1-2. Kai saja masalah si iadapi enterem Saksi Jahwe?

IAHKEN Paulus Timotius gelah berena si mehulina bas ngelayani Dibata. Emaka siikutken ateta pedah Paulus e. (2 Tim. 4:5) Tapi mon-mon mesera ngelakokenca. Enterem turang seninata arus erjuang gelah la mbiar erberita. (2 Tim. 4:2) Contohna, cuba ukuri turang seninata si tading bas ingan si mbatasi ntah pe ngelarang pendahinta. Tetap kalak e erberita amin pe tehna maka banci ia ipenjaraken.

² Melala masalah si arus iadapi umat Jahwe si banci erban kitik ukur kalak e. Misalna, melala si arus kerja keras guna nikapken keperlun keluargana. Merhat nge kalak e mere terbuen bas erberita, tapi enggo latihsa akap kalak e bas akhir pekan. Si debanna, lanai banci mbue si lakokenna bas ngelayani Jahwe perban mekelek penakitna, perban enggo metua, ntah pe perban lanai ngasup ndarat rumah nari. Lit ka si lalap akapna la meherga bana i lebe-lebe Jahwe. Sekalak turang senina si gelarna Mary * si tading i Timur Tengah ngataken, “Erjuang kel aku gelah lanai kitik ukurku janah e erban keri gegehku. Dungna, salah kuakap bangku perban enggo keri waktuku ras gegehku si arusna banci kupake guna erberita.”

3. Kai si nandangi sibahas bas artikel enda?

³ La soal kai masalahta banci bere Jahwe gegeh man banta gelah silayani Ia asa ngasupta. Sope lenga sibahas uga cara Jahwe nampati kita, mari sipelajari lebe uga cara Jahwe nampati Paulus ras Timotius gelah banci berhasil bas pelayanenna amin pe ngadapi masalah.

4. Kai saja masalah si adapi Paulus?

⁴ Melala masalah si adapi Paulus. Perlu ia penampat Jahwe sanga ipekpeki musuh-musuhna ia, ipenjaraken, ras sanga ibunuh kalak e atena ia. (2 Kor. 11:23-25) Labo mela Paulus ngataken maka arus ia erjuang ngadapi perasan kitik ukur. (Rom. 7:18, 19, 24) Lit ka masalah kesehatenna si bali bagi ‘duri bas dagingna’ janah merhat kel ia gelah imasapken Dibata si e.​—2 Kor. 12:7, 8.

5. Kai si ilakoken Paulus amin pe adapina erbage-bage masalah?

⁵ Ipegegehi Jahwe Paulus gelah banci ia terus erberita amin pe iadapina erbage-bage masalah. Cuba siukuri kai saja si berhasil ilakoken Paulus. Contohna, sanga ia jadi tahanen rumah i Roma semangat ia erberita man kerina kalak, banci saja termasuk sanga ia ibaba ku lebe-lebe pejabat pemerentah. (Perb. 28:17; Pil. 4:21, 22) Erberita ka ia man Pengawal Kerajan bage pe man kerina si reh ndahi ia. (Perb. 28:30, 31; Pil. 1:13) Sanga si e, igunaken Jahwe Paulus guna nulis piga-piga surat man kalak Kristen janah surat e erguna denga seh asa gundari. Selain si e, usihen si iban Paulus mpegegehi runggun i Roma janah e erban kalak e “reh pangna mpeseh kata Dibata alu la mbiar.” (Pil. 1:14) Amin pe la banci ilakoken Paulus bagi si arapkenna, ilakokenna si mehulina janah e “erban berita si meriah reh belangna.”​—Pil. 1:12.

6. Menurut 2 Korinti 12:9, 10, kai si nampati Paulus gelah berhasil bas pelayanenna?

⁶ Iteh Paulus maka gegeh arah Dibata nge si erban ia ngasup ngelakoken kerina bas ngelayani Jahwe, labo perban gegehna. Iakuina maka ‘sanga ia lemah, kuasa Dibata jadi sempurna’ bas ia. (Baca 2 Korinti 12:9, 10.) Ibere Jahwe kesah si badia guna nampati Paulus gelah berhasil ia bas pelayanenna, amin pe arus ia ipenjaraken, ianiaya, ras ngadapi masalah si debanna.

7. Kai saja masalah si iadapi Timotius?

⁷ Timotius eme teman Paulus, ia nguda denga. Ia pe andalkenna kuasa Dibata bas pelayanenna. Ikut Timotius nemani Paulus erberita ku erbage-bage ingan si ndauh. Selain si e utus Paulus ia ku  runggun-runggun ras mpegegehi turang senina. (1 Kor. 4:17) Banci saja la akap Timotius cocok bana ndalanken tugasna. Banci jadi e me alasenna maka bagenda nina Paulus man bana, “Ula pediat ise pe sepele man bandu perban kam nguda denga.” (1 Tim. 4:12) Paksa si e Timotius ‘rusur sakit’ janah e bali bagi duri bas dagingna. (1 Tim. 5:23) Tapi iteh Timotius maka kuasa si ibere Jahwe banci erban ia ngasup erberita ras ngelayani turang seninana.​—2 Tim. 1:7.

