Banci siangkai uga perasan kalak si deban. Banci sibayangken uga adi kita bas situasina e janah sigejapken uga perasanna. Ahli kesehaten mental, Dr. Rick Hanson ngataken maka kengasupen e lit bas kerina manusia.

CUBA UKURI: Engkai maka manusia ngenca si banci nggejapken uga perasan kalak si deban? Sebap ikataken Pustaka, manusia iciptaken Dibata mirip ras Ia. (Kejadin 1:26) Kai ertina? Mirip kita ras Dibata perban ngasup kita ngusih sipat-sipatNa. Emaka, sanga sisampati kalak perban mekuah ateta, situhuna siusih Dibata Jahwe, Dibata si perkuah ate.​—Kuan-kuanen 14:31.

Banci gejapken Dibata kesusahenta janah sedih kapNa sanga kita susah. Contohna, kesusahen si iadapi kalak Israel. Kalak enda jadi budak i Mesir janah 40 tahun dekahna kalak e la seh-seh ku tujunna. Kai si ilakoken Dibata? Nina Pustaka, ‘IselamatkenNa bangsa e i bas kerina kiniseranna nari.’ (Jesaya 63:8, 9) Emaka labo iteh Dibata ngenca kai si iadapi kalak Israel, tapi banci igejapkenNa kesusahen kalak e. Nina Dibata, ‘Ise si mekpek kam, anak mataKu kap si ipekpekna e.’ (Sakaria 2:8) Adi isakiti kalak kam, Dibata pe sakit kapNa.

Banci saja salah lalap siakap banta janah la siakap kita cocok ikelengi Dibata. Tapi nina Pustaka, “Belinen kap Dibata asangken pusuhta janah kai pe itehNa.” (1 Johanes 3:19, 20) Lebih itandai Dibata kita asangken dirita sendiri. Tuhu-tuhu tehNa keadanta, pikirenta, bage pe perasanta. IgejapkenNa kai si sangana sigejapken.

 Ayat Pustaka si erban kita tek

• ‘Adi ertoto kam, Kubegiken pertotondu, janah adi erlebuh kam, minter Kualoi.’​—JESAYA 58:9.

• ‘Aku ngenca meteh sura-suraKu nandangi kam, e me gelah kam senang labo gelah cilaka. RencanaKu eme mereken wari si pepagi bagi si iarapkenndu. I je erlebuh me kam ku Aku. Reh kam ndahi Aku dingen ertoto, janah Kualoi kam.’​—JEREMIA 29:11, 12.

• “IperdiatekenNdu iluhku mambur, ma e kerina enggo isuratken i bas kitapNdu?”​—MASMUR 56:9.

Tuhu kin banci siadapi masalahta, adi siteh igejapken Dibata kai si sangana sigejapken? Mari siperdiateken kai si iadapi Maria:

“Sedak kel kuakap sanga mate anakku. Dua tahun ia sakit kanker, mate ia sanga umurna 18 tahun denga. La kuakap adil geluh enda. Merawa aku man Jahwe, ngkai maka ipediatna anakku mate!

“Enem tahun kenca si e, cerita aku man teman si lit bas runggunku. Kuceritaken bana, kuakap labo keleng ate Jahwe aku. Piga-piga jam aku ngerana, tutus tena megikenca janah la ipotongna rananku e. Kenca e, ikatakenna sada ayat si kena kel ku pusuhku. Ayatna eme 1 Johanes 3:19, 20, si ngataken, ‘Belinen kap Dibata asangken pusuhta janah kai pe itehNa.’ Ikataken temanku e maka iteh Jahwe nge gulut ukurta.

“Enggo pe bage, merawa denga aku man Jahwe! Dungna kubaca Masmur 94:19, nina, ‘Sanga la tetap ukurku janah kuatir aku, Kam si ngapuli ras si periahken ateku.’ Pas kel ayat e bangku! Malem kel kuakap perban sanga lit masalahku banci kukataken man Jahwe. Tek aku pasti ibegikenNa janah iangkaiNa perasanku.”

Terpegegehi kel kita perban siteh iangkai Dibata perasanta! Tapi ngkai maka melala denga masalahta? Hukumen Dibata nge e perban lit salahta? Isasapken Dibata nge pagi kerina masalahta e? Jawapenna lit bas halamen seterusna.