Luar biasa kel cara Dibata nciptaken kita. Sanga kita luka, tersayat, ntah pe tergores, lit proses i bas dagingta si erban dareh lanai ndarat, kenca e bagin si tersayat pe ersada, janah dungna malem.

CUBA UKURI: Adi luka bas dagingta saja pe banci malem sendiri, la kin kapndu masuk akal luka bas pusuhta banci malem ban Dibata? Nina si nulisken buku Masmur, ‘Ipepalem Dibata kalak si getem pusuhna janah ibalutiNa ugahna.’ (Masmur 147:3) Tapi kai buktina banci ipepalem Jahwe luka bas pusuhndu gundari bage pe bas wari si pepagi?

Erjanji Dibata, “Ula mbiar, sebap Aku kap ras kam! Aku kap Dibatandu, emaka ula atendu aru. Kusampati kam.” (Jesaya 41:10) Adi siteh iperdiateken Jahwe kita, banci dame pikirenta janah reh ngasupna kita ngadapi erbage masalah. Ikataken Paulus maka ‘kedamen i bas Dibata nari banci naluken perukuren kai pe.’ Nina ka, “Ngasup aku ngadapi kai pe erkiteken gegeh si kualoken i bas Dibata nari.”​—Pilipi 4:4-7, 9, 13.

Ayat-ayat Pustaka banci erban kita reh tekna man janji-janji Jahwe kerna masa depan. Misalna, ikataken Ketangkasen 21:4, 5 kai si ilakoken Dibata pagi ras ngkai maka banci kita tek enda pasti terjadi:

• “Iapusi Dibata me kerina iluh” manusia. Kerina masalahta bage pe kerina si erban kita kuatir imasapken Jahwe me pagi, amin gia masalahta e biasa saja akap kalak.

• Jahwe, Raja si Erkuasa, si ‘kundul i bas tahtaNa’ i surga ngasup nampati kita bage pe nasapken kerina masalahta.

• Janji Jahwe e “tuhu janah terteki kap.” Gelar Jahwe si jadi jaminen maka janjiNa e pasti terjadi.

“‘Iapusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit. Sebap kai si terjadi mbarenda nggo lanai lit.’ Ngerana me Ia si kundul i bas tahta e, nina, ‘Nenlah! Kuban kerina jadi mbaru.’ Nina ka, ‘Tuliskenlah enda, sebap kata-kata enda tuhu janah terteki kap.’”​—Ketangkasen 21:4, 5.

Banci siteh sipat-sipat Bapakta si i surga arah ciptanNa bage pe arah Pustaka. Adi siidah ciptan Dibata merhat kita jadi temanNa. Tapi arah Pustaka, langsung kita iundang jadi teman Dibata. Nina, “Rembakkenlah diri kena ku Dibata, emaka irembakkenNa ka diriNa man kena.” (Jakup 4:8) Janah, nina Perbahanen Rasul-Rasul 17:27, “Ia labo ndauh i bas kita nari sekalak-sekalak.”

Reh buena pelajarindu kerna Dibata, reh tekna kam maka ‘iperdiatekenNa kam.’ (1 Petrus 5:7) Kai gunana tek man Jahwe?

Mari siperdiateken pengalamen Toru, Jepang nari. Amin gia mamakna rajin ku gereja, tapi ia jadi anggota Mafia Jepang eme yakuza. Nina Toru, “Tek aku pasti segat ate Dibata aku. Emaka adi lit keluarga ntah pe temanku mate, kuakap enda ukumen Dibata bangku.” Cara Toru rukur bage pe teman-temanna erban ia jadi “kalak si kejam janah la lit perkuah atena.” Kerna uga ia mbarenda, nina, “Gelah banci aku terkenal nggit aku munuh kalak si lebih terkenal asangken aku amin pe arus aku mate.”

Kenca Toru ras diberuna eme Hannah erlajar Pustaka, tuhu-tuhu robah kel Toru. Nina Hannah, “Jelas kel kuidah perubahen Toru.” Ikataken Toru uga perasanna, “Tuhu-tuhu iperdiateken Dibata kita sekalak-sekalak. La ateNa sekalak pe mate, nggit Ia ngampuni kalak si tuhu-tuhu robah. Janah kai pe si la mungkin siceritaken man kalak bage pe si la iangkai kalak, banci siceritaken man Dibata. Kentisik nari, isasapken Jahwe kerina masalah bage pe si erban kita susah. Gundari pe pasti kita isampatiNa, mon-mon alu cara si la sisangka-sangka.  Iperdiateken Dibata kita janah isampatiNa sanga kita lemah.”​—Masmur 136:23.

Siteh lanai ndekah isasapken Dibata kerina masalah janah lanai pagi lit si ngandung. Enda erban lit arapenta bas masa depan bage pe erban geluhta reh ulina gundari, bagi si igejapken Toru ndai. Amin pe kita nggeluh bas doni si melala masalah, banci terus sigejapken keleng ate Dibata.