1-2. Kai nina sekalak penulis janah kai kari sibahas bas artikel enda?

GUNDARI jutan kalak ngataken maka tek ia man Jesus, tapi la dalankenna kai si ajarken Jesus. (2 Tim. 4:3, 4) Lit sekalak penulis ngataken bagenda, “Bicara lit gundari sekalak dilaki si bali bagi Jesus, si ajarenna seri ras Jesus, . . .  situlak nge ia bagi cara kalak nulak ia dua ribu tahun si lewat? . . . Jawapenna: Mbelin kemungkinenna situlak.”

² Sanga Jesus i doni, melala kalak si megi pengajarenna ras ngidah mukjizat si ibanna. Tapi kalak e la erkiniteken man Jesus. Engkai? Bas artikel sebelumna, enggo sibahas empat alasen si erban kalak la tek man kai si kataken Jesus ras si lakokenna. Gundari, mari sibahas empat alasen si debanna. Sanga sibahas kari, siteh me engkai maka gundari pe enterem kalak la nggit megiken pengikut Jesus. Sibahas ka kari kai si perlu silakoken gelah la sipediat kai pe erban kita ngadi ngikutken Jesus.

3. Kai si erban piga-piga kalak la nggit ngikutken Jesus?

³ Sanga Jesus i doni, nggit ia mereken waktuna man kalak si uga pa pe. Nggit ia man ras kalak bayak bage pe kalak si erkuasa. Melala ka iberekenna waktuna man kalak si mesera ras si tertindas. Selain si e, mekuah atena kalak si ianggap jelma si enterem selaku “kalak perdosa.” Ngidah si e, piga-piga kalak si sombong la nggit ngikutken ia. Sungkun kalak e murid-murid Jesus, nina, “Engkai maka  man ras minem kena radu ras pemungut pajak bage pe kalak perdosa?” Ngaloi Jesus, “Kalak si sehat labo perlu dokter, kalak si sakit nge perlu. Aku reh labo ndilo kalak si benar, tapi ndilo kalak perdosa gelah ertobat ia.”​—Luk. 5:29-32.

4. Menurut Nabi Jesaya, kai arusna si ieteh kalak Jahudi kerna Mesias?

⁴ Kai nina Pustaka? Ndekah sope Mesias reh ku doni, inubuatken Nabi Jesaya maka itulak doni enda pagi ia. Bagenda nina nubuat e, “Ihina ia janah la kalak nggit ndeher ras ia. . . . Ayona tempa-tempa ibuniken arah kami nari. Irendahken ia janah kami pe la ermediate man bana.” (Jes. 53:3) Ikataken nubuat e maka la pagi nggit “kalak” ndeher ras Mesias. Emaka, arusna la mamang ate kalak Jahudi bas abad pertama sanga idahna enterem kalak la nggit ngikutken Jesus.

5. Uga nge pendapat enterem kalak gundari kerna pengikut Jesus?

⁵ Bage ka nge si terjadi gundari? Ue. Enterem peminpin agama si meriah akapna adi anggota gerejana kalak si penting, kalak bayak, ras kalak si ianggap pentar bas doni enda. Amin pe ilakoken anggotana perbahanen si segat ate Jahwe, tetap denga ialo-alo peminpin agama e ia bas gerejana. Tapi, amin pe umat Jahwe rajin ras mehuli lagu langkahna, la iergai peminpin agama e perban teremen arah kalak e labo kalak si penting iakap doni enda. Bagi si kataken Paulus, ipilih Dibata kalak “si isepeleken.” (1 Kor. 1:26-29) Amin pe bage, meherga iakap Jahwe kerina umatNa si setia.

6. Menurut Matius 11:25, 26, uga kita banci ngusih Jesus?

⁶ Kai si banci silakoken gelah tetap kita erkiniteken? (Baca Matius 11:25, 26.) Ula kita terpengaruh perukuren doni enda kerna umat Dibata. Teklah kam maka kalak si meteruk ukur ngenca si igunaken Jahwe ngelakoken peratenNa. (Ms. 138:6) Cuba ukuri asa buena si enggo ilakoken Jahwe arah umatNa si ianggap doni enda la pentar.

