Tuhu kin Jadi Kalak si Mehuli Erban Masa Depanndu Terjamin?
Mbarenda nari enterem kalak si erpengakap maka pasti terjamin masa depanna adi mehuli ia. Contohna, enterem kalak bas Asia si tek man ajaren sekalak guru ras filsuf si gelarna Konghucu (551-479 SM). Iajarkenna bagenda, “Ula lakoken kai si la atendu ilakoken kalak man bandu.” *
SI ILAKOKEN ENTEREM KALAK
Enterem kalak tek maka adi mehuli ia, pasti terjamin masa depanna. Emaka, usahaken kalak e lalap ngergai kalak si deban, sopan, meteh bana, ras la lakokenna kai si banci erban terganggu pusuh peratenna. Bagenda nina sekalak diberu arah Vietnam si gelarna Linh, “Mbarenda tek aku maka adi mehuli aku ras jujur aku, pasti meriah ukurku.”
Lit ka kalak si mehuli perbahanenna perban ngikutken ajaren agamana. Bagenda nina sekalak dilaki arah Taiwan si gelarna Hsu-Yun, “Mbarenda iajarken man bangku maka perbahanen sekalak jelma sanga ia nggeluh me si nentuken meriah ntah susah pagi akapna kenca ia mate.”
KAI HASILNA?
Memang melala gunana adi mehuli kita, tapi enterem kang kalak si mehuli labo lalap meriah ukurna. Sekalak diberu i Hong Kong si gelarna Shiu Ping ngataken, “Lalap kulakoken si mehuli janah kuusahaken asa ngasupku ngurus keluargaku, tapi aku ras anakku itadingken dilakiku. Enggo kubuktiken maka kalak si mehuli lenga tentu meriah geluhna.”
Selain si e, enterem kalak enggo buktikenna maka labo kerina kalak si rajin nembah Dibata pasti kalak si mehuli. Sekalak diberu arah Jepang si gelarna Etsuko ngataken, “Mbarenda aktip aku bas agamaku, aku si ngurus kegiaten anak muda. Tapi sengget aku sanga kuidah kalak si lit bas organisasi agamaku la mehuli lagu langkahna, ersaing ka ia guna ndatken kekuasan, janah isalahgunakenna dana organisasi.”
“Lalap kulakoken si mehuli janah kuusahaken asa ngasupku ngurus keluargaku, tapi aku ras anakku itadingken dilakiku.”—SHIU PING, HONG KONG
Lit ka kalak si kecewa perban amin pe enggo rajin ia nembah Dibatana ras ngelakoken si mehuli, terjadi denga si la mehuli man bana. Bage me si gejapken Van arah Vietnam nari. Nina, “Mbarenda tiap wari kupersembahken erbage-bage buah, bunga, pangan, man nini bulangku si enggo mate. Kuakap sange adi bage kuban pasti reh ulina masa depanku. Ertahun-tahun dekahna, rusur ka kulakoken si mehuli janah kudalanken erbage-bage ajaren arah agamaku. Tapi amin pe bage, mekelek penakit dilakiku. Nce mate ka anakku si diberu si sangana kuliah i luar negri, padahal nguda denga ia.”
Emaka adi terjeng jadi kalak si mehuli saja labo erban masa depanta terjamin, kai nge si arus silakoken? Guna meteh jawapenna, perlu kita sumber informasi si terteki si banci nampati kita meteh uga carana gelah masa depanta terjamin. I ja banci sidat informasi si bage?
^ par. 2 Guna meteh terbuen kerna ajaren Konghucu, nen buku Pencarian Manusia akan Allah, pasal 7, paragrap 31-35. Buku enda iterbitken Saksi-Saksi Jahwe janah lit bas www.pr418.com/id.
