Ibereken Dibata sada hadiah si meherga man manusia. Kai e? Banci kita ngerana ras Ia janah siceritaken kerina isi pusuhta man baNa arah toto. Nina Nabi Daud bas totona, “Kam kap si megiken pertoton. . . . Kerina kalak reh man baNdu.” (Masmur 65:3) Tapi, uga carana gelah ibegi Dibata totota janah ipasu-pasuNa kita?

Sanga ertoto kam, “turiken isi pusuhndu man [Dibata],” peseh kerina si lit i bas pusuhndu. (Masmur 62:9) Meriah ukur Dibata Si Madakuasa megi toto si ipeseh alu bulat ukur.

Aminna pe melala penggelaren si ibereken man Dibata, tapi sada ngenca gelarNa, nina, “Aku kap Jahwe. E me gelarKu.” (Jesaya 42:8, Terjemahan Dunia Baru, [NW]) Gelar Jahwe lit itulis kira-kira 7.000 kali i bas Kata Dibata. Enterem nabi-nabi pe nggunaken gelar Dibata sanga ertoto. Misalna, nina Nabi Ibrahim, “O Jahwe, . . . nungkun ka ateku mulihi [man baNdu].” (Kejadin 18:30, NW) Emaka, kita pe arus ka nggunaken gelar Jahwe sanga ertoto.

La perlu kita ertoto i bas bahasa tertentu. Banci kita ertoto i bas bahasata sendiri. Perban la soal bahasa kai pe sigunaken, banci iangkai Dibata perukuren ras perasanta. Nina Kata Dibata, “Dibata la erpilihen. Tapi kerina kalak arah bangsa si apai pe, adi mbiar man Dibata janah ngelakoken kai si benar, pasti ialokenNa.”​—Perbahanen Rasul-Rasul 10:34, 35.

Tapi gelah ipasu-pasu Dibata, lit ka si perlu silakoken selain ertoto. I bas artikel seterusna, sibahas kari kai nge si perlu silakoken.