ENTEREM kalak metehsa maka kalak Mesir si mbarenda nulis i kertas si iban arah papirus. Kalak Junani ras kalak Roma pe nulis i kertas papirus. * Tapi sitik ngenca kalak si metehsa maka papirus igunaken ka erban perahu.

Lebih 2.500 tahun si lewat itulis Nabi Jesaya maka “kalak si tading bas deher lau maler Etiopia” ngirim “utusen arah laut nari, nyebrang ia alu perahu si iban arah batang papirus.” Bas pudi wari, inubuatken Nabi Jeremia maka iserang kalak Babilon pagi pasuken Media Persia. Gelah kalak Babilon la banci kiam, itutung pasuken Media Persia ‘perahu-perahu si iban arah papirus’ jang kalak Babilon.​—Jes. 18:1, 2; Jer. 51:32.

Kata-kata si lit bas Pustaka rehna arah Dibata nari. Emaka la mamang ate kalak si mpelajari Pustaka sanga lit bukti sejarah si ncidahken maka papirus memang igunaken erban perahu bas jaman Pustaka. (2 Tim. 3:16) Bukti kai nge si idat? Idat ahli-ahli sejarah bukti si seh kel jelasna maka kalak Mesir mbarenda erban perahu arah papirus.

Bas kuburen kalak Mesir lit lukisen ras ukiren kerna kalak si mpepulung batang papirus guna erban perahu. Batang-batang papirus e ipotong, isusun, janah iiket alu mekeskes. Bentuk batang papirus e segitiga. Emaka, sanga kerinana isusun janah iiket jadi sada, batang-batangna jadi rapat janah megegeh. Sada buku kerna sejarah Mesir ngataken maka gedang perahu-perahu arah papirus e banci seh 17 meter janah dayungna lit 10 seh 12 si itama arah kiri ras kanan perahu e.

Bas Mesir melala papirus turah i deher Lau Nil. Selain si e, menukah erban perahu arah papirus. Sanga perahu-perahu si galang mulai iban alu nggunaken kayu, nelayan-nelayan si mbarenda tetap denga nggunaken papirus erban rakit ras perahu-perahu si kitik.

Batang papirus sempat ndekah igunaken erban perahu. Sekalak penulis Junani si gelarna Plutarkh, si nggeluh bas jaman rasul-rasul ngataken maka paksa si e igunaken kalak denga perahu si iban arah papirus.