Perban kejadin e, mulai me kuusahaken nandai Dibata. Tapi sope lenga kuturiken kai si terjadi seterusna bas berngi e, kuceritaken ateku kai saja si terjadi sanga aku kitik denga si erban aku merhat erlajar kerna Dibata.

Aku lahir tahun 1937 i Guesnain, bas kota pertambangen si lit i bagin barat Prancis. Bapakku erdahin bas pertambangen batu bara, iajarina aku maka penting kel kerja keras. Iajarina ka aku gelah segat ateku kai si la adil. Mbue idahna perbahanen si la adil man kalak si erdahin bas tambang janah kalak e erdahin bas situasi si berbahaya. Merhat bapakku nampati kalak e. Emaka ikut bapakku bas sada organisasi si erjuang guna kepentingen kalak si erdahin bas tambang. Segat ka ate bapakku man pendeta-pendeta si munapik si lit bas daerah e. Enterem arah kalak e si entabeh pergeluhna tapi tetap denga pindona pangan ras sen man kalak si erdahin bas tambang si mesera pergeluhna. Ciga kel ate bapakku pendeta-pendeta e, emaka la lit ajarkenna kerna agama man bangku.

 Sanga aku reh belinna, mulai ka ateku segat man kai si la adil. Salah sada si la kuakap adil eme enterem kalak bas daerahku segat kel atena kalak asing si tading i Prancis. Tapi adi aku, meriah kuakap erteman ras anak-anak kalak asing janah rusur aku main bola ras kalak e. Selain si e, mamakku labo kalak Prancis tapi kalak Polandia. Merhat kel aku ngidah erbage-bage suku banci tading ras-ras alu dame janah seri perbahanenna man sada ras si debanna.

Bas tahun 1957 isuruh pemerentah aku ikut dinas militer. Enda me si erbanca maka seh aku bas pegunungen Aljazair bas berngi wari si tangtangna kuceritaken ndai. Kenca aku serko man Dibata, kepeken si kuidah labo tentera musuh, tapi kelede liar. Dungna, tenang kel aku. Tapi kejadin ras perang e erban reh bagesna kuukuri kerna kegeluhen. Tersungkun-sungkun aku, ‘Kai kin tujunta nggeluh? Ermediate nge Dibata man banta? Banci nge sidat kedamen si rasa lalap?’

Bas pudi wari, sanga aku cuti bas rumah orang tuaku, jumpa aku ras Saksi Jahwe. Iberekenna man bangku sada Pustaka terjemahen Katolik bahasa Prancis si gelarna La Sainte Bible. Kubaca Pustaka e kenca mulih aku ku Aljazair. Lit ayat si erban aku rukur eme Ketangkasen 21:3, 4, nina i je, “Kemah Dibata lit i tengah-tengah manusia. . . . Apusi Dibata me kerina iluh kalak e. Lanai pagi lit kematen ras ceda ate. Tangis ntah pe si mesui lanai pagi lit. Sebap kai si terjadi mbarenda enggo lanai lit.” * Sengget aku mbaca ayat e. Tersungkun-sungkun aku, ‘Banci nge e terjadi?’ Paksa si e, sitik kel ngenca si kuteh kerna Dibata ras Pustaka.

Kenca lanai aku ikut dinas militer bas tahun 1959, jumpa aku ras sekalak Saksi si gelarna François. Melala kebenaren Pustaka si iajarkenna man bangku. Contohna, arah Pustaka icidahkenna maka gelar Dibata eme Jahwe. (Ms. 83:18) Ijelasken François ka maka iban Jahwe pagi keadilen bas doni enda, iubahNa doni enda jadi pardis, janah ibanNa terjadi kata-kata bas Ketangkasen 21:3, 4.

Masuk akal kel kuakap kerina pengajaren e janah kena kel ku pusuhku. Tapi merawa kel aku man pendeta-pendeta janah kutokoh-tokohi ateku kalak e perban enggo iajarkenna kai si la lit bas Pustaka. Adi kuakap bali denga perukurenku bagi bapakku janah kulawan ateku kai si la adil. Emaka mis ateku kulakoken.