8. Uga cara Jahwe mpegegehi umatNa gundari?

⁸ Gundari ibere Jahwe ‘kengasupen si luar biasa’ man umatNa gelah banci kalak e terus setia ngelayani Ia. (2 Kor. 4:7) Mari sibahas kai saja si ibereken Jahwe guna mpegegehi kita gelah tetap setia man baNa. Lit empat si isikapkenNa eme toto, Pustaka, turang senina, ras dahin erberita.

9. Uga toto banci nampati kita?

⁹ Ipegegehi arah toto. Bagi si icatat bas Epesus 6:18, iahken Paulus kita gelah ertoto man Dibata “tiap kesempaten.” Pasti begiken Dibata totota janah sampatiNa kita. Jonnie, si tading i Bolivia, igejapkenna uga Jahwe nampati ia ngadapi erbage-bage masalah. Ndeharana, bapakna, ras mamakna radu-radu mekelek penakitna. Emaka mesera kel akap Jonnie ngurus kalak e teluna. Dungna mate mamakna. Ndeharana ras bapakna pe ndekah maka malem. Bagenda nina Jonnie kerna masalah si pernah iadapina e, “Sanga kuatir kel aku, si lalap nampati aku eme toto. Sanga ertoto aku man Jahwe kuturiken kai si kugejapken.” Ibere Jahwe gegeh man Jonnie gelah ngasup ia ngadapi masalahna. Ronald, sekalak pertua i Bolivia, itehna maka mamakna kena kanker. Sebulan kenca si e mate mamakna. Kai si nampati ia gelah ngasup ngadapisa? Bagenda nina, “Ertoto aku man Jahwe, kuturiken kerina si kugejapken man baNa. Kuteh maka Jahwe ngenca si banci ngangkai perasanku.” Banci jadi mon-mon la siakap kita ngasup ngadapi masalahta janah la siteh kai si arus sitotoken. Tapi iahken Jahwe kita ertoto man baNa amin pe mesera siakap nuriken isi pusuhta.​—Rom. 8:26, 27.

10. Menurut Heber 4:12, engkai maka penting kel mbaca Pustaka ras ngukurisa?

¹⁰ Ipegegehi arah Pustaka. Perlu sibaca Kata Dibata guna ndatken gegeh ras pengapul bali bagi si ilakoken Paulus. (Rom. 15:4) Sanga sibaca ras siukuri Kata Dibata, ibereken Jahwe kesah si badia gelah siangkai uga Pustaka banci nampati kita. (Baca Heber 4:12.) Ronald, si ituriken ndai ngataken, “Erguna kel kuakap perban kuusahaken mbaca Pustaka tiap berngi. Rusur kuukuri sipat-sipat Jahwe si mehuli ras kekelengenNa man umatNa. Enda me si mpegegehi aku.”

11. Uga Pustaka mpegegehi sekalak turang seninata si erceda ate?

¹¹ Banci benar carata rukur kerna masalahta adi siukuri Kata Dibata. Cuba perdiateken uga Pustaka enggo nampati sekalak turang seninata si erceda ate perban mate perbulangenna. Iahken pertua ia mbaca buku Jop gelah datna pelajaren si banci nampati ia. Sanga ibacana buku Jop, mis ipandangina cara rukur Jop si salah. Bagenda nina  bas pusuhna, “O Jop, ula masalahndu saja lalap ukurindu!” Tapi dungna sadar ia maka carana rukur pe bali bagi Jop. Enda nampati ia ngubah carana rukur ras mpegegehi ia gelah ngasup ngadapi ceda atena perban kematen perbulangenna.

12. Uga cara Jahwe mpegegehi kita arah turang seninata?

¹² Ipegegehi arah turang senina. Cara si deban si ipake Jahwe guna mpegegehi kalak Kristen eme arah turang senina. Itulis Paulus maka merhat ia ‘ipegegehi ras mpegegehi’ turang seninana si sada kiniteken. (Rom. 1:11, 12) Mary, si ituriken ndai, iergaina kel penampat arah turang senina, nina, “Ipake Jahwe turang senina mpegegehi aku amin pe la teh kalak e masalahku. Ipeseh kalak e kata-kata si mpegegehi ras kirimna surat man bangku. Enda me si tuhu-tuhu kuperluken. Enda nampati aku gelah kuteh kai si man katanken man turang senina si seri masalahna ras aku janah erlajar ka aku arah pengalamen kalak e. Pertua-pertua pe lalap usahakenna gelah kugejapken maka keleng ate turang senina man bangku.”

