Pardis i Doni —Tuhu-Tuhu Lit ntah Hayalen saja?
Pardis! Kai nge ertina e? Eme sada ingan si mejile. Lit brosur si nawarken ingan si tempa-tempa bagi ”pardis” janah ingan e iban jadi sada tujun gawah-gawah guna erban tenang janah meneken stres. Tapi situhuna paksa mulih kita ku rumah, tetap nge lit perbebenta.
Nterem kalak si merhat kel meteh uga kin pardis e. Emaka turah penungkunen, ’Tuhu nge lit ”Pardis” e? Adi la lit, ngkai maka merhat kel kalak meteh kerna si e? Ntah memang tuhu kin lit?’
CERITA-CERITA KERNA PARDIS
Erabad-abad dekahna, merhat kel kalak megiken cerita kerna pardis. Mbue kalak ietehna kerna si e arah Pustaka si Badia nari, maka Pardis e lit i ”arah timur”. Kai si erban cerita kerna pardis menarik? Ikataken Pustaka si Badia, ”IjadikenNa erbage-bage batang kayu si mehuli turah i je janah buahna pe mehuli.” Seh kel jilena peken e janah meriah tading i je. Si menarikna arah kerinana eme ’lit turah sada batang kayu si mereken kegeluhen i tengah-tengah peken e’.
Selain si e, ituriken ka bas buku Kejadin e, maka lit empat lau maler i peken e. Dua arah lau maler e lit denga gundari eme—Tigris (Hiddekel) ras Eprat. (Kejadin 2:10-14) Lau e maler ku Teluk Persia, adi gundari eme Irak, si mbarenda jadi bagin arah Persia Kuno.
Emaka la ateta mamang adi kalak Persia enda ietehna kel alu tangkas kerna Pardis i doni. Lit sada karpet si iban i bas abad 16, si gundari isusun bas Museum i Philadelphia, Pennsylvania, AS. Gambar si lit bas karpet e eme peken si erpagar janah lit i je batang kayu bage pe bunga. Kata ”peken si erpagar” i bas cakap Persia banci ka ngertiken ”pardis”, janah gambar si lit bas karpet e nuriken kerna peken eden si seh kel jilena si ituriken bas Pustaka.
Situhuna, cerita kerna pardis e lit i bas erbage-bage cakap ras budaya i sebelang doni. Asum manusia lawes ku erbage-bage ingan bas doni, ibabana cerita kerna pardis janah iturikenna erpalasken kiniteken ras budayana, janah nggo jadi sada turi-turin. Gundari pe, adi iidah kalak ingan si seh kel jilena mis ikatakenna ingan e bagi pardis.
NDARAMI PARDIS
Piga-piga petualang iakuina maka nggo ietehna i ja Pardis si pernah lit e. Contohna, bas tahun 1881 lit sekalak Jendral bas Inggris nari eme Charles Gordon, reh ia ku sada ingan si seh kel jilena, gelar ingan e eme Vallée de Mai i Seychelles, janah gundari lit bas Situs Warisan Dunia. Iakapna ingan e eme peken eden. Bas abad 15, lit petualang si deban arah Italia nari si gelarna Christopher Columbus, ikatakenna maka menam idatna peken eden e paksa ngadi ia i pulo si lit i Hispaniola, gundari eme Republik Dominika ras Haiti.
Mapping Paradise, eme buku sejarah, si isina lebih 190 peta kuno, janah i bas lit gambar Adam ras Hawa paksa i peken Eden. Lit salah sada peta si beda ras peta si deban si ibuat arah cataten Beatus of Liébana bas abad 13. I je lit gambar kotak si kitik janah i tengah-tengahna lit gambar Pardis. I bas tiap suki kotak e lit gelar empat lau maler eme ”Tigris”, ”Eprat”, ”Pisun”, ras ”Gihon”, si nggambarken uga agama Kristen mbar ku empat tampuk doni. Enda buktina maka amin gia lanai sieteh i ja pardis e, tetap denga si-inget ras sidarami.
Bas abad 17, lit sekalak penulis arah Inggris nari gelarna John Milton, terberita ia erkiteken puisina si erjudul Paradise Lost (Pardis si Bene), puisi e erpalasken kitap Kejadin kerna Adam si erdosa janah ipelawes arah Eden. I bas bukuna e iturikenna alu tangkas maka janji kerna kegeluhen si rasa lalap i doni pasti terjadi, i je ikatakenna, ”Kenca si e, kerina doni jadi pardis.” Kenca si e, ilanjutken Milton nulis bukuna si erjudul Paradise Regained (Pardis si Idatken Mulihi).
LANAI NDARAMI PARDIS
Jelas me, enda mbuktiken maka mbarenda nari nterem kalak ngukuri kerna pardis. Tapi, ngkai maka lanai kalak ermediate kerna si e? Perban bagi si ikataken buku Mapping Paradise, ”Lanai nggit ahli agama mbahas kerna pardis si nggo bene e.”
Kalak si reh ku gereja iajarken maka kalak e pagi lawes ku surga labo ku pardis i doni. Tapi ikataken bas Pustaka i Masmur 37:29, ”Kalak bujur me si ndatken bagin taneh i bas negeri e, janah ringan ia i je rasa lalap.” Adi siidah keadan si gundari beda kel ras pardis si mbarenda, tapi ngkai kita tek maka pardis e pasti jadi pagi? *
PARDIS I SEBELANG DONI TUHU-TUHU LIT
Erjanji Dibata Jahwe guna manteki mulihi pardis si nggo pernah ibanNa. Uga carana? Ingetndu nge toto si niajarken Jesus, ”Reh min KinirajanNdu; sehlah min peratenNdu, i bas doni enda bagi ni surga.” (Matius 6:10) Si jadi Raja bas Kinirajan e eme Jesus Kristus janah ia me si erkuasa i sebelang doni guna nggantiken kerina pemerentahen manusia. (Daniel 2:44) Erkelangken Kinirajan enda me sura-sura Dibata kerna pardis i doni terjadi.
Enggo inubuatken arah nabi Jesaya kerna uga pagi keadan pardis paksa kerina si erban masalah ras kearunate si lit gundari imasapken. (Jesaya 11:6-9; 35:5-7; 65:21-23) Emaka banlah waktundu ngoge kerna si e bas Pustakandu. Adi ilakokenndu, banci kam tek maka Dibata pasti mereken si mehuli man kalak si patuh. Kerina si tading i pardis pagi banci ngenanami kai si nggo bene ban Adam, eme keadan si mehuli bage pe rembak ras Dibata.
Engkai kita banci tek maka pardis i doni labo sada hayalen tapi tuhu-tuhu lit? Perban ikataken Pustaka man banta, ”[Jahwe] kap empuna surga, doni iberekenNa man manusia.” Arapen kerna Pardis i doni pasti jadi perban ”Dibata labo erbual”. (Masmur 115:16; Titus 1:2) Pustaka nuriken kesempaten si luar biasa eme kegeluhen si rasa lalap i bas Pardis!
^ par. 15 Bas Al-Quran pe isuratken kerna si e, i surat peduapuluhsadaken Al Anbiyaa’ (Nabi-Nabi), juz (ayat) 105, nina, ”Situhuna doni (taneh) enda kubereken man juak-juakku si bujur.”