François ras Saksi si deban nampati aku gelah tetap tenang. Ijelasken kalak e maka selaku kalak Kristen la banci sihakimi kalak si deban. Tapi arus sisampati kalak e alu nuriken berita si meriah kerna Kerajan Dibata. Enda me pendahin si ilakoken Jesus janah isuruhna gelah ilakoken pengikutna pendahin e. (Mat. 24:14; Luk. 4:43) Arus ka kuusahaken ngerana alu cara si mehuli man kalak si deban khususna sanga la kuakap cocok kinitekenna ras kai nina Pustaka. Bagi si ikataken Pustaka, “Sekalak budak Tuhan la perlu rubati, tapi lembut min man kerina kalak.”​—2 Tim. 2:24.

 Kenca kuban melala perubahen, dungna iperidiken aku jadi Saksi Jahwe bas tahun 1959 i kebaktin wilayah. I je jumpa aku ras sekalak turang si nguda denga si menarik kuakap, gelarna Angèle. Reh me aku ku runggunna janah dungna erjabu kami bas tahun 1960. Ia tuhu-tuhu diberu si seh kel ulina, ndehara si luar biasa, janah pemere si meherga arah Jahwe nari.​—Kua. 19:14.

Ertahun-tahun dekahna melala pelajaren penting si kudat arah turang senina si pentar ras erpengalamen. Pelajaren si pentingna si kudat eme gelah banci berhasil bas ndungi tugas si mesera arus kita meteruk ukur janah sidalanken nasehat si lit bas Kuan-kuanen 15:22, si ngataken, “Rencana berhasil adi mbue penasehat.”

Bas tahun 1964, mulai kuidah maka tuhu kel nasehat e. Bas tahun e mulai aku ngelayani jadi pertua keliling, ndahi runggun-runggun guna mpegegehi turang senina, janah mpepaguh kiniteken kalak e. Tapi paksa si e umurku 27 tahun denga janah kurang kel pengalamenku. Emaka kuban melala kesalahen. Tapi kuusahaken erlajar arah kesalahenku e. Si pentingna, melala pelajaren si meherga si kudat arah “penasehat” si pentar ras erpengalamen.

Sanga tangtangna aku jadi pertua keliling lit sada pengalamenku. Kenca kudahi sada runggun i Paris, sekalak turang senina si paguh kinitekenna nungkun man bangku, “Banci nge kita ngerana?” Ningku, “Banci.”

Nungkun ia, “Louis, adi lawes dokter ku rumah sekalak jelma, ise nge si iperiksana?”

Ningku, “Kalak sakit.”

Nina, “Payo. Tapi adi kuperdiateken buen kuidah waktundu ras turang senina si paguh kinitekenna, termasuk pertua bas runggun. Bas runggunta enterem turang senina si kitik ukurna, si mbaru denga, ntah pe si permela. Pasti terpegegehi kel kalak e adi ibanndu waktundu ras kalak e, misalna reh kam man ku rumahna.”

Ngata bujur kel aku perban nasehat si mehuli arah senina e. Kena kel ku pusuhku ngidah kekelengenna man biri-biri Jahwe. Emaka, amin pe mesera kuakap ngakui kesalahen si enggo kuban, mis kudalanken kai si ikatakenna e. Ngata bujur kel aku man Jahwe perban lit senina si bage.

 Bas tahun 1969 ras 1973, ipilih aku jadi pengawas guna nikapken pangan bas dua kebaktin Internasional i Colombes, Paris. Bas kebaktin tahun 1973, arus sikapken kami pangan man kira-kira 60.000 kalak lima wari dekahna. La teh kami uga cara ngelakokenca. Tapi sekali nari gelah banci berhasil, kupindo nasehat arah kalak si deban bagi si ikataken Kuan-kuanen 15:22. Kupindo penampat arah kalak si erpengalamen. Kalak e termasuk tukang daging, kalak si nuan gulen-gulen, si erdakan, ras si nukur bahan-bahan. Ras-ras kami ndungi dahin si mesera e.

Bas tahun 1973, aku ras ndeharaku iundang ngelayani bas Betel i Prancis. Tugasku si pertama seh kel beratna. Arus kudarami cara guna ngirim baca-bacanta man turang seninata i Kamerun, Afrika, perban paksa si e pendahinta sangana ilarang antara tahun 1970 ras 1993. Paksa si e pe, la kuteh kai si arus kulakoken. Sekalak pengawas cabang i Prancis, banci saja mperdiateken uga perasanku paksa si e. Emaka ipegegehina aku janah nina, “Turang seninata bas Kamerun perlu kel baca-bacanta, emaka arus siperdiateken kalak e.” E me si ilakoken kami.