13. Uga carata mpegegehi sada ras si debanna bas perpulungen?

¹³ Salah sada cara si mehulina guna mpegegehi sada ras si debanna eme sanga perpulungen. Emaka sanga reh kita ku perpulungen siusahakenlah mpegegehi kalak si deban. Katakenlah maka keleng atendu kalak e janah ngata bujurlah kam man kai si enggo ilakokenna. Contohna, sekalak pertua si gelarna Peter, bagenda nina man sekalak turang seninata si perbulangenna la Saksi Jahwe, “Terpegegehi kel aku ngidah kena bas perpulungen enda. Kam ras enemna anakndu reh lalap pulung janah sikapken kena ka komentar kena.” Terpegegehi kel turang senina e megi kata-katana e, nina, “Enda me kata-kata si tuhu-tuhu kuperluken.”

14. Uga dahin erberita banci nampati kita?

¹⁴ Ipegegehi arah dahin erberita. Meriah ukurta sanga erberita la soal begiken kalak ntah lang. (Kua. 11:25) Sekalak turang seninata si gelarna Stacy nceritaken uga dahin erberita mpegegehi ia. Sanga sekalak anggota keluargana ipedarat arah runggun, sedih kel ia. Lalap ukurina maka lit min ndai si banci ilakokenna guna nampati anggota keluargana e. Mesera akapna ngadi ngukuri masalahna e. Kai si nampati ia gelah reh ulina carana ngadapi masalahna e? Dahin erberita. Sanga ia erberita, si ukurina eme kalak si lit bas daerahna si perlu isampati. Bagenda nina, “Paksa si e pejumpa Jahwe aku ras kalak si nggit erlajar Pustaka janah mis dalankenna si pelajarina. Terpegegehi kel aku. Dahin erberita tuhu-tuhu nampati aku.”

15. Kai si banci sipelajari arah kata-kata Mary?

¹⁵ Perban situasi, lit si mesera akapna ngelakoken terbuen bas erberita. Adi bage situasindu, ingetlah maka meriah ukur Jahwe adi lakokenndu si mehulina. Cuba ukuri mulihi pengalamen Mary. Sanga pindah ia ku daerah si make bahasa asing, la akapna mbue si banci lakokenna. Bagenda nina, “Bas piga-piga waktu, si banci kulakoken bas erberita eme mere komentar singkat, mbaca ayat Pustaka, ntah pe mereken risalah ngenca.” Sanga bandingkenna ia ras kalak si lancar ngerana bas bahasa e, la kapna mbue  si banci ilakokenna. Emaka mulai ubahna carana rukur. Itehna maka banci nge igunaken Jahwe ia amin pe lenga lancar ngerana bas bahasa e. Nina, “Kai si ajarken Pustaka la mesera ngangkaisa janah e banci ngubah kegeluhen kalak.”

16. Kai si banci nampati kalak si merhat ia erberita tapi la banci ndarat rumah nari?

¹⁶ Iteh Jahwe maka lit piga-piga si merhat erberita tapi la banci ndarat rumah nari. Emaka sampatiNa kita gelah banci erberita man kalak si reh ndahi kita, man dokter, ntah pe perawat. Adi sibandingken kai si banci silakoken gundari ras si mbarenda, banci kitik ukurta. Tapi adi siangkai uga cara Jahwe nampati kita gundari, banci sidat pergegeh si nampati kita gelah setia ras ermeriah ukur amin pe ngadapi masalah.

17. Menurut Pengerana 11:6, engkai maka arus kita terus erberita amin pe la mis siidah hasilna?

¹⁷ Sanga sisuan benih kebenaren la siteh benih si apai si rurat ras turah. (Baca Pengerana 11:6.) Contohna, sekalak turang seninata si gelarna Barbara si umurna enggo 80-en ratur erberita arah telepon ras surat. Bas salah sada suratna tamakenna Menara Pengawal 1 Maret 2014 janah lit i je artikel si erjudul “Apa yang Allah Beri untuk Anda.” La isangkana surat si kirimna e seh ku perbulangen ras ndehara si lanai jadi Saksi Jahwe. Mulih-ulih ibaca kalak e majalah ndai. Igejapken perbulangen e maka tempa-tempa Jahwe si langsung ngerana man bana. Kenca enggo lebih 27 tahun dekahna kalak e la reh ku perpulungen, dungna reh kalak e janah mulihi jadi Saksi Jahwe si aktif. Cuba bayangken uga riahna ukur Barbara! Terpegegehi kel ia ngidah hasil si mehuli arah salah sada surat si tulisna e.

18. Kai si arus silakoken gelah sidat gegeh arah Dibata?

¹⁸ Enggo melala si bereken Jahwe guna mpegegehi kita. IberekenNa toto, Pustaka, turang senina, ras dahin erberita. Adi sigunaken kerina si sikapkenNa e, sibuktiken maka tek kita merhat Jahwe nampati kita janah banci sampatiNa kita. Emaka teruslah kita tek man Bapakta si i surga si meriah ukurNa ‘mereken gegehNa man kalak si nembah Ia alu bulat ukur.’​—2 Kro. 16:9.