Seri bagi Dibata, malekat pe la banci siidah perban ”labo lit daging ras tulanna”. Malekat si setia tading i surga janah rembak ras Dibata.​—Lukas 24:39; Matius 18:10; Johanes 4:24.

Malekat banci ipakena tempas manusia guna ndalanken tugas arah Dibata i doni janah kenca dung tugasna e mis ia bene.​—Hakim-Hakim 6:11-23; 13:15-20.

Amin gia malekat rusuren igambarken bagi sekalak dilaki, tapi situhuna kalak enda labo dilaki ntah pe diberu erkiteken la lit perbedan bas kalak e. La ia erjabu janah la mupus. Janah malekat la bagi jelma si nggeluh i doni, si arus jadi bayi lebe, kenca e reh galangna. Jahwe si erban lit malekat-malekat e, janah ikataken bas Pustaka kalak e cinder i lebe-lebe [Jahwe].​—Jop 1:6; Masmur 148:2, 5.

Ituriken bas Pustaka maka lit ’cakap manusia ras cakap malekat’, enda mbuktiken maka kalak e lit cakapna ras banci ngerana. Maun-maun ipake Dibata malekat e guna ngerana ras manusia, tapi la ibereNa kita nembah ntah pe ertoto man malekat.​—1 Korinti 13:1; Ketangkasen 22:8, 9.

Lit meribu-ribu dingen erjuta-juta buena malekat-malekat e.​—Ketangkasen 5:11.

Malekat-malekat e ”mbisa”, ndauh gegehen asangken manusia ras kepentarenna pe ngelebihi manusia. Banci ia lawes ku sada ingan alu seh kel terna, la terbayangken kita uga terna.​—Masmur 103:20; Daniel 9:20-23.

Amin pe pentar ras megegeh kel ia, tapi lit si la banci ilakoken malekat-malekat e janah labo kerina ietehna.​—Matius 24:36; 1 Petrus 1:12.

Tiap malekat itepa alu cara mehuli rikutken sifat-sifat si mejile janah bebas erban pilihen. Seri bagi manusia kalak e banci erban pilihen kerna si benar ras si salah. Tapi, lit piga-piga malekat si ngelawan Dibata.​—Judas 6.