Lit piga-piga kali aku lawes ku negara-negara si ndeher ras Kamerun guna jumpa ras pertua-pertua si lit i je. Senina-senina e perpang janah pentar. Isampati kalak e gelah kuteh uga carana ngirimken baca-bacanta. Emaka turang seninata si lit i Kamerun banci ngaloken baca-bacanta alu ratur. Ipasu-pasu Jahwe usaha kami. Kurang lebih 20 tahun umat Jahwe si tading i negara e la pernah la ngaloken Sora Ermomo ras Pelayanenta man Kinirajan Dibata si iterbitken tiap bulan.

Mulai kin tangtangna kami ngerondong enggo kuperdiateken maka Angèle rembak ras Jahwe. Kenca kami erjabu, reh jelasna kuidah maka  rembak kel ia ras Jahwe. Bas berngi wari perjabun kami isuruhna gelah kutotoken kerna sura-sura kami ngelayani Jahwe asa ngasup kami. Ijawap Jahwe toto kami e.

Isampati Angèle ka aku gelah reh tekna man Jahwe. Contohna, sanga kami iundang ku Betel tahun 1973, agak mberat kuakap perban meriah kuakap ngelayani bas pendahin keliling. Tapi ingetken Angèle aku maka enggo baktiken kami kegeluhen kami man Jahwe janah arus ilakoken kami kai pe si isuruh organisasi Jahwe. (Heb. 13:17) Setuju kel aku man kai si ikatakenna e. Emaka berkat me kami ku Betel. Ndeharaku e kalakna pentar, masuk akal, janah keleng atena Jahwe. Sipat-sipatna e mpepaguh perjabun kami janah nampati kami erban keputusen si mehuli bas perjabun kami sedekah enda.

Gundari kami enggo reh tuana, amin pe bage Angèle terus jadi ndehara si luar biasa janah ndukung aku. Contohna, gelah banci kami ikut bas sekolah-sekolah teokratis si nggunaken bahasa Inggris, iusahaken kami mpelajari bahasa e. Ikut kami bas runggun si nggunaken bahasa Inggris, amin pe paksa si e umur kami enggo 70-en. Perban tanggung jawapku selaku Panitia Cabang bas Prancis, mesera kuakap ndarami waktu guna mpelajari bahasa si deban. Tapi sisampat-sampaten aku ras Angèle. Gundari umur kami enggo 80-en tapi terus iban kami persiapen guna perpulungen bas bahasa Inggris ras Prancis. Iusahaken kami ka asa ngasup kami gelah rusur mere komentar bas perpulungen ras ikut erberita. Enggo ipasu-pasu Jahwe kerina usaha kami bas mpelajari bahasa Inggris.

Bas tahun 2017 dat kami pasu-pasu si luar biasa. Kami iundang ku Sekolah man Anggota Panitia Cabang ras Ndeharana si iban i Pusat Pendidiken Menara Pengawal i Patterson, New York.

Jahwe tuhu-tuhu Guru si Mulia. (Jes. 30:20) Emaka labo ateta mamang ngidah umatNa ndatken pendidiken si mehulina, la soal si metua ras si nguda. (Ul. 4:5-8) Memang enggo kuperdiateken maka kalak si nguda denga si megiken Jahwe ras turang senina si erpengalamen banci erban keputusen si mehuli bas geluhna janah jadi umat Jahwe si setia. Bagi si ikataken Kuan-kuanen 9:9, “Ajarilah kalak si pentar gelah reh pentarna ia. Ajarilah kalak si benar gelah tambah pemetehna.”

Mon-mon kuukuri kai si terjadi sanga berngi wari bas pegunungen Aljazair 60 tahun si lewat. Paksa si e, la kuteh maka banci bagenda kuakap riahna gundari. Melala kel si kupelajari arah kalak si deban! Ibereken Jahwe kegeluhen si luar biasa ras ermeriah ukur man kami. Emaka, iusahaken kami asa ngasup kami gelah terus erlajar arah Bapakta si i surga bage pe arah turang senina si pentar ras si erpengalamen si keleng atena Jahwe.