Enda me si igejapken sekalak diberu si umurna 13 tahun sanga lit si mereken anak biang man bana. Enda pe igejapken sekalak diberu si nggo sukses bas pendahinna maka mbelin kel pengaruhna man ia sanga ibere bapakna ia komputer paksa ia SMA denga. Bage ka nge si igejapken sekalak dilaki si mbaru denga erjabu sanga ibere ndeharana kartu ucapen selamat perban nggo setahun kalak e erjabu.

Tiap tahun, nterem kalak nggunaken melala waktu ras upaya ndarami pemere si ”mehulina” guna ibereken man teman ntah pe keluarga bas kesempaten si istimewa. Pasti nterem kalak si meriah ukurna mbegiken tanggapen kalak si ituriken i datas ndai. Adi kam uga? Nggit nge kam mereken ntah pe ngaloken pemere si mehuli?

Kesempaten i bas mere ntah pe ngaloken tuhu-tuhu erban meriah ukur, janah e labo saja perban pemere e erpengaruh man si ngaloken, tapi pe perban erpengaruh ka man si mereken. Emaka nina Pustaka si Badia, ”Malemen kap ate i bas mere asangken i bas ngalo.” (Perbahanen Rasul-Rasul 20:35) Tentu, reh riahna ukurta adi pemerenta e iergai kalak si ngalokenca.

Adi bage, uga carana gelah pemerendu e erban kam ras kalak si ngalokenca ermeriah ukur? Janah, amin gia la banci iberendu pemere si ”mehulina”, uga carana gelah pemerendu e tuhu-tuhu iergai?