Aku tubuh i kuta Sachsen, si lit bas Repulik Demokratik Jerman (RDJ). Aku tading ras keluarga si dem alu kekelengen janah iajarken orang tuangku lagu langkah si mehuli man bangku. Si erkuasa bas daerah RDJ eme partai Komunis, emaka agama labo penting man kalak si tading i Sachsen. Aku pe labo tek Dibata e lit. Paksa umurku 18 tahun kuikutken dua ajaren, eme ajaren Ateis ras Komunis.

Engkai maka aku nggit ngikutken ajaren Komunis? Perban i je kuidah seri perbahanenna man kerina kalak. Selain si e tek aku, adi nggit kita mere si lit bas kita man kalak si deban lanai bo lit perbedan kalak bayak ras kalak si mesera. Emaka kututusi bas organisasi anak muda Komunis. Paksa umurku 14 tahun, erdahin aku i bas proyek si ermediate man lingkungen guna ndaur ulang kertas bekas. Iergai pemerentah bas kota Aue pendahinku si mehuli e janah iberena aku hadiah. Paksa nguda denga aku nggo kutandai piga-piga pejabat politik i RDJ. Kuakap nggo kudat sura-surangku ras enda erban masa depanku terjamin.

Tapi bas sada paksa kegeluhenku berubah. Bas tahun 1989 tembok Berlin iruntuhken ras partai Komunis ilarang i bagin Timur Eropa. Kerina kalak sengget. La ndekah kenca si e kuidah perbahanen si la adil terjadi i RDJ. Contohna, lebih ipentingken negara warga si ndukung partai Komunis asangken si lang. Engkai maka si e banci terjadi? Lanai nge seri ianggap partai Komunis kerina kalak? Tuhu nge ajaren Komunis e? Latih kel kuakap ngukurisa.

Dungna kupelajari musik ras seni. Paksa erlajar aku i bas sekolah musik janah pindah ku universitas, jadi artis musik ateku. Kenca si e nggo kutadingken lagu langkahku si mehuli si kupelajari kitik-kitik nari. Gundari si pentingna bas aku eme meriah-riah ras ngerondong-ngerondong. Tapi musik, seni, ras lagu langkahku si bebas labo meneken kebiarenku. Enda pe teridah arah lukisen si kugambar. Kai nge masa depanku? Kai nge tujun geluhku?

Bas sada paksa kueteh i ja banci kudat jabapna, amin pe paksa si e mamang denga ateku. Bas sada berngi i sekolah  pelatihen, ikut aku ras sada kelompok murid si mbahas kerna masa depan. Lit sekalak Saksi-Saksi Jahwe i je, gelarna Mandy. * Iturikenna man bangku dalan si benar. Nina man bangku, ”O Andreas, adi nggit kam ndatken jabapen arah penungkunenndu kerna kegeluhen ras masa depan, pelajarilah Pustaka si Badia.”

Amin pe labo aku teksa, tapi merhat aku metehsa. Ituduhken Mandy man bangku Daniel bindu 2, dung kuoge ayat e meriah kel ukurku. I je ituriken nubuat kerna piga-piga negara si ngkuasai doni, janah pemerentahen e mbelin kel pengaruhna terus ku jamanta. Ituriken Mandy ka nubuat si deban bas Pustaka kerna masa depan. Dungna kudat jabapen arah penungkunen-penungkunenku! Tapi ise kin si nulis nubuat e, janah ise si banci nuriken masa depan alu bage tangkasna? Tuhu nge e rehna arah Dibata?

Ipetandaken Mandy aku man Horst ras Angelika. Kalak enda Saksi Jahwe si nggo erjabu si nampati aku mpelajari terbuen kerna Kata Dibata. Mis kueteh maka Saksi-Saksi Jahwe ngenca organisasi agama si make ras ngergai gelar Dibata eme Jahwe. (Masmur 83:19; Matius 6:9) Kupelajari kerna arapen si ibereken Dibata Jahwe man manusia guna nggeluh i bas Pardis i doni. Bagi ituriken bas Masmur 37:9, ”Si ngarap man [Jahwe] ndatken taneh tading-tadingen.” Teriahken kel aku perban arapen enda ibereken man kerina jelma si nggit nggeluh sentudu ras peraten Dibata si tersurat i bas Pustaka.

Amin gia bage, arus aku terus erjuang gelah nggeluh sentudu ras Pustaka. Perban sukses aku jadi artis musik dungna meganjang ukurku, emaka perlu kel aku erlajar gelah meteruk rukur. Mesera kuakap nadingken lagu langkahku si la mehuli. Tapi bujur kel ningku man Dibata Jahwe perban sabar, perkeleng, ras mediate kel Ia man kerina kalak si erjuang gelah nggeluh sentudu ras kai si iajarken Pustaka!

Paksa umur 18 tahun kuikutken ajaren Komunis ras ateis (kalak si la tek man Dibata), tapi gundari Pustaka nggo ngobah kegeluhenku. Kai si kupelajari erban aku lanai mbiar nandangi wari si pepagi ras mereken aku tujun nggeluh. Aku iperidiken jadi Saksi-Saksi Jahwe bas tahun 1993, janah bas tahun 2000, erjabu aku ras Tabitha, sekalak perberita si semangat. Rusur kami erberita nampati kalak si deban ngangkai Pustaka. Nterem kalak si ijumpai kami seri kegeluhenna ras aku si mbarenda, si ngikutken ajaren Komunis ras ateis. Meriah kel ukurku sanga nampati kalak nandai Dibata Jahwe.

Sengget kel orangtuangku paksa ietehna sura-surangku jadi Saksi-Saksi Jahwe. Tapi dungna idah kalak e perubahen si mehuli i bas kegeluhenku kenca erteman ras Saksi-Saksi. Meriah kel ukurku perban dungna kalak e pe nggit ngoge Pustaka ras reh ku perpulungen Kristen Saksi-Saksi Jahwe.

Perjabunku ras Tabitha ermeriah ukur perban idalanken kami pedah Pustaka bas perjabun kami. Alu ndalanken pedah-pedah e, perjabun kami terus ipegegehi.​—Heber 13:4.

Lanai aku mbiar ndalani kegeluhen enda bage pe kerna wari si pepagi. Meriah kel ukurku perban banci jadi bagin arah perkade-kaden sebelang doni si ersada ras erdame. I bas perkade-kaden e, seri kerina perbahanenna man si deban. Enda me dalanna aku erkiniteken janah kucikep e alu paguh.