Pinakit—Ukumen arah Dibata nge?
LUZIA CACAT NAHENA. Sanga Luzia kitik denga, kena polio ia. Pinakit enda erban sistem sarafna ceda janah banci menular. Sanga umur Luzia 16 tahun, ikataken si ngurus ia man bana, “Tehndu ngkai kam cacat? Iukum Dibata kam, perban la begikenndu mamakndu.” Ndekah kel inget Luzia kata-kata enda janah sedak kel akapna.
DAMARIS KENA KANKER OTAK. Nina bapakna man bana, “Kai nge si lakokenndu maka kena kanker otak kam? Pasti nggo mbue dosandu, emaka ukum Dibata kam.” Getem kel pusuh Damaris megi kata-kata bapakna e.
Enggo ribun tahun nterem kalak tek maka manusia sakit perban iukum Dibata. Nina buku Manners and Customs of Bible Lands, melala kalak bas jaman Jesus tek maka “manusia sakit perban dosana ntah pe dosa keluargana, emaka iukum Dibata ia.” Ratusen tahun kenca jaman Jesus, lit sada buku eme Medieval Medicine and the Plague. Nina buku e, “Melala kalak si erpengakap Dibata ngukum kalak si erdosa alu pinakit.” Bas abad 14, lit jutan kalak si mate perban pinakit menular i Eropa. Ukumen Dibata nge e man kalak jahat? Ntah perban infeksi bakteri bagi hasil penelitian? Enterem kalak tersungkun-sungkun, tuhu kin manusia sakit perban iukum Dibata? *
CUBA UKURI: Adi kin pinakit ras bencana ukumen arah Dibata, ngkai maka ipepalem Jesus kalak sakit? Ma lanai cocok ras sipat Dibata si adil janah benar? (Matius 4:23, 24) La mungkin ilakoken Jesus perbahanen si ertentangen ras peraten Dibata. Nina Jesus, “Lalap kulakoken si ngena ateNa” janah “Kulakoken kai si iperentahken Bapak.”—Johanes 8:29; 14:31.
Jelas kel si ikataken Pustaka: Dibata Jahwe la pernah la adil. (Ulangen 32:4) Contohna, bayangken lit sekalak jelma si jahat bas pesawat. Mungkin nge kapndu iban Dibata pesawat e kecelakan janah mate ratusen kalak si la ersalah guna ngukum kalak jahat ndai? Nina sekalak umat Dibata si setia eme Abraham, la pernah ‘imasapken Dibata kalak benar radu ras kalak jahat.’ Enda la mungkin terjadi. (Kejadin 18:23, 25) Nina Pustaka ka, Dibata “la nggit ngelakoken si jahat,” Dibata la nggit “mahan si salah.”—Jop 34:10-12.
KAI NINA PUSTAKA SI BADIA
Sanga lit masalah labo enda perban ukum Dibata kita erkiteken dosata. Banci siteh enda arah kata-kata Jesus sanga ia ras murid-muridna ngidah sekalak dilaki si pentang lahirna nari. “Nungkun murid-muridna, ‘O Guru, dosa ise nge si erbanca ia pentang mulai lahirna nari? Dosana ntah dosa orang tuana?’ Ijawap Jesus, ‘Ia pentang labo perban dosana ntah pe dosa orang tuana.’” —Johanes 9:1-3.
Pasti sengget murid-murid Jesus sanga ibegina jawapen Jesus e. Kenca e, ipepalem Jesus me mata dilaki si pentang ndai. Alu bage ibuktiken Jesus me dilaki ndai pentang labo perban iukum Dibata. (Johanes 9:6, 7) Emaka gundari nggo siteh adi manusia sakit situhuna labo perban iukum Dibata. Tentu malem pusuhta meteh si e.
Adi manusia sakit perban iukum Dibata, ngkai ipepalem Jesus kalak sakit?
Ayat Pustaka si erban kita tek
‘Dibata la banci icubai, janah ise pe labo icubaiNa alu kai si jahat.’ (JAKUP 1:13) “Si jahat” maksudna eme masalah si nggo ndekah iadapi manusia, bagi pinakit ras kematen. Tapi kentisik nari imasapken Dibata me kerina.
‘Ipepalem Jesus Kristus kerina kalak sakit.’ (MATIUS 8:16) Sanga Jesus i doni ipepalemna kalak sakit. Enda ka me si ilakoken Kerajan Dibata pagi i belang-belang doni.
“Iapusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit. Sebap kai si terjadi mbarenda nggo lanai lit.”—KETANGKASEN 21:4.
ISE SI SALAH?
Adi bage, ngkai maka manusia sakit ras melala masalahna? Mbarenda nari nterem kalak tersungkun-sungkun kerna si e. Adi la Dibata si salah, ise dage? Jawapenna lit bas halamen seterusna.
^ par. 4 Mbarenda, memang iukum Dibata kalak si erdosa alu pinakit ntah pe bencana. Tapi menurut Pustaka, gundari lanai lakoken Jahwe bage.
