Adi sioge Pustaka si Badia bas kitap Kejadin, i je ituriken maka ngerana Dibata man manusia si pemena eme Adam, nina, ”Kerina buah batang kayu si lit i bas peken enda banci ipanndu, seakatan buah batang kayu si mereken pemeteh kerna si bujur ras si jahat. Buah batang kayu e la banci ipanndu; adi ipanndu, la banci lang mate kam i bas wari e.” (Kejadin 2:16, 17) Perentah si ibereken Dibata e jelas janah enda ncidahken maka adi patuh Adam, labo ia mate tapi banci terus nggeluh i bas peken Eden.

Tapi sayang kel, Adam la patuh man perentah Dibata janah panna buah si ilarang e, si ialokenna arah ndeharana Hawa. (Kejadin 3:1-6) Akibat arah kesalahenna e lit denga seh asa gundari. Rasul Paulus nuratken kerna si e, ”Dosa enggo ngkenai kerina manusia i bas doni enda arah sekalak manusia, janah dosana e maba kematen. Erkiteken si e kematen enggo ngelangketi kerina manusia, sabap tep-tep kalak enggo erdosa.” (Roma 5:12) Pasti ”sekalak manusia” e maksudna Adam. Tapi kai kin dosa e, janah ngkai e maba kematen?

Alu sengaja la ipatuhi Adam perentah Dibata, enda me dosa. (1 Johanes 3:4) Janah bagi si nggo ikataken Dibata, ulih dosa eme kematen. Adam bage pe kesusurenna la erdosa ras la  ngenanami kematen, adi tetap ia patuh man perentah Dibata. Itepa Dibata manusia labo gelah mate tapi guna nggeluh rasa lalap.

Bagi si ikataken Pustaka, kematen nggo ”ngelangketi kerina manusia”. Tapi, lit nge sada bagin bas dirinta si tetap nggeluh kenca kita mate? Nterem kalak ngatakenca lit, janah kalak e erpengakap bagin si tetap nggeluh e eme tendi. Adi payo kin bage, nggo erbual kap Dibata man Adam. Engkai maka bage? Adi tuhu kin lit denga bagin si tetap nggeluh bas ingan si deban kenca kita mate, enda ertina kematen labo ulih dosa, bagi si ikataken Dibata. Nina Pustaka, ”Tentu Dibata labo erbual.” (Heber 6:18) Situhuna, Setan nge si erbual paksa katakenna man Hawa, ”Labo kam mate.”—Kejadin 3:4.

Emaka turah penungkunen, adi labo tuhu ajaren kerna tendi si la banci mate e, uga dage situhuna keadan kalak mate?

Turi-turin kerna tinepa i bas kitap Kejadin ngataken, ”Ibuat [Jahwe] Dibata sitik abu taneh ijadikenNa jelma; iembuskenNa kesah kegeluhen ku bas igungna, e maka mulai me jelma ndai nggeluh.” Kata ”jelma ndai nggeluh” i bas cakap Heber eme ne’phesh, si ertina ”si erkesah”.—Kejadin 2:7.

Janah ituriken bas Pustaka maka labo lit ibereken tendi si la banci mate man manusia. Tapi tiap kalak eme ’jelma si nggeluh’. La pernah ituriken bas Pustaka kerna ”tendi si la banci mate”, banci ibuktikenndu arah Pustakandu.

La pernah iajarken bas Pustaka maka lit tendi si la erkematen bas manusia, tapi ngkai maka melala ajaren agama la sentudu ras Pustaka? Guna meteh jabapna, sinen mulihi kai si terjadi bas jaman kalak Mesir si mbarenda.

Sekalak sejarawan Junani bas abad pelimaken SM eme Herodotus, ikatakenna maka ”si tangtangna kel tek nandangi tendi si la banci mate eme kalak Mesir”. Kalak Babilon pe tek kerna tendi si la erkematen e. Paksa italuken Aleksander Agung daerah Timur Tengah bas tahun 332 SM, ajaren si lepak e nggo mbar ku Kerajan Junani.

Bas abad pemena M, dua agama Jahudi si mbuena pengikutna eme sekte Eseni ras Parisi, iajarkenna maka lit tendi si tetap nggeluh kenca kulanta mate. Nina The Jewish Encyclopedia, ”Tek kalak Jahudi kerna tendi si la banci mate perban pengaruh ajaren kalak Junani terlebih ajaren Plato.” Bage pe sekalak ahli sejarah Jahudi eme Josephus, la ia tek nandangi Pustaka, tapi tek ia man ”ajaren kalak Junani”, janah itamakenna ajaren e ku bas turi-turin si itulisna.

Ajaren e terus reh belangna janah kalak si ngaku Kristen pe ialokenna ajaren e. Menurut ahli sejarah, Jona Lendering, ”Ikataken bas Ajaren Plato maka gundari kita nggeluh bas doni si dem perbeben, tapi tendinta banci nggeluh bas ingan si terulin, emaka menukah kel mpersada ajaren Plato enda ras ajaren Kristen.” Enda me si erban ajaren kerna tendi si la banci mate e jadi sada kiniteken bas gereja-gereja ”Kristen”.

Bas abad si pemena, ibereken rasul Paulus persinget enda, ”Tangkas ikataken kesah Dibata maka lit pagin piga-piga kalak si lanai tek man Jesus Kristus. Patuh ia man kesah-kesah si erbual janah iikutkenna pengajaren setan-setan.” (1 Timotius 4:1) Kai si ikatakenna payo kel! Ajaren kerna tendi si la banci mate eme salah sada ”pengajaren setan-setan”. Ajaren e la erpalasken Pustaka janah rehna i bas ajaren si lepak ras agama palsu nari.

Meriah kel ukurta erkiteken sieteh kata-kata Jesus enda, ”Itandaindu me Dibata si tuhu-tuhu, janah Ia jine si mbebasken kam.” (Johanes 8:32) Alu ndatken pemeteh si benar arah Pustaka, kita ibebasken i bas ajaren ras perbahanen si la nghamati Dibata, si lit bas erbage agama i doni enda. Janah, kebenaren i bas Kata Dibata mbebasken kita arah tradisi si salah bage pe guak kerna kematen.—Nehen kotak ” Ku ja Perlawesna Kalak Mate?”

Sura-sura Dibata, labo gelah 70 ntah pe 80 tahun saja manusia nggeluh i doni, kenca si e lawes ku surga ntah pe nggeluh bas alam roh. Sura-sura Dibata eme gelah manusia si patuh nggeluh rasa lalap i doni. Enda me bukti kekelengen Dibata man manusia, janah la lit si banci ngolangi Ia mpeseh sura-suraNa e. (Maleaki 3:6) Meriah kel ukurta erkiteken sieteh ayat si ngataken, ”Kalak bujur me si ndatken bagin taneh i bas negeri e, janah ringan ia i je rasa lalap.”—Masmur 37:29.