7. Engkai maka ikataken Jesus kalak Parisi e kalak munapik? Janah uga tanggapen kalak e?

⁷ La mbiar Jesus mpebetehken perbahanen peminpin agama si munapik. Contohna, ikataken Jesus maka pentingen iakap kalak Parisi kerna uga arusna cara kalak e nuci tan asangken uga arusna perbahanen kalak e man orang tuana. (Mat. 15:1-11) Banci saja sengget murid-murid Jesus megi kai si ikataken Jesus e. Emaka nungkun kalak e bana, “La kin tehndu merawa kalak Parisi megi katandu ena?” Ijawap Jesus, “Kerina sinuan-sinuan si la isuan Bapakku si i surga icabut nge pagi. Pediat saja kalak e. Kalak e penegu-negu si pentang. Adi kalak pentang negu kalak pentang, ndabuh me ia duana ku lubang.” (Mat. 15:12-14) Amin pe merawa kel peminpin agama megi kai si ikataken Jesus, terus icakapken Jesus kerna kebenaren.

8. Uga Jesus mpebetehken maka labo kerina ajaren agama ialoken Dibata?

⁸ Ipebetehken Jesus ka piga-piga ajaren agama si salah. La lit ikatakenna maka kerina ajaren agama e ialoken Dibata. Tapi ikatakenna maka enterem kalak bas dalan si mbelang si nuju ku kematen janah sitik ngenca kalak bas dalan si sempit si nuju ku kegeluhen. (Mat. 7:13, 14) Ikatakenna ka maka lit kalak si ngaku ngelayani Dibata, tapi situhuna labo  ilayanina Dibata. Emaka ibereken Jesus persinget enda, nina, “Hati-hatilah man nabi-nabi palsu si reh ku kena, si arah darat nari teridah bagi biri-biri, tapi situhuna kalak e srigala si merangap. Banci tandai kena kalak e arah buahna nari.”​—Mat. 7:15-20.

9. Kai piga-piga ajaren si salah si pebetehken Jesus?

⁹ Kai nina Pustaka? Nubuat si lit bas Pustaka ngataken maka semangat kel Jesus nandangi rumah Dibata. (Ms. 69:9; Joh. 2:14-17) Semangatna erban tersuruh ukurna mpebetehken ajaren ras perbahanen si salah arah agama si lit paksa si e. Contohna, tek kalak Parisi maka lit tendi kalak mate. Tapi iajarken Jesus maka kalak mate bali bagi kalak medem. (Joh. 11:11) Kalak Saduki la tek lit kekeken. Tapi, ipekeke Jesus temanna Lasarus. (Joh. 11:43, 44; Perb. 23:8) Iajarken kalak Parisi maka kai pe si terjadi banta, kerinana enggo itentuken Dibata. Tapi ajarken Jesus maka manusia bebas erban pilihen guna ngelayani Dibata ntah lang.​—Mat. 11:28.

10. Engkai maka enterem kalak la nggit megiken beritata?

¹⁰ Bage ka nge si terjadi gundari? Ue. Enterem kalak nulak kita perban sibuktiken arah Pustaka maka lit piga-piga ajaren agama si salah. Misalna, iajarken peminpin agama maka kalak jahat ihukum Dibata bas api neraka. Igunaken kalak e ajaren si salah e guna mpebiar-biar kalak gelah patuh kalak man bana. Selaku kalak si nembah Jahwe Dibata kekelengen, sisampati kalak meteh maka ajaren e salah. Selain si e, iajarken peminpin agama ka maka lit tendi kalak mate. Adi tuhu kin ajaren e, ise pe la perlu ipekeke. Sibuktiken maka ajaren e la lit bas Pustaka. Selain si e, melala agama ngajarken maka kerina si terjadi enggo itentuken Dibata. Tapi siajarken maka manusia bebas erban pilihen guna ngelayani Dibata ntah lang. Uga nge tanggapen peminpin agama man banta? Rusur kel kalak e merawa!

11. Bagi si kataken Jesus bas Johanes 8:45-47, kai si perentahken Dibata man umatNa?

 ¹¹ Kai si banci silakoken gelah tetap kita erkiniteken? Adi keleng ateta kebenaren, arus kita tek man Dibata janah sipatuhi Ia. (Baca Johanes 8:45-47.) La kita nggit bagi Setan si Iblis, tetap ateta bas kebenaren. La kita nggit ngelakoken kai pe si la cocok ras kinitekenta. (Joh. 8:44) Iperentahken Dibata umatNa gelah “cigalah ate kena kai si jahat” ras “persadalah diri kena ras kai si mehuli,” bagi si ilakoken Jesus.​—Rom. 12:9; Heb. 1:9.

