Paksa Jesus i darat perbatasen Israel bas provinsi Siria i Roma, lit sekalak diberu kalak Junani ndahi ia ras mindo penampatna. Ialoi Jesus diberu e alu nuriken sada anding-andingen, i ja iandingkenna kalak si la Jahudi ras ”biang”. I bas Undang-Undang Musa, biang ianggap binatang si la bersih. (Imamat 11:27) Tapi nokoh nge maksud Jesus man sekalak diberu Junani e bage pe man kalak si labo Jahudi?

Labo bage. Si imaksud Jesus paksa si e eme guna nuriken man ajar-ajarna, maka si perlebe isampatina eme kalak Jahudi. Emaka ibanna anding-andingen kerna si e paksa ngerana man sekalak diberu Junani e, nina, ”La patut ibuat nakan anak-anak jenari ibereken man biang.” (Matius 15:21-26; Markus 7:26) Man kalak Junani ras Roma biang eme binatang kesayangen si rusur main-main ras anak-anak i rumah. Emaka paksa ibelasken Jesus kata ”biang”, enda ibelaskenna alu cara si mehuli ras mehamat. Ialoi diberu e Jesus, nina, ”Tuhu Tuhan, tapi biang pe man rimah-rimah si ndabuh i bas meja tuanna nari.” Ipujiken Jesus kiniteken diberu e janah ipepalemna anakna.​—Matius 15:27, 28.

Kapal si maba Paulus ku Italia arus erjuang ngadapi angin si meter. Sedekah i pelabuhen, ibereken rasul persinget gelah ula iterusken pelayaren e. (Perbahanen Rasul-Rasul 27:9-12) Engkai maka bage nina Paulus?

Ieteh Pelaut si mbarenda alu tangkas maka bahaya kel keadan bas Lawit Tengah bas musim perudan. Bas pertengahen bulan November seh ku pertengahen bulan Maret, kerina pelayaren itutup. Tapi pelayaren si imaksud Paulus i jenda terjadi bas bulan September ntah pe Oktober. Bas buku Epitome of Military Science, si itulis Vegetius, sekalak penulis Roma nari (abad peempatken M), nuriken pemeteh kerna lawit, nina, ”Piga-piga bulan mejile guna erlayar, piga-piga bulan la pasti, ras piga-piga bulan la banci.” Ikataken Vegetius maka bulan si aman erlayar eme kelang-kelang 27 Mei seh ku 14 September, tapi lit bulan si la pasti ntah pe erbahaya eme bas 15 September nari seh ku 11 November ras arah 11 Maret seh ku 26 Mei. Perban nggo biasa Paulus erlayar, pasti tehna kerna si e. Kapten ras si mpuna kapal pe ietehna nge kerna si e, tapi la ibegikenna persinget Paulus. Dungna arus ngadi pelayaren e perban ceda kapal e.​—Perbahanen Rasul-Rasul 27:13-44.