Sentudu nge bukti arkeologi ras cataten Pustaka si Badia? Bas tahun 2014 sada topik i bas majalah Biblical Archaeology Review erban penungkunen enda, ”Asa kai buena tokoh i bas kitap Heber si terbukti secara arkeologi? Jabapenna, ”Si lang-langna lit 50 kalak!” Salah sada gelar si la ituriken i je eme Tattenai. Ise kin ia? Mari sinehen kai jabatenna bas cataten Pustaka.

Jerusalem pernah jadi bagin bas Kerajan Persia. Kota e lit bas ingan si igelari kalak Persia daerah i Lepar-Lau-Anak, eme sebelah barat Lau Eprat. Kenca naluken Babilon, kalak Persia mbebasken kalak Jahudi si itaban janah iperentahkenna kalak e guna majekken mulihi rumah pertoton Jahwe i Jerusalem. (Esra 1:1-4) Tapi, musuh kalak Jahudi ngambati dahin e alu nuduh kalak Jahudi mberontak man Persia. (Esra 4:4-16) I bas pemerentahen Darius I (522-486 SM), pejabat bas Kerajan Persia si gelarna Tattenai erbahan pemereksan kerna tuduhen e. Pustaka nggelari Tattenai ”gubernur Eprat Barat”.​—Esra 5:3-7.

Piga-piga batu si ertulisken huruf paku si nuratken gelar Tattenai lit denga asa gundari. Banci saja enda penadingen keluarga. Bas batu enda lit perjanjin penggalaren si iban tahun pe-20-ken bas pemerentahen Darius I, tahun 502 SM. Cataten enda mpebetehken kerna sekalak saksi bas perjanjin enda eme juak-juak ”Tattenai, gubernur i Lepar-Lau-Anak”. Gelar Tattenai e lit i bas Pustaka i kitap Esra.

Kai jabaten dilaki enda? Bas tahun 535 SM, ibagi Kores daerah kekuasanna jadi provinsi-provinsi, salah sadana igelari provinsi ”Babilon ras daerah i Lepar-Lau-Anak”. Kenca si e provinsi e terbagi jadi dua, salah sadana igelari daerah i Lepar-Lau-Anak. Si termasuk bas daerah e eme, Sele-Siria, Punike, Samaria, ras Juda si iperentah arah Damaskus nari. Tattenai jadi gubernur i daerah e mulai tahun 520 seh ku 502 SM.

Kenca Tattenai seh ku Jerusalem guna mereksa tuduhen kerna pemberontaken, ilaporkenna man Darius maka kalak Jahudi ndatken hak i bas Kores nari guna majekken mulihi rumah pertoton Jahwe. Kenca surat-surat kerajan ipereksa, terbukti maka e tuhu. (Esra 5: 6, 7, 11-13; 6:1-3) Emaka Tattenai iperentahken gelah ula ncampuri pendahin e, janah ipatuhina.​—Esra 6:6, 7, 13.

”Tattenai gubernur Eprat Barat”, labo mbelin kel pengaruhna i bas sejarah. Tapi, Pustaka nuriken gelarna bage pe jabatenna alu tepat. Arkeologi enda jadi bukti si debanna si ncidahken maka Pustaka sentudu ras sejarah.