Kai kin Situhuna si Nentuken Masa Depanndu?
Enterem kalak tek maka masa depanna ipengaruhi kai si la teridah. E me sebapna lakoken kalak e erbage-bage kebiasan si akapna banci erban ia runtung ntah pe erban geluhna reh ulina.
SI ITEKI ENTEREM JELMA
RAMALEN BINTANG: Lit kalak si tek maka masa depanna itentuken menurut posisi bintang sanga ia lahir. Emaka baca kalak e ramalen zodiak gelah banci tehna uga masa depanna ras banci silahina bahaya.
FENGSUI: Lit kalak si tek gelah banci ia sukses, arus bangunna rumahna alu cara tertentu. Lo Wing, * si tading bas Hong Kong ngataken, “Gelah enterem kalak si reh ku tokoku, ikataken ahli fengsui man bangku, arus kutamaken sada batu kristal si khusus bas ingan tertentu bas tokoku.”
NEMBAH NINI BULANG: Lit kalak si tek maka arus iban kalak e meriah ukur nini bulangna si enggo mate, ntah pe erban meriah ukur erbage-bage dewa gelah lindungina kalak e ras ipasu-pasuna. Van, si tading i Vietnam ngataken, “Mbarenda tek aku maka pasti reh ulina geluhku adi kubereken persembahen man nini bulangku si enggo mate. Masa depanku ras masa depan anak-anakku pe pasti reh ulina.”
REINKARNASI: Enterem kalak tek maka kenca sekalak jelma mate, ilahirken ka ia mulihi janah siklus e mulih-ulih terjadi. Tek ka kalak e maka kai si nanamina gundari eme akibat arah perbahanenna bas kegeluhenna si sebelumna.
Situhuna enterem nge si labo teksa kerna si e. Tapi lalap darami kalak e ramalen kerna masa depan arah retak tan, zodiak, papan Ouija®, kartu tarot, shio, ras si debanna. Akap kalak e banci saja lit si tuhu arah ramalen e.
KAI HASILNA?
Payo kin si e kerina erban kegeluhen sekalak jelma reh ulina janah masa depanna terjamin?
Cuba perdiateken pengalamen Hào, si tading i Vietnam. Mbarenda tek ia man ramalen bintang, fengsui, ras isembahna ka nini bulangna si enggo mate. Tapi payo nge e erban ia sukses? Nina Hào, “Bangkrut aku janah melala utangku. Turah perubaten bas keluargaku janah stres kel aku.”
Qiuming, arah Taiwan pe tek kerna ramalen bintang, reinkarnasi, suraten padan, fengsui, janah sembahna ka nini bulangna si enggo mate. Tapi kenca ipereksana kerna si e terdauhen, nina, “Sadar aku maka ajaren ras kebiasan e situhuna erban aku bingung janah la sesuai sada ras si debanna. Ramalen bintang e rusur nge la tuhu. Kerna reinkarnasi pe, adina labo kuteh uga kegeluhenku sebelumna, uga ningku mpekena kegeluhenku si gundari?”
“Sadar aku maka ajaren ras kebiasan e situhuna erban aku bingung janah la sesuai sada ras si debanna.”—QIUMING, TAIWAN
Bali bagi pengalamen Hào, Qiuming, ras enterem kalak si debanna, situhuna masa depanta labo itentuken suraten padan, bintang, nini bulang si enggo mate, ntah pe reinkarnasi. Adi bage, kai si nentuken masa depanta?
Enterem kalak erpengakap adi meganjang sekolahna ras melala senna, masa depanna pasti cerah. Tapi payo kin bage?
^ par. 5 Piga-piga gelar si lit bas artikel enda ras artikel berikutna enggo iganti.
^ par. 16 Kata-kata enda ibuat arah buku Galati 6:7 si lit bas Kitap si Badia. Ajaren enda mirip ras sada kuan-kuan kalak Cina si terkenal si ngataken maka adi sisuan melon, siperani me melon. Adi sisuan kacang, siperani me kacang.
Mungkin Menarik Ka Kapndu
SORA ERMOMO
Banci nge Siteh Masa Depan arah Ramalen Bintang ras Ramalen si Debanna?
Banci nge kam tek ku ramalen manusia?
SORA ERMOMO
Kai Nina Pustaka kerna Kegeluhen ras Kematen
Lit nge sada bagin bas kita si tetap nggeluh kenca kita mate? Lit nge bas kita tendi si la banci mate? Ku ja perlawesna kalak mate?
