1. Uga tanggapen enterem kalak sanga tangtangna turikenndu kai si pelajarindu arah Pustaka?

INGETNDU nge uga perasanndu sanga tangtangna tehndu kebenaren si lit bas Pustaka? Kerina si pelajarindu e menukah kel ngangkaisa, emaka iakapndu kerina kalak pasti meriah ukurna mpelajari si enggo itekindu e. Selain si e, tek kam maka berita si lit bas Pustaka banci erban geluh kalak e reh ulina ras dat kalak e arapen si luar biasa bas wari si pepagi. (Ms. 119:105) Emaka semangat kel kam nuriken kerina si pelajarindu e man teman-temandu ras keluargandu. Tapi kai si terjadi? Sengget kam perban enterem kalak la nggit megiken kam.

2-3. Uga nge tanggapen enterem kalak man Jesus ras berita si ipesehna?

² Labo kita sengget sanga la kalak nggit megiken beritata. Mbarenda pe menam kerina kalak la nggit megiken Jesus amin pe enggo ibanna melala mukjizat si mbuktiken maka ia isampati Dibata. Contohna, sanga Lasarus ipekeke Jesus. Mukjizat e la banci ipersoken kalak si nentang ia. Tapi, peminpin agama Jahudi la tek maka Jesus e Mesias. Ibunuh kalak e atena Jesus ras Lasarus.​—Joh. 11:47, 48, 53; 12:9-11.

³ Iteh Jesus maka teremen kalak la tek maka ia Mesias. (Joh. 5:39-44) Bagenda nina Jesus man piga-piga murid Johanes Peridiken, “Ermeriah ukur kap kalak si tek kel man bangku.” (Mat. 11:2, 3, 6) Engkai maka enterem kalak la nggit megiken Jesus?

4. Kai kari sibahas bas artikel enda?

⁴ Bas artikel enda ras artikel seterusna sibahas kari piga-piga alasen si erban enterem kalak bas abad pertama la erkiniteken man Jesus. Sibahas ka kari engkai maka gundari pe enterem kalak nulak beritata. Tapi si pentingna,  sibahas kari kai si perlu silakoken gelah terus ngikutken Jesus.

5. Banci jadi kai si erbanca maka lit si erpengakap Jesus e labo Mesias si inubuatken?

⁵ Enterem kalak la nggit ngikutken Jesus perban latar belakangna. Memang akui kalak ia guru si luar biasa janah melala mukjizat si ibanna. Tapi menurut kalak e ia sekalak anak tukang kayu si sederhana ngenca. Selain si e, ia rehna arah Nasaret nari, sada kota si la ianggap penting paksa si e. Natanael si dungna jadi murid Jesus pe pernah bagenda nina, “Banci kin si mehuli reh Nasaret nari?” (Joh. 1:46) Banci saja iakap Natanael kota e labo kota si penting. Banci ka ingetna nubuat si lit bas Miha 5:2 si ngataken maka Jesus lahir i Betlehem, labo i Nasaret.

6. Kai nge arusna si lakoken kalak bas jaman Jesus gelah tek ia maka Jesus e Mesias?

⁶ Kai nina Pustaka? Inubuatken Nabi Jesaya maka la pagi perdiateken musuh-musuh Jesus kerna “asal usul [Mesias].” (Jes. 53:8) Situhuna melala nubuat kerna Mesias. Adi nggit kalak e mpelajarisa, iteh kalak e me maka Jesus lahir bas Betlehem janah ia keturunen Raja Daud. (Luk. 2:4-7) Ingan Jesus lahir cocok ras si ikataken bas Miha 5:2. Adi bage, kai nge si jadi masalahna? Metersa iban kalak e kesimpulen. Perban la teh kalak e uga kin situhuna, la kalak e nggit ngikutken Jesus.

7. Engkai maka enterem kalak gundari la nggit megiken Saksi Jahwe?

⁷ Bage ka nge si terjadi gundari? Ue. Menam kerina umat Jahwe sederhana geluhna. Emaka ianggap kalak e “rakyat biasa si la erpendidiken.” (Perb. 4:13) Piga-piga kalak erpengakap maka umat Dibata la banci ngajarken Pustaka perban kalak e labo tamaten arah sekolah teologi. Lit ka si ngataken maka Saksi Jahwe e “agama kalak Amerika.” Padahal situhuna, arah kerina Saksi Jahwe si lit i sebelang doni, kira-kira 14 persen ngenca si tading i Amerika. Lit ka si ngataken Saksi Jahwe la tek man Jesus. Ertahun-tahun dekahna kalak e ikataken “Komunis,” “mata-mata Amerika,” ras “ekstrimis.” Enterem kalak si megi berita-berita si bage la nggit ndarami informasi si benar kerna Saksi Jahwe. E me si erban kalak e la nggit jadi Saksi Jahwe.

