Labo nukah ndarami pemere si cocok man kalak si deban. Selain si e mehuli ntah lang pemere e itentuken perasan kalak si ngalokenca. Janah, kai si mehuli man sekalak jelma lenga tentu mehuli man kalak si deban.

Contohna, pemere si mehulina man sekalak remaja banci saja alat elektronik si terbaru. Man kalak dewasa, pemere si mehulina eme pemere si merga kel akapna, contohna tading-tadingen keluarga. Ras i bas piga-piga budaya, pemere si mehulina man si nguda ntah pe si nggo metua eme sen, perban banci ipakena sen e nukur kai atena.

Amin gia lit tentangenna, nterem kalak si terus erusaha ndarami pemere si mehulina man kalak si istimewa akapna. Amin pe ndarami pemere si mehulina labo menukah, tapi lit piga-piga petunjuk si banci nampati kita guna ndatkenca. Mari sibahas empat petunjuk si banci nampati kita gelah pemerenta e erban kalak si ngalokenca ermeriah ukur.

Sura-sura kalak si ngalokenca. Ikataken sekalak dilaki i Belfast, Irlandia bagin Utara, pemere si mehulina kel iakapna eme paksa ialokenna sepeda balap sanga umurna kira-kira 10 ntah 11 tahun. Engkai? Nina, ”Perban merhat kel aku.” Enda mbuktiken maka sura-sura sekalak jelma nentuken meriah akapna ngaloken pemere e ntah lang. Emaka ukuri kai sura-sura kalak si atendu iberekenndu pemere. Cuba darami kai si iergaina, perban kai si iergaina erpengaruh nandangi sura-surana. Contohna, sekalak bulang ntah pe nini meherga kel akapna sanga ia pulung ras keluargana. Banci jadi sura-sura kalak e gelah banci rusur idahna anakna bage pe kempuna. Ergan iakap kalak e kerehen keluarga ku rumahna asangken pemere si deban.

Carana gelah banci sieteh sura-sura sekalak jelma, arus sibegiken ia. Iiahken Pustaka kita gelah ”metinggel, tapi ola minter ngerana”. (Jakup 1:19) Sanga ngerana-ngerana kam ras teman-temanndu  ntah pe keluargandu, begiken ia gelah ietehndu kai si ngena ras si la ngena atena. Alu bage banci berendu pemere si cocok si erban meriah ukurna.

Si iperluken kalak si ngalokenca. Amin pe sederhana, tapi adi pemere e iperluken kalak si ngalokenca, pasti meriah kel ukurna. Tapi uga carandu metehsa kai si iperluken kalak?

Banci jadi menukah siakap metehsa adi si sungkun langsung kai si iperlukenna. Tapi, melala kalak kurang kapna riahna adi sungkunna langsung, pangen kapna erban kejuten man si ngalokenca e, janah pemere e pe cocok ka bas ia. Memang, piga-piga kalak nggit ia nuriken kai si ngena ras si la ngena atena, tapi buen si la nggit nuriken kai si iperlukenna.

Erkiteken si e, perdiatekenlah uga keadanna. Ia sekalak dilaki ntah diberu, nguda denga ntah nggo metua, lajang ntah nggo erjabu, nggo sirang, mbalu, kalak si erdahin, ntah nggo pensiun? Kenca si e, ukuri kai nge si iperlukenna.

Gelah banci tehndu pemere kai si cocok, ercakap-cakaplah ras kalak si seri keadanna. Banci jadi iturikenna man bandu kai si tuhu-tuhu iperlukenna si la ieteh jelma si nterem. Alu bage banci iberendu pemere si iperlukenna, si la isangka kalak si deban.

Waktu si cocok. Nina Pustaka, ”Kata si payo i bas paksa si payo!” (Kuan-kuanen 15:23) Ituriken bas ayat e, adi tepat waktuna kita ngerana mbelin pengaruhna. Bage ka pe perbahanenta. Bagi ranan si ipeseh bas waktu si tepat, meriah ukur megisa, bage pe pemere si ibereken i bas waktu ras kesempaten si tepat, banci erban reh riahna ukur si ngalokenca.

Sekalak teman si nandangi erjabu. Sekalak anak muda si nandangi tamat sekolah. Sekalak perbulangen ras ndeharana si nimai kelahiren anakna. Enda me piga-piga kesempaten si cocok adi mere ateta. Piga-piga kalak erban daftar kesempaten-kesempaten si cocok guna mereken pemere bas tahun si reh. Alu bage banci ibanna lebe rencana guna ndarami pemere si cocok bas tiap kesempaten. *

Tentu, labo bas kesempaten si istimewa saja kita banci mere. Ndigan pe banci sigejapken keriahen ukur i bas mere. Janah perlu ka nge situlis kata-kata bas pemerenta e. Contohna, adi lit sekalak dilaki si mereken pemere man sekalak diberu janah la iturikenna alasenna mere, banci jadi iakap diberu e lit ukur dilaki e man bana. Amin pe tuhu bage, pemere si bage banci erban la siangkan ntah pe erban masalah. Emaka perlu siperdiateken petunjuk penting si deban eme tujun si mere.

Tujun si mere. Arah contoh ndai, mejile adi siukuri lebe gelah kalak si ngaloken pemere e la salah sangka. Selain si e, arus iukuri kalak si mere lebe kai tujunna i bas mere. Nterem kalak tujunna mere eme guna ngergai, janah nterem ka si mere tiap tahun perban nggo arus akapna mere. Lit ka nge si mere tapi ngarapken balasen.

Kai si banci ilakokenndu guna mastiken maka mehuli tujunndu sanga mere? Nina Pustaka, ”Kasa kai si ilakokenndu bahanlah e alu ate keleng.” (1 Korinti 16:14) Adi perban tuhu-tuhu keleng atendu ia janah ermediate kam bana, pasti meriah ukurna ngaloken pemerendu e, janah kam pe reh belinna keriahen ukurndu perban kam mere arah ukurndu nari. Sanga kam mere arah ukurndu nari, Bapanta si i surga pe meriah ukurNa. Ipuji rasul Paulus kalak Kristen i Korinti perban melumbar ras meriah ukur kalak e  nampati turang seninana i Judea. Nina Paulus, ”Dibata engkelengi kalak si mere alu ukur meriah.”​—2 Korinti 9:7.

Alu mperdiateken petunjuk-petunjuk si nggo ibahas ndai, enda banci nampati kam erban pemere si banci erban meriah ukur kalak si ngalokenca. Petunjuk-petunjuk e ras si debanna eme bagin arah pengaturen Dibata gelah ialoken manusia pemere si mehulina. Mari siukuri kai pemere si luar biasa e alu ngoge artikel selanjutna.