12. Engkai maka cara Jesus ibunuh erban enterem kalak Jahudi la nggit ngikutken Jesus?

¹² Kai alasen si deban si erban piga-piga kalak Jahudi la nggit ngikutken Jesus? Nina Paulus, “Kita mberitaken kerna Kristus si ibunuh i tiang. Berita e bagi batu si erban kalak Jahudi tertuktuk.” (1 Kor. 1:23) Engkai maka cara Jesus ibunuh alu ipakuken bas tiang siksan erban enterem kalak Jahudi la nggit ngikutken Jesus? Perban iakap kalak e kematen Jesus bas tiang siksan mbuktiken maka ia penjahat ras kalak si perdosa, labo Mesias.​—Ul. 21:22, 23.

13. Kai si la isadari kalak si la nggit ngikutken Jesus?

¹³ La isadari kalak Jahudi si la nggit ngikutken Jesus maka Jesus e la ersalah, enggo ipitnah, ras la adil perbahanen kalak man bana. Hakim-hakim si ngadili Jesus la ngikutken undang-undang sanga ngadili Jesus. Meter kel iban kalak e keputusen janah la adil keputusen e. (Luk. 22:54; Joh. 18:24) Labo ibegiken kalak e tuduhen ras bukti si ngelawan Jesus. Padin akap kalak e ndarami “kesaksin palsu guna ngelawan Jesus gelah ia ihukum mate.” Sanga la dat kalak e, iusahaken imam si mbelin gelah ikataken Jesus kai si salah gelah banci ia ituduh ersalah. Ertentangen kel kai si ilakoken kalak e ras undang-undang. (Mat. 26:59; Mrk. 14:55-64) Kenca Jesus  ipekeke, ibereken hakim-hakim e “melala sen pirak” man prajurit Roma si njaga kuburen Jesus gelah ikataken kalak e kai si la tuhu kerna engkai maka kuburen Jesus kosong.​—Mat. 28:11-15.

14. Kai si inubuatken Pustaka kerna kematen Mesias?

¹⁴ Kai nina Pustaka? Enterem kalak Jahudi bas jaman Jesus la iarapkenna maka Mesias e arus mate. Tapi bagenda nina nubuat si lit bas Pustaka, “Berena geluhna seh ngasa mate, janah ia ianggap bali ras kalak jahat. Babana dosa enterem jelma, janah banna pemindon guna kalak si erdosa.” (Jes. 53:12) Emaka, sanga Jesus ibunuh selaku kalak perdosa, situhuna la lit alasen kalak Jahudi la nggit ngikutken ia.

15. Tuduhen kai si iban man Saksi-Saksi Jahwe si erbanca enterem kalak la nggit megiken berita si ipeseh kalak e?

¹⁵ Bage ka nge si terjadi gundari? Ue. Jesus ituduh ersalah janah ihukum alu la adil. Saksi-Saksi Jahwe pe gundari ngadapi situasi si bage. Cuba perdiateken piga-piga contoh. Bas Amerika Serikat, antara tahun 1930-en ras 1940-en, lit melala kasus pengadilen guna mbela kebebasenta bas nembah Dibata. Piga-piga hakim jelas-jelas iakapna kita labo kalak si mehuli. Bas Quebec, Kanada, Gereja bage pe Pemerentah ras-ras nentang pendahinta. Enterem perberita ipenjaraken perban ncakapken kerna Kerajan Dibata man tetanggana. Bas Jerman, piga-piga turang seninata si nguda denga si tetap setia ibunuh pemerentahen Nazi. Bas Rusia, piga-piga turang seninata ipenjaraken perban ncakapken kerna Pustaka. Kalak e ianggap ngelakoken “pendahin si berbahaya.” Pustaka si Badia Terjemahen Doni si Mbaru bas bahasa Rusia pe ilarang. Pustaka e ianggap bacan si berbahaya perban lit i je gelar Jahwe.

