Ituriken bas Pustaka si Badia maka guna mpeseh peraten Dibata, malekat-malekat pe ikut ngkawali umat Dibata. (Masmur 34:8) Contohna:

• Paksa ikernepken Jahwe ateNa Sodom ras Gomora, ingan si dem kejahaten, isampati malekat si Lut bage pe keluargana guna kiam.​—Kejadin 19:1, 15-26.

• Bas Babilon kuno pe, paksa iukum mate telu anak perana Heber ku bas api si gurlah, ”isuruh [Dibata] malekatNa engkelini” kalak e.​—Daniel 3:19-28.

• Kenca gedang-gedang berngi Daniel lit bas lubang singa si kelihen, ikatakenna maka selamat ia erkiteken ”Dibata nuruh malekatNa nutupi babah singa-singa e”.​—Daniel 6:16, 22.

Maun-maun, isampati malekat Dibata pendahin runggun Kristen abad pemena adi e guna mpeseh peraten Jahwe. Contohna:

• Ibuka sada malekat pintun penjara janah isuruhna rasul-rasul si ipenjara e gelah terus erberita i rumah pertoton.​—Perbahanen Rasul-Rasul 5:17-21.

• Isuruh sada malekat sekalak penginjil eme Pilipus gelah lawes ku dalan si melungun si lit bas dalan Jerusalem ku Gasa ras erberita man kalak Etiopia si mulih eribadat i Jerusalem nari.​—Perbahanen Rasul-Rasul 8:26-33.

• Guna mpeseh peraten Dibata gelah si labo Jahudi pe jadi kalak Kristen, icidahken malekat sada pengenehenen man komendan tentera Romawi si gelarna Kornelius janah isuruh malekat e ia gelah idilona rasul Petrus ku rumahna.​—Perbahanen Rasul-Rasul 10:3-5.

• Paksa rasul Petrus bas penjara, reh malekat ndahi ia janah ibabana Petrus ndarat bas penjara nari.​—Perbahanen Rasul-Rasul 12:1-11.

La lit bukti maka gundari ipake Dibata malekat guna nampati kalak alu mukjizat bagi si ituriken  bas Pustaka. Tapi, kerna jamanta gundari, nina Jesus, ”Janah kenca berita si meriah kerna Kinirajan e iberitaken man manusia i belang-belang doni enda, jadi saksi man kerina bangsa, kenca bage maka seh me kedungenna e.” (Matius 24:14) Tek nge kam maka pendahin si ilakoken ajar-ajar Jesus e isampati malekat-malekat?

Ituriken bas buku Ketangkasen maka mejingkat kel malekat-malekat e nampati manusia i sebelang doni guna erlajar kerna Dibata Jahwe ras gelah seh peraten Dibata nandangi manusia. Isuratken rasul Johanes, ”Jenari kuidah sada malekat si deban kabang meganjang i awang-awang. Ibabana berita si meriah si la ermasap-masap guna iberitaken man manusia i doni enda, man kerina bangsa, suku, cakap ras negara. Alu sora megang nina malekat e, ’Erkemalangenlah man Dibata janah pujilah Ia. Sabap enggo seh paksana Dibata ngadili manusia. Sembahlah Ia si njadiken langit, doni, lawit ras kerina ulu lau!’” (Ketangkasen 14:6, 7) Gundari, melala pengalamen si mbuktiken maka pendahin erberita si meriah i sebelang doni isampati malekat-malekat. Janah, paksa sekalak perdosa mulihken ku Jahwe, ”malekat-malekat ermeriah ukur”.​—Lukas 15:10.

Kai pagi si terjadi paksa pendahin erberita e nggo dung? Kenca si e malekat ”tentera-tentera surga” nampati Jesus, selaku Raja i bas kerina Raja i bas perang ”wari Dibata Si Mada Kuasa” bas Harmagedon. (Ketangkasen 16:14-16; 19:14-16) Malekat-malekat si megegeh e radu ras Tuan Jesus ”ngukum kalak . . . si la patuh nandangi berita si meriah kerna Tuhanta Jesus”.​—2 Tesalonika 1:7, 8.

Teklah maka lit malekat-malekat si mperdiateken kam. Mediate kel malekat-malekat e man kalak si nembah Dibata, janah Jahwe pe terus ipakeNa malekat-malekat e guna mpegegehi ras ngkawali kalak si setia man baNa si lit i doni.​—Heber 1:14.

Kita sekalak-sekalak arus erban pilihen si penting. Nggit nge kita megiken ras ndalanken berita si meriah si paksana iberitaken i sebelang doni? Meriah ukur Saksi-Saksi Jahwe i bas inganndu tading guna nampati kam ndatken manfaat arah penampat Dibata erkelangken malekat-malekatNa si megegeh.