8. Menurut Perbahanen Rasul-Rasul 17:11, kai arusna si ilakoken kalak adi merhat ia nandai umat Dibata gundari?

⁸ Kai si banci nampati kalak gelah tehna kebenaren kerna umat Jahwe? Perlu ipereksa kalak e uga kin situhuna. Enda me si ilakoken sekalak penulis Injil si gelarna Lukas. Usahakenna mpelajari “kerina alu megermet tangtangna nari.” Atena gelah kalak si mbaca tulisenna e meteh maka kerina si ibegi kalak e kerna Jesus “tuhu-tuhu benar.” (Luk. 1:1-4) Kalak Jahudi si mbarenda si tading i Berea bali bagi Lukas. Sanga tangtangna begi kalak e berita si meriah kerna Jesus, bandingken kalak e kai si begina ras kai si ikataken bas Kitap-Kitap Heber guna mbuktiken kebenarenna. (Baca Perbahanen Rasul-Rasul 17:11.) Gundari pe perlu ka ibandingken kalak kai si iajarken umat Dibata ras kai si ikataken Pustaka. Perlu ipelajari kalak e kai si ilakoken umat Jahwe gundari. Adi usahakenna ndarami informasi si benar, la ia nukah terpengaruh berita si la tuhu kerna umat Dibata.

9. Kai si terjadi perban Jesus la nggit erban tanda arah surga nari?

⁹ Amin pe pengajaren Jesus luar biasa, lit denga kalak si la puas paksa si e. Emaka ipindo kalak e gelah ibanna “tanda arah surga nari” si mbuktiken maka ia Mesias. (Mat. 16:1) Banci jadi salah pengangkan kalak e kerna nubuat si lit bas Daniel 7:13, 14. Tapi lenga waktuna iakap Jahwe erban nubuat e terjadi. Kai si ajarken Jesus arusna enggo bias guna mbuktiken man kalak e maka ia me Mesias. Tapi perban Jesus la nggit erban tanda si pindo kalak e, la kalak e nggit ngikutken ia.​—Mat. 16:4.

10. Bagi nubuat Jesaya, uga cara Jesus ngelakoken pelayanenna?

¹⁰ Kai nina Pustaka? Bagenda nina Nabi Jesaya kerna Mesias, “Labo ia pagi serko ntah pe ersurak, labo pagi terbegi sorana i pasar.” (Jes. 42:1, 2) Sedekah pelayanenna la pernah usahaken Jesus gelah iperdiateken kalak ia. Labo ibangunna rumah pertoton si galang, labo ipakena baju si khusus janah la ia nggit ilebuh alu gelar-gelar si biasa ipake man peminpin-peminpin agama. Sanga ia iadili, labo ibanna mukjizat gelah jadi ate Raja Herodes ngidah ia, amin pe paksa si e terancam geluhna. (Luk. 23:8-11) Memang lit iban Jesus mukjizat, tapi si pentingna akapna eme mberitaken kerna Kerajan Dibata. Nina Jesus man murid-muridna, “Perban si e me aku reh.”​—Mrk. 1:38.

11. Kai saja nge perukuren si salah si lit bas kalak gundari?

¹¹ Bage ka nge si terjadi gundari? Ue. Enterem kalak gundari luar biasa kapna ngidah gereja-gereja si galang si mewah kel hiasenna. Luar biasa ka kapna penggelaren si penting si ibereken man peminpin-peminpin agama. Selain si e, luar biasa kapna upacara-upacara agama. Enterem kalak lupa maka asal usul ras erti upacara-upacara e la cocok ras ajaren Pustaka. Bas acara-acara si bage la iajarken  kerna Dibata ras peratenNa. Tapi, adi reh kita ku perpulungen Saksi Jahwe banci sipelajari kai si iarapken Jahwe arah kita nari. Bale Kerajanta eme ingan si bersih ras sederhana. La melala hiasen si mewah i je. Kalak si muat pinpinen bas runggun pe la make paken si khusus janah la lit penggelaren si penting man kalak e. Pengajarenta ras kinitekenta tuhu-tuhu erpalasken Pustaka. Amin pe bage, enterem kalak la nggit megiken beritata perban la menarik akap kalak e carata nembah Dibata. Selain si e, pengajarenta la kapna cocok ras sura-surana.

12. Menurut Heber 11:1, 6, kinitekenta arus erpalasken kai?

¹² Kai si banci silakoken gelah tetap kita erkiniteken? Bagenda nina Rasul Paulus man kalak Kristen si tading i Roma, “Kenca megi berita e maka banci kalak erkiniteken, berita e begina sanga lit kalak si mberitakenca kerna Kristus.” (Rom. 10:17) Emaka sipepaguh kinitekenta alu mpelajari Pustaka, labo alu ngikutken acara-acara agama si la sesuai ras Pustaka, la soal uga menarikna acara e. Arus sipepaguh kinitekenta alu pemeteh si tepat, perban “adi la kin erkiniteken, ise pe la banci erban meriah ukur Dibata.” (Baca Heber 11:1, 6.) Selain si e, labo kita perlu tanda arah surga guna mbuktiken maka enggo sidat kebenaren. Adi tutus ateta mpelajari Pustaka, e enggo bias erban kita tek ras lanai ragu.

