata Dibata ras ndalankenca!”—LUKAS 11:28.
Gundari, jutan kalak ermeriah ukur perban matuhi Kata Dibata. Misalna, bas Spanyol lit sekalak dilaki si menukah kel merawa janah rusur kel ia kasar man kalak si deban, termasuk man ndeharana. Bas sada wari, ibacana cerita si itulis Nabi Musa bas Kata Dibata. I je iceritaken kerna Jusup anak Jakup si idayaken jadi budak janah ipenjaraken labo perban lit salahna. Amin pe bage, tetap ia sabar, nggit ngampuni, janah la nggit balas dendam. (Kejadin pasal 37-45) Nina dilaki si arah Spanyol ndai, “Ngukuri kerna Jusup erban tersuruh ukurku mpebelin sipat si lembut, si mehuli, ras sabar. Asilna, gundari kunanami keriahen ukur situhu-tuhu.”
Bas Kata Dibata, lit melala petunjuk kerna uga arusna perbahanenta man kalak si deban. Bas artikel seterusna, sibahas kari terbuen kerna si e.