Ise Dage si Salah?
Adi labo Dibata si erban manusia susah, ngkai maka melala kalak mesera, melala kalak mate perban kelihen, terjadi perang, bage pe bencana alam? Menurut Kata Dibata eme Pustaka, lit telu alasen utama ngkai manusia susah:
Kalak si Mentingken Bana, Merangap, ras Segat Atena Kalak si Deban. “Lit sekalak si erkuasa janah kalak si deban ngenanami kiniseran erkiteken kuasana.” (Pengerana 8:9) Manusia si mentingken bana, kejam, janah la sempurna banci erban kita susah.
Waktu ras Kejadin si La Isangka-sangka. Alasen si deban si erban manusia susah eme “waktu ras kejadin si la isangka-sangka.” (Pengerana 9:11, Terjemahan Dunia Baru) Misalna lit terjadi bencana janah rembang kita i je, kena me kita. Selain si e, banci jadi kalak nge si la hati-hati tapi kita si kena akibatna.
Doni Enda Ikuasai Iblis. Ijelasken bas Pustaka kai alasen utama manusia susah. Nina, “Kerina doni enda lit i bas kuasa si jahat.” (1 Johanes 5:19) “Si jahat” eme Setan si Iblis, tangtangna ia malekat Dibata tapi “la ia tetap i bas kebenaren.” (Johanes 8:44) Lit ka malekat-malekat si deban si ngikutken Setan ngelawan Dibata. Ikutken malekat-malekat e sura-surana si salah janah dungna kalak e jadi malekat-malekat jahat. (Kejadin 6:1-5) Je nari terus iusahaken Setan ras malekat-malekatna erban doni enda terus reh parahna. Terlebih ka bas jamanta enda. Seh kel ia rawana gundari emaka ‘itipuna kerina kalak si tading i doni,’ janah dungna “cilaka me doni.” (Ketangkasen 12:9, 12) Seh kel kejamna Setan e. Meriah kel kapna ngidah manusia susah. Emaka Setan me si erban manusia susah, labo Dibata.
CUBA UKURI: Kalak si la lit kekelengenna, perasanna, janah kalak si kejam me si meriah kapna ngidah kalak si la ersalah susah. Tapi nina Pustaka, “Dibata kekelengen kap.” (1 Johanes 4:8) “Nggit kin Dibata si Mada Kuasa mahan si salah? Tentu lang.” Dibata e perkeleng kap.—Jop 34:10, 11.
Tapi wajar adi tersungkun-sungkun kita, ‘Asa kai nari dekahna Setan ipediat Dibata erkuasa?’ Bagi si nggo sibahas, segat kel ate Dibata ngidah kalak jahat. Janah adi kita susah, Dibata pe ikut susah. Tapi nina Pustaka, “Benterkenlah kerina kekuatiren kena man Dibata, sebap iperdiatekenNa kap kena.” (1 Petrus 5:7) Keleng ate Dibata kita janah lit kuasaNa nasapken kerina masalahta ras kerina si la adil. Enda ijelasken bas halamen seterusna. *
^ par. 7 Adi atendu ndatken terbuen keterangen kerna engkai maka melala kel kesusahen, nen pelajaren 26 buku Ermeriah Ukur Seh Rasa Lalap! si iterbitken Saksi-Saksi Jahwe janah banci download-ndu bas www.pr418.com/btx.
Mungkin Menarik Ka Kapndu
SORA ERMOMO
Kentisik nari Bene me Kerina Masalah
Kai buktina isasapken Dibata me kentisik nari kerina masalah bage pe kerina si la adil?