16. Bagi si ikataken bas 1 Johanes 4:1, engkai maka ula pernah kita tek man bual si iban guna nentang umat Jahwe?

¹⁶ Kai si banci silakoken gelah tetap kita erkiniteken? Daramilah kebenarenna. Bas Khotbah Jesus i Gunung, iberekenna persinget man kalak si megiken ia maka lit pagi kalak si ngataken “kerina bual si jahat kerna” kalak e. (Mat. 5:11) Sumber bual e eme Setan. Ipengaruhina kalak si nentang kita gelah ikataken kalak e bual si jahat kerna kalak si engkelengi kebenaren. (Ket. 12:9, 10) Arus situlak kerina bual si ikataken kalak e. Ula pernah sipediat bual e erban mbiar kita ngelayani Dibata ntah pe erban lemah kinitekenta.​—Baca 1 Johanes 4:1.

17. Kai si terjadi sope kematen Jesus si erbanca la nggit kalak ngikutken ia?

¹⁷ Sope Jesus mate, ihianati salah sada rasulna ia. Rasulna si deban pe ipersokenna ia telu kali. Selain si e, bas berngi sope ia mate, kerina rasul-rasulna nadingken ia. (Mat. 26:14-16, 47, 56, 75) Labo Jesus sengget ngidah si e perban enggo inubuatkenna maka e pasti terjadi. (Joh. 6:64; 13:21, 26, 38; 16:32) Perban kejadin e, piga-piga kalak lanai nggit jadi pengikutna. Banci saja bagenda kalak e rukur, ‘Adi bage kin perbahanen rasul-rasul Jesus, labo aku nggit ikut ras kalak e!’

18. Nubuat kai saja si terjadi sope Jesus mate?

¹⁸ Kai nina Pustaka? Ratusen tahun sope Jesus reh ku doni, ikataken Jahwe maka ihianati pagi Mesias alu 30 logam pirak. (Sak. 11:12, 13) Jesus ihianati salah sada teman kompakna. (Ms. 41:9) Selain  si e, itulis Nabi Sakaria ka bagenda, “Serang permakan e janah pediat merap rarasen biri-birina.” (Sak. 13:7) Kerina nubuat e terjadi man Jesus. Emaka, kalak si bujur arusna tetap ngikutken Jesus janah e erban reh paguhna kiniteken kalak e.

19. Kai si iteh kalak si bujur ukurna?

¹⁹ Bage ka nge si terjadi gundari? Ue. Bas jamanta, lit piga-piga Saksi si itandai enterem jelma enggo nadingken Jahwe. Murtad kalak e janah ipengaruhina kalak si deban guna nadingken Jahwe. Ipebelangna laporen si la mehuli, cerita-cerita si erban sesat, bage pe bual kerna Saksi-Saksi Jahwe. Ipebelangna e arah koran, radio, TV, ras Internet. Tapi, kalak si bujur ukurna la nggit isesatken perban enggo tehna maka kerina si terjadi e enggo inubuatken bas Pustaka.​—Mat. 24:24; 2 Pet. 2:18-22.

20. Uga carana gelah la kita ipengaruhi kalak si enggo nadingken kebenaren? (2 Timotius 4:4, 5)

²⁰ Kai si banci silakoken gelah tetap kita erkiniteken? Arus sijaga kinitekenta tetap paguh alu ratur mpelajari Pustaka, terus ertoto, ras terus sibuk ngelakoken pendahin si isuruh Jahwe. (Baca 2 Timotius 4:4, 5.) Adi erkiniteken kita, la kita mbiar sanga sibegi laporen si la mehuli. (Jes. 28:16) Kekelengenta man Jahwe, Pustaka, bage pe man turang senina erban kita la nggit ipengaruhi kalak si nadingken kebenaren.

21. Amin pe teremen kalak gundari la nggit megiken beritata, tapi nandangi kai kita banci tek?

²¹ Bas abad pertama, enterem kalak si la nggit ngikutken Jesus, tapi enterem ka si nggit ngikutken ia. Contohna, salah sada anggota Pengadilen Agama Jahudi bage pe ‘enterem imam-imam.’ (Perb. 6:7; Mat. 27:57-60; Mrk. 15:43) Gundari pe jutan kalak nggit jadi pengikut Jesus. Engkai? Perban iteh kalak e kebenaren si lit bas Pustaka janah keleng atena. Enda cocok ras kai si ikataken Pustaka, “Mbelin kel kedamen si gejapken kalak si keleng atena undang-undangNdu, la lit si banci erban kalak e tertuktuk.”​—Ms. 119:165.