Labo lit sekalak pe si mpuna gambar Jesus. Labo pernah iban Jesus gambarna ntah pe patungna. Tapi erabad-abad dekahna melala seniman-seniman erban gambar ras patung Jesus.

Pasti labo ieteh seniman-seniman e uga kin situhuna Jesus e. Gambaren si iban seniman-seniman e kerna Jesus ipengaruhi budaya, agama, bage pe sura-sura kalak si mesansa. Gambaren si iban kalak e mereken pengaruh si la jelas nandangi pendapat kalak kerna Jesus bage pe pengajarenna.

Piga-piga seniman nggambarken Jesus bagi sekalak si lemas ras bukna gedang, jenggotna tipis, janah ayona sayu. Si deban nggambarken Jesus bagi sekalak mahluk roh ras lit cahaya i babo takalna bagi mahkota, janah ia la rembak ras kalak si lit i deherna. Payo nge gambaren si iban kalak e kerna Jesus? Uga caranta metehsa? Salah sada carana eme alu mereksa kai si tersurat i bas Pustaka si banci nampati kita ngangkai uga kin ia situhuna. Alu bage banci sidat pemeteh si benar kerna Jesus.

Kata-kata enda banci saja ibelasken Jesus bas totona sanga ia iperidiken. (Heber 10:5; Matius 3:13-17) Uga nge rupa Jesus? Kira-kira 30 tahun ope si e, ikataken malekat Gabriel man Maria, ”Mehuli pagi kulandu janah ipupusndu sada anak dilaki, . . . Anak Dibata.” (Lukas 1:31, 35) Emaka Jesus pasti manusia si sempurna seri bagi Adam si iciptaken Dibata. (Lukas 3:38; 1 Korinti 15:45) Pasti daging Jesus mejile janah banci jadi rupana seri bagi kalak Jahudi, bagi Maria nandena.

Jesus pe pasti lit jenggotna bagi kebiasan kalak Jahudi. Janah enda me si mbedaken kalak Jahudi ras kalak Roma. Paksa si e, erjenggot ianggap sada hal si metunggung ras iergai, tapi labo jenggot si gedangsa ras la terurus. Jesus pe pasti bage, pasti ipangkasna nge jenggot ras bukna gelah tetap teridah metunggung. Kalak si ipilih jadi Nasir ngenca si la banci ipangkasna bukna, contohna Simson.​—Bilangen 6:5; Hakim-Hakim 13:5.

Seh ngasa umur 30 tahun Jesus erdahin jadi tukang kayu, bas jaman si lenga lit alat-alat si canggih bagi si gundari. (Markus 6:3) Emaka pasti megegeh dagingna. I bas pemena pelayanenna, ibanna sada cambuk bas nali nari janah ”alu e iligasina gelah ndarat asuh-asuhen e kerina i bas Rumah Pertoton nari: subuk lembu, biri-biri. Itunggalingkenna meja-meja kalak si nukari duit, seh maka merap duitna e kerina”. (Johanes 2:14-17) Pasti kalak si megegeh maka banci ngelakoken si e. Ipake Jesus kula si ibereken man bana guna ndalanken kai si iperentahken Dibata, nina, ”Berita si Meriah kerna Kinirajan Dibata arus kupeseh ku kuta-kuta si deban, sabap guna ngelakoken si e me kap aku isuruh Dibata.” (Lukas 4:43) Perban megegeh nge ia maka ngasup ia erdalan nahe ku kerina daerah Palestina guna mpeseh berita e.

Pasti mehuli ras mehamat kel cara Jesus mpeseh undangen e, emaka kena ku pusuh kalak ”si latih janah beraten”. (Matius 11:28-30) Kiniulin ras lias  atena jadi jaminen maka banci iberena pengadi-ngadin man kalak si nggit erlajar arah ia. Bage pe anak-anak meriah kapna ras Jesus janah nina Pustaka, ”Idakepna anak-anak e sekalak-sekalak.”​—Markus 10:13-16.

Amin pe melala kiniseran si nandangi inanami Jesus ope ia mate, tapi ia labo kalak si menukah kote ukurna. Contohna, nggit ia nampati sanga reh ia ku pesta perjabun i Kana, alu erban lau jadi anggur. (Johanes 2:1-11) Bas kesempaten si deban, iturikenna ka pelajaren penting si la terlupaken.​—Matius 9:9-13; Johanes 12:1-8.

Si utamana ilakoken Jesus eme nuriken kerna keriahen ukur bas kegeluhen si rasa lalap si banci inanami kalak si mbegiken ia. (Johanes 11:25, 26; 17:3) Sanga ituriken 70 murid-muridna kerna pengalamen kalak e bas erberita, ”meriah iakap” Jesus, janah nina, ”Meriahlah ukurndu perbahan gelarndu enggo isuratken i surga.”​—Lukas 10:20, 21.

Peminpin agama bas jaman Jesus erusaha gelah ihormati ras iergai kalak jabatenna. (Bilangen 15:38-40; Matius 23:5-7) Tapi Jesus la bagi kalak e, isuruhna rasul-rasulna gelah ula lit ”si erkuasa” man si deban. (Lukas 22:25, 26) Ibereken Jesus ka persinget enda, ”Metengetlah nandangi guru-guru agama, si megati erdalan-dalan erbaju gedang, si atena gelah ihormati i gedang-gedang dalan ras i tiga.”​—Markus 12:38.

Sebalikna, perban penampilen Jesus seri bagi kalak si deban emaka bas piga-piga kejadin labo mis itandai kalak ia. (Johanes 7:10, 11) Bage pe sanga ras 11 rasul-rasulna si setia, labo ia teridah bagi kalak si beluhna. Janah arus icium Judas ia gelah ”mereken tanda” man rombongen si lit i je.​—Markus 14:44, 45.

Melala denga keterangen si la sieteh kerna rupa Jesus, enda jadi bukti maka Jesus labo seri ras gambaren si iban kalak. Lit si pentingen asangken meteh uga kin situhuna rupana mbarenda, eme uga perukurenta kerna ia gundari.

Kata-kata enda ibelasken Jesus bas wari ia mate ras ikuburken. (Johanes 14:19) Iberekenna kegeluhenna ”guna nebusi nterem jelma”. (Matius 20:28) Bas wari peteluken ipekeke Dibata ia jadi mahluk roh ras ”rikutken rencana Dibata, icidah-cidahkenna bana” man piga-piga muridna. (1 Petrus 3:18; Perbahanen 10:40) Uga nge rupa Jesus sanga icidahkenna bana man muridna? Banci saja beda kel ras rupana ope ia mate, buktina sanga ia ikut pulung ras murid-muridna, la mis itandai kalak e ia. Sanga i deher kuburen iakap Maria Magdalena ia sekalak si njagai peken, bage pe dua kalak muridna si erdalan ku Emaus, iakapna Jesus sekalak pertandang.​—Lukas 24:13-18; Johanes 20:1, 14, 15.

Uga nge arusna perukurenta kerna Jesus gundari? Lebih 60 tahun kenca kematen Jesus, idat rasul Johanes sada pengenehenen kerna Jesus. Labo Jesus si mate i kayu salib si idah Johanes. Tapi si idahna eme ”Raja i babo kerina raja, dingen Tuan i babo kerina tuan”, Raja Kinirajan Dibata, si nandangi ngkernepken kerina musuh Dibata, malekat si jahat ras kerina kalak si ngikutkenca, janah mereken pasu-pasu si rasa lalap man manusia.​—Ketangkasen 19:16; 21:3, 4.