‘Enggo ndekah aku erlebuh mindo penampat man baNdu Jahwe, tapi uga maka lalap la ibegikenNdu? Nderkuh aku man baNdu, tapi uga maka la ipulahiNdu kami i bas kejahaten kalak e nari? Asa kai kin dekahna aku arus erlebuh man baNdu?’ (Habakuk 1:2, 3) Enda kata-kata Habakuk, sekalak dilaki si ngena ate Dibata. Perban kurang nge kiniteken Habakuk maka bage ia ngerana? Labo bage! Ikataken Dibata man Habakuk, nggo kap banNa waktu guna nasapken kerina masalah.​—Habakuk 2:2, 3.

Sanga kam ntah pe keluarga ras temanndu susah, banci saja kurang ter kapndu Dibata ertindak, meletsa kapndu Ia. Tapi nina Pustaka, “Jahwe la melet i bas nepati janjiNa, bagi pengakap piga-piga kalak. Tapi sabar Ia man kena perban labo ateNa sekalak pe ikernepken tapi gelah kerina min ertobat.”​—2 Petrus 3:9.

Ntisik nari kel! Enggo ikataken Jesus lit me sada kelompok kalak si ngidah tanda-tanda “kedungen jaman enda.” (Matius 24:3-42) Tanda-tanda si ikataken Jesus e nggo terjadi bas jamanta. Enda buktina kentisik nari ertindak me Dibata. *

Uga cara Dibata nasapken kerina masalah? Sanga Jesus i doni icidahkenna kuasa Dibata alu ngatasi masalah manusia. Enda piga-piga contohna.

Bencana Alam: Sanga Jesus ras rasul-rasulna i datas perahu bas Lawit Galilea, ientamken angin si seh kel meterna perahu kalak e janah menam gedap. Ibuktiken Jesus lit kap kuasa Bapakna bage pe kuasana ngendaliken angin si seh kel terna. (Kolose 1:15, 16) Nina Jesus, “Sinikken! Tenanglah! Emaka ngadi angin e, janah kerinana nggo seh kel tenangna.”​—Markus 4:35-39.

Pinakit: Enterem kalak metehsa banci ipepalem Jesus pinakit. Misalna, kalak si pentang, si lumpuh, sawanen, sakit kusta, bage pe pinakit si debanna. ‘Ipepalemna kerina kalak si sakit.’​—Matius 4:23, 24; 8:16; 11:2-5.

Kurang Pangan: Banci ipebue Jesus pangan si sitik alu kuasa Bapakna. Bas Pustaka lit dua kali iceritaken kerna isikapken Jesus pangan man ribun kalak.​—Matius 14:14-21; 15:32-38.

Kematen: Lit telu kali iceritaken bas Pustaka kerna ipekeke Jesus kalak mate. Enda jadi bukti banci italuken Jahwe kematen. Kalak si nggo mate empat wari pe banci denga ipekeke Jesus.​—Markus 5:35-42; Lukas 7:11-16; Johanes 11:3-44.