Enterem kalak erpengakap maka sekolah si meganjang banci erban sekalak jelma reh ulina ngelakoken pendahinna, jadi anggota keluarga si mehuli, ras jadi kalak si mehuli. Sekolah si meganjang pe banci nampati sekalak jelma ndatken dahin si galang gajina janah dungna jadi kalak bayak. Iakap kalak e, e ndai me kerina si erban sekalak jelma ermeriah ukur ras masa depanna terjamin.

Perdiateken kai si ikataken Zhang Chen si asalna arah Cina. Bagenda nina, “Keluargaku kalak mesera. Mbarenda kuakap adi melala senku makana banci aku ermeriah ukur ras entabeh pergeluhku. Selain si e, kuakap arus aku lulus lebe arah universitas gelah banci melala senku.”

Enterem kalak si nggit kuliah bas universitas si terkenal, banci saja ku universitas si lit i luar negri gelah masa depanna banci terjamin. Sope pandemi COVID-19, lalap tambah jumlah kalak si kuliah ku luar negri. Bas tahun 2012, ilaporken Organisasi Kerja Sama dan Pembangunen Ekonomi maka “lit 52 persen siswa si sekolah ku luar negri si asalna arah Asia nari.”

Enterem orang tua kerikenna si nasa litna gelah anakna banci kuliah bas luar negri. Qixiang si asalna arah Taiwan ngataken, “Keluargaku labo kalak bayak, tapi ate orang tuaku gelah empatna min anakna kuliah bas Amerika Serikat.” Emaka arus melala utang orang tua Qixiang gelah banci biayaina sekolah anak-anakna e. Bage ka me si inanami orang tua si debanna.

Memang pendidiken lit gunana, tapi pendidiken labo lalap jadi jaminen maka pasti dat kalak si erlajar e kai si arapkenna. Contohna, enterem kalak si la banci datna dahin bagi si arapkenna amin pe enggo usahakenna asa ngasupna gelah banci kuliah ras enggo mbue utangna. Bagenda itulisken bas sada koran Business Times si lit i Singapura, “Reh buena kalak lulusen universitas si jadi pengangguren.” Jianjie si enggo jadi doktor si tading i Taiwan ngataken, “Melala kalak si terpaksa erdahin bas bidang si la sesuai ras jurusenna.”

Uga kerna kalak si enggo datna dahin si sesuai ras jurusenna? Kegeluhen kalak e pe labo bagi si arapkenna. Cuba perdiateken pengalamen Niran arah Thailand nari. Kenca lulus ia arah universitas i Eropa, datna dahin si sesuai ras jurusenna. Bagenda nina, “Memang kenca lit titelku, banci kudat dahin si galang gajina. Tapi pendahin e pe erban reh buena keri waktuku ras gegehku. Bas pudi wari, perusahan inganku erdahin arus ikurangina mbue karyawan, aku pe ikut ipecat. Dungna kuteh maka la lit pendahin si banci erban masa depanta terjamin.”

Amin pe lit kalak si dungna bayak janah teridah ermeriah ukur, lit denga nge masalah keluarga kalak e ras masalah kesehatenna, janah kuatir ia nandangi situasi ekonomi si la pasti. Bagenda nina Katsutoshi arah Jepang nari, “Mbue nge senku, tapi tetap denga aku stres perban cian ate kalak aku ras la mehuli perbahanenna man bangku.” Sekalak diberu arah Vietnam si gelarna Lam ngataken, “Enterem kalak si rusaha kel gelah banci datna dahin si mejile, perban akap kalak e si e banci erban geluhna tenang ras ermeriah ukur. Tapi situhuna, reh kuatirna nge kalak e, lit ka erbage-bage masalah kesehatenna, ras depresi ka ia.”

Bali bagi Franklin ndai, enterem kalak si tehna maka lit si pentingen asangken ngayaki sekolah si meganjang ras kebayaken. Tapi lit ka si tek maka banci reh riahna ukurna adi reh ulina ia man kalak si deban. Jadi, payo kin si e banci erban masa depanna terjamin ras lalap ermeriah ukur? Jawapenna lit bas artikel berikutna.