Meter janah bagi lenggur sora perkiamna! Penjelasen kerna empat kuda si megegeh ras si ngersaksa e seh kel tangkasna, emaka bagi tempa-tempa siidah ndarat i bas Pustaka si Badia nari! Kuda si pemena mbentar rupana, si ngersaksa sekalak si mulia si mbaru itangkuhken jadi raja. Arah pudina reh kuda si megara, si ngersaksa muat perdamen i bas doni enda nari. Si peteluken e kuda si mbiring, si ngersaksa njemak sada timbangen. Asum si e, imomokenna berita ceda ate kerna reh serana muat pangan. Kuda si peempatken mbulan rupana, si ngersaksa igelari Kematen. Ibahanna terjadi pinakit ras kejadin-kejadin si maba kematen. Si ngikuti ipudina eme Kuburen. Melala kel jelma si mate!​—Ketangkasen 6:1-8.

”Mbiar kel aku sanga tangtangna kuoge kerna empat si ngersak kuda e. Nggo ndeher kel kuakap Wari Penghakimen e, pasti la aku selamat perban lenga aku ersikap.”​—Crystal.

”Meriah kuakap ngoge kerna empat si ngersak kuda si erbage-bage rupana e. Kenca kuteh kai ertina, dungna nggo jelas kuakap.”​—Ed.

Seri nge perasanndu ras Crystal? Ntah bagi perasan Ed? Nterem kalak meteh kisah kerna empat si ngersak kuda si lit i bas buku pendungi bas Pustaka eme Ketangkasen. Tehndu kin, alu ngangkai pengenehenen e banci erguna man bandu, tapi uga carana? Ijanjiken Dibata maka banci igejapkenndu keriahen ukur si tuhu-tuhu alu ngoge, mpelajari, janah nggeluh sentudu ras kai si itulisken bas buku nubuat e.​—Ketangkasen 1:1-3.

Aminna pe piga-piga kalak mbiar nandangi pengenehenen e, tapi enda iban labo gelah erban kam mbiar. Situhuna, erjuta kalak ipegegehi kinitekenna janah reh tekna nandangi arapen bas wari si pepagi erkiteken pengenehenen e. Kam pe banci nggejapken si e! Emaka ogendulah.