Hubungen saudara kembar eme salah sada hubungen si rembakna kel. * Kalak si kembar lit kontak batinna ras kembarenna. Lit kalak si kembar gelarna Nancy Segal, ia direktur bas Twin Studies Center. Ikatakenna kalak kembar e banci siangkan duana. Lit ka kalak si kembar ngataken, “Kai pe siteh kerna kembarenta e.”

Engkai maka banci bage? Kenca ipelajari, enda banci terjadi perban kalak e ras tading bage pe cara orang tua mpebelinsa. Tapi si erban kalak e tuhu-tuhu mirip perban gen kalak e mirip.

CUBA UKURI: La lit ise pe si tuhu-tuhu ngangkai kita selain Dibata. Nina Daud si nulisken buku Masmur, ‘IbentukNdu aku i bas bertin nandeku. Sanga tulan-tulanku ijadiken, alu megermet isusun i bas bertin nandeku. . . . Ope denga aku tubuh pe enggo aku itandaiNdu.’ (Masmur 139:13, 15, 16) Dibata ngenca si tuhu-tuhu meteh kai saja si nggo siadapi si mpengaruhi sipat-sipatta. Iteh Dibata kerinana kerna kita, termasuk kerna gen si lit bas kita. Emaka tek kita kai pe si lit bas kita itehNa termasuk si biasa-biasa saja pe siakap.

Ertoto Daud, ‘O Jahwe, nggo iujiNdu aku, janah itehNdu kerina kerna aku. Kerina si kubahan itehNdu, i dauh-dauh nari nggo itehNdu isi pusuhku. Ope denga pe aku ngerana, nggo leben itehNdu kai ateku kubelasken.’ (Masmur 139:1, 2, 4) Iteh Jahwe perasanta janah ‘itehNa kerina perukuren ras sura-surata.’ (1 Kronika 28:9; 1 Samuel 16:6, 7) Kai si banci sipelajari kerna Dibata arah ayat enda?

Banci iteh Dibata ukurta bage pe perasanta, la pe sikataken sanga kita ertoto. Labo perbahanenta saja si iteh Dibata, tapi itehNa ka ngkai maka silakoken e. Selain si e, itehNa ka silakoken ateta si mehuli, amin gia la kari kita ngasup ngelakokenca. Dibata kap si nciptaken pikiren ras pusuhta, emaka itehNa adi lit sura-surata si mehuli janah itehNa siusih ateta Ia.​—1 Johanes 4:7-10.

 Ayat Pustaka si erban kita tek

• “Mata Jahwe mperdiateken kalak si benar, janah cupingNa megiken pemindon kalak e.”​—1 PETRUS 3:12.

• Erjanji Dibata, “Aku nuduhken dalan si man dalanenndu, Kuajarken kam dingen mataKu tetap mperdiateken kam.”​—MASMUR 32:8.

Tuhu kin banci siadapi masalahta adi siteh iangkai Dibata keadan ras perasanta? Mari siperdiateken kai si terjadi man Anna, arah Nigeria. Nina, “Lanai kuakap lit ertina aku nggeluh ban buena masalahku. Lanai lit dilakiku janah aku ngenca si ngurus anakku si sakit hidrosepalus (galang takalna perban lit cairen bas otakna). Aku pe kena kanker payudara ka janah arus ioperasi, kemoterapi, ras radioterapi. Ceda kel ukurku sanga irawat aku i rumah sakit janah anakku pe sangana sakit.”

Kai si nampati Anna? “Kuukuri ayat-ayat Pustaka, misalna Pilipi 4:6, 7 si ngataken, ‘Kedamen i bas Dibata nari si banci naluken perukuren kai pe, ngarak-ngarak pusuh ras perukuren kena.’ Kuinget kenca ayat enda, kugejapken ndeher kel aku ras Jahwe, perban kuteh lebihen tandaiNa aku asangken diriku sendiri. Janah kugejapken kel penampat arah turang senina bas runggun.

“Memang gundari aku sakit denga, tapi keadanku ras anakku nggo reh ulina. Emaka sanga siadapi masalah ula min negatip perukurenta, perban lit kap Jahwe si nampati kita. Jakup 5:11 mpegegehi kita, ‘Kalak si megenggeng e sikataken me ia si ermeriah ukur. Enggo ibegi kena kerna Jop si megenggeng janah idah kena pasu-pasu si ibereken Jahwe man bana, alu bage iteh kena maka Jahwe dem kekelengen ras perkuah ate si lembut.’” Banci tuhu-tuhu iangkai Jahwe situasi Jop, emaka tek kita masalah kai pe si sangana siadapi pasti iangkai Jahwe.