”Kerina pemere si mehuli ras serta rehna i Surga nari; pemere e ipesusur Dibata, si njadiken kerina si ersinalsal i langit.” (Jakup 1:17) Bas ayat enda ituriken kerna kiniulin Bapanta si i surga eme, Dibata Jahwe. Melala kel si nggo iberekenNa man manusia, tapi lit pemere si ulin asangken si deban. Kai e? Eme Jesus, sentudu ras Johanes 3:16 si ngataken, ”Sabab bage pengkelengi Dibata doni enda, e maka iberekenNa AnakNa si tonggal, gelah ola bene ise pe si tek man bana, tapi gelah dat kegeluhen si tuhu-tuhu si la erkeri-kerin.”

Anak Dibata si tonggal eme pemere si mehulina si banci ialoken kerina kalak perban pemere e banci erban kita lanai iperbudak dosa, lanai metua ras mate. (Masmur 51:7; Johanes 8:34) Asa kai pe belinna usahanta labo kita ngasup bebas i bas perbudaken e nari. Tapi perban kelengNa ate Dibata man kita ibanNa dalan gelah banci kita ibebasken arah si e. Perban nggo ibereken Jahwe AnakNa si tonggal, Jesus Kristus, jadi tebusen, kerina kalak si setia banci ndatken kegeluhen si rasa lalap. Tapi kai kin situhuna tebusen e? Engkai maka iperluken? Ras, kai manpaat tebusen e man banta?

Tebusen eme erga si iperluken guna nggalari barang si igadeken ntah pe guna mbebasken kalak si iperbudak. Ituriken bas Pustaka maka orang tuanta si pemena Adam ras Hawa iciptaken alu sempurna la lit dosana, janah banci kalak e nggeluh rasa lalap i pardis ras kesusurenna. (Kejadin 1:26-28) Tapi kerina e bene perban ipilih kalak e la patuh man Dibata. Kalak e nggo erban dosa. Kai akibatna? Nina Pustaka njabapsa, ”Dosa enggo ngkenai kerina manusia i bas doni enda arah sekalak manusia, janah dosana e maba kematen. Erkiteken si e kematen enggo ngelangketi kerina manusia, sabap tep-tep kalak enggo erdosa.” (Roma 5:12) Labo kegeluhen si sempurna si iwarisken Adam man kesusurenna, tapi dosa, si maba kematen.

Tebusen ertina eme erga si seri guna nggalari si nggo bene. Sanga Adam la patuh man Dibata, ia erdosa janah kegeluhenna si sempurna pe bene. Bagi si ikataken Pustaka, enda me si erban kerina kesusuren Adam jadi budak dosa ras kematen. Perban si e iperluken kegeluhen sempurna si deban eme kegeluhen Jesus si ikorbanken gelah banci mbebasken kita arah perbudaken e. (Roma 5:19; Epesus 1:7) Perban keleng nge ate Dibata man manusia emaka iberekenNa tebusen gelah kai si nggo bene iban Adam ras Hawa, banci ngulihi idatken manusia eme kegeluhen si rasa lalap bas pardis i doni.​—Ketangkasen 21:3-5.

Arah pembahasen enda, la lit alasenta ragu maka pemere si mehulina bas Dibata nari eme tebusen, eme si erban kita banci nggeluh rasa lalap. Guna ngergai ’pemere si sempurna’ e, mari si bahas kai saja si erban pemere e luar biasa. Janah enda pe nampati kita bas erban pemere si erguna, bagi nggo si bahas bas artikel sebelumna.

Sentudu ras sura-suranta. Kerina manusia ersura-sura gelah banci tetap nggeluh. (Pengerana 3:11) Tapi sura-suranta enda banci seh perban  lit tebusen. Nina Pustaka, ”Sabap upah dosa e me kematen; tapi pemere si ibereken Dibata man banta e me kegeluhen si rasa lalap i bas persadan ras Kristus Jesus.”​—Roma 6:23.

Mereken si iperluken manusia. Manusia labo banci mereken tebusen. Bagi si ikataken Pustaka, ”Sabap tebusen guna geluh manusia meherga kal kap, e maka kai saja pe igalarkenna la pernah cukup.” (Masmur 49:9) Emaka tuhu-tuhu siperluken kel penampat gelah kita banci bebas arah dosa ras kematen. Tapi ”arah pertebusen si ibahan Kristus Jesus”, isikapken Dibata kai si iperluken manusia.​—Roma 3:23, 24.

Bas paksa si tepat. Ikataken Pustaka, ”Tapi Kristus mate asum kita perdosa denga!” (Roma 5:8) Perban tebusen e nggo ibereken ”asum kita erdosa denga”, enda jadi sada jaminen maka Dibata ngkelengi kita amin kita erdosa denga. Janah enda pe mereken arapen si terulin man banta bas ndalani wari-warinta, amin gia arus si nanami akibat arah dosa nari.

Ibereken arah keleng ate ras ukur si mehuli. Ituriken bas Pustaka kai si erban Dibata nggit mereken AnakNa jadi tebusen, nina ”Dibata enggo ncidahken kekelengenNa man banta alu nuruh AnakNa si tonggal ku doni enda, gelah kita nggeluh arah ia. Enda me kekelengen e: labo kita si enggo ngkelengi Dibata, tapi Ia nge si ngkelengi kita.”​—1 Johanes 4:9, 10.

Uga carandu mbuktiken maka iergaindu pemere si mehuli e? Ingetlah kai nina Jesus i bas Johanes 3:16 maka ”ise pe si tek man bana” pasti selamat. Bagi si ikataken Pustaka, erkiniteken ertina ”tek nandangi kai si iarapken kita”. (Heber 11:1) Gelah banci erkiniteken penting kel ndatken pemeteh si tuhu-tuhu. Enda me alasenna maka iahken kami kam guna erlajar kerna Dibata Jahwe, si mereken ’pemere si sempurna’, eme korban tebusen Jesus, gelah banci kam nggeluh si rasa lalap.

Kam banci erlajar kerna si e alu mpelajari Pustaka arah internet i www.pr418.com/btx. Meriah ukur Saksi-Saksi Jahwe nampati kam. Tek kami adi terus ipelajarindu terdauhen kerna pemere si mehulina e ras nggejapken ulihna, pasti tersuruh ukurndu ngataken, ”Bujur man Dibata si mulahi aku arah Jesus Kristus Tuhanta!”​—Roma 7:25.