13. Kai si erban enterem kalak la nggit ngikutken Jesus?

¹³ Bas jaman Jesus, mamang ate murid-murid Johanes Peridiken ngidah murid-murid Jesus perban kalak e la puasa. Ijelasken Jesus man kalak e maka murid-muridna la perlu puasa adi ia nggeluh denga. (Mat. 9:14-17) Amin pe bage, kalak Jahudi ras kalak si deban si nentang Jesus numpahi Jesus perban la ikutkenna kebiasan kalak e. Merawa kel  kalak e sanga ipepalem Jesus kalak sakit bas wari Sabat. (Mrk. 3:1-6; Joh. 9:16) Sombong kalak e janah katakenna maka ikutkenna undang-undang kerna Sabat. Tapi la akap kalak e salah erbinaga bas rumah pertoton. Sanga sumpahi Jesus kalak e perban si e, merawa kel kalak e man Jesus. (Mat. 21:12, 13, 15) Sanga erberita Jesus bas ingan pulung kalak Jahudi i Nasaret, merawa kel kalak si megi-megi man Jesus perban ipakena contoh bas jaman si nai guna mbuktiken maka kalak e mentingken bana ras la erkiniteken. (Luk. 4:16, 25-30) Enterem kalak la nggit ngikutken Jesus perban la lakokenna kai si iarapken kalak e.​—Mat. 11:16-19.

14. Engkai maka isumpahi Jesus kebiasan manusia si la cocok menurut Pustaka?

¹⁴ Kai nina Pustaka? Bagenda nina Jahwe arah Nabi Jesaya, “Kataken kalak e maka deherina pagi Aku, janah kataken kalak e maka hamatina Aku, tapi pusuhna ndauh arah Aku nari, mbiar kalak e man bangKu perban ngikutken perentah manusia ngenca.” (Jes. 29:13) Bas jaman Jesus, kalak si pentingen akapna peraturen ras kebiasan manusia asangken si ikataken Pustaka situhuna enggo nulak Jahwe ras Mesias si iutusNa. E me sebapna maka isumpahi Jesus kebiasan manusia si la cocok menurut Pustaka.

15. Engkai maka enterem kalak la senang ngidah Saksi Jahwe?

¹⁵ Bage ka nge si terjadi gundari? Ue. Enterem kalak si la senang ngidah Saksi Jahwe perban la kalak e nggit ngikutken kebiasan si la cocok menurut Pustaka. Misalna, acara ulang tahun ras Natal. Lit ka si merawa perban Saksi Jahwe la nggit ikut bas upacara nasional ntah pe upacara penguburen si la cocok menurut Pustaka. Kalak si la senang ngidah Saksi Jahwe perban alasen si e ndai kerina banci jadi erpengakap maka ibadahna enggo ialoken Dibata. Tapi situhuna la banci iban kalak e meriah ukur Dibata adi pentingen akapna kebiasan doni enda asangken pengajaren si jelas bas Pustaka.​—Mrk. 7:7-9.

16. Menurut Masmur 119:97, 113, 163-165, kai si arus silakoken ras si la banci silakoken?

¹⁶ Kai si banci silakoken gelah tetap kita erkiniteken? Arus sipebelin kekelengenta man undang-undang Jahwe ras prinsip-prinsipNa. (Baca Masmur 119:97, 113, 163-165.) Adi keleng ateta Jahwe, la silakoken kerina kebiasan si segat ateNa. Kekelengenta man Jahwe me si pentingna siakap asangken kai pe.

17. Kai nge si erban enterem kalak la nggit ngikutken Jesus?

¹⁷ Bas jaman Jesus, iarapken piga-piga kalak gelah lit min perubahen politik. Ngarap kalak e gelah bebasken Mesias ia arah pemerentahen Roma. Tapi sanga usahaken kalak e erban Jesus jadi rajana, la nggit Jesus. (Joh. 6:14, 15) Selain si e, imam-imam ras kalak si deban mbiar adi iban Jesus kari perubahen politik paksa si e. Perban adi bage si terjadi, pasti merawa kalak Roma janah buatna wewenang si enggo berena man imam-imam. Kebiaren si bage me si erban enterem kalak Jahudi la nggit ngikutken Jesus.

18. Nubuat-nubuat kai bas Pustaka si la iperdiateken enterem kalak Jahudi?

¹⁸ Kai nina Pustaka? Memang melala nubuat si ngataken maka Mesias dungna menang selaku pejuang. Tapi, nubuat si  deban ngataken maka arus lebe ia mate guna dosa-dosata. (Jes. 53:9, 12) Adi bage, engkai maka enterem kalak Jahudi salah carana rukur kerna Mesias? Perban enterem kalak bas jaman Jesus la perdiatekenna nubuat-nubuat si ngataken maka labo kari lit jalan keluar si meter man masalah kalak e.​—Joh. 6:26, 27.

19. Cara rukur si uga nge si erban enterem kalak la nggit megiken beritata?

¹⁹ Bage ka nge si terjadi gundari? Ue. Enterem kalak gundari la nggit megiken beritata perban kita netral secara politik. Arapken kalak e kita ikut bas pemilu. Tapi, siteh maka adi sipilih manusia jadi penguasata, e