“I Ja Dage Dibata?”
“TERSUNGKUN-SUNGKUN AKU LALAP: I JA DAGE DIBATA?”—Paus Benediktus XVI, sanga reh ia ku penjara ntah pe kamp konsentrasi i Auschwitz, Polandia.
SANGA MBERAT KEL MASALAHNDU, BANCI SAJA TERSUNGKUN-SUNGKUN KAM, ‘I JA DAGE DIBATA NDAI?’ LIT NGE KEJADIN BAS GELUHNDU SI ERBAN KAM LANAI TEK IPERDIATEKEN DIBATA KAM?
Banci saja perasanndu seri ras Sheila si tading bas Amerika Serikat. Tutus kel ate keluargana erdibata. Nina Sheila, “Kitik-kitik nari tek aku man Dibata perban Ia si Nciptaken kita. Tapi, la kuakap aku ndeher ras Ia. Kuteh nge Dibata e lit, tapi labo kuakap aku iperdiatekenNa. Menurutku, labo ate Dibata segat aku tapi labo ka teNa keleng aku.” Kai si erban Sheila ragu? Nina Sheila, “Melala masalah si terjadi bas keluargaku, sada pe lenga dung nggo ka reh si deban janah kuakap labo kami isampati Dibata.”
Bagi Sheila, kam pe banci saja tek lit Dibata. Tapi la kam tek keleng teNa kam. Bas Pustaka, lit cerita kerna Jop kalak si bujur. Tek ia Dibata e erkuasa ras pentar, tapi ragu ia ntah labo keleng ate Dibata ia. (Jop 2:3; 9:4) La erngadi-ngadi masalah Jop, tempa la lit arapen. Emaka nungkun Jop man Dibata, “Engkai maka isilahkenNdu aku rusur? Kai sebapna maka musuhNdu akapNdu aku?”—Jop 13:24.
Tapi, kai nina Pustaka si Badia? Banci nge Dibata sisalahken adi lit masalah? Lit nge buktina keleng ate Dibata kerina jelma, termasuk kam? Kai nge buktina iperdiateken Dibata kita, iangkaiNa uga kita, gejapkenNa uga perasanta, janah sampatiNa kita?
Bas halamen seterusna, sipelajari kari uga cara Dibata nciptaken kita si mbuktiken keleng ateNa kita. (Roma 1:20) Kenca e, sipelajari ka ayat-ayat Pustaka si banci erban kita tek. Reh buena siteh kerna ciptan Dibata bage pe kerna KataNa, reh bagesna sitandai Ia, alu bage reh tekna kita, situhuna ‘iperdiatekenNa kap kita.’—1 Johanes 2:3; 1 Petrus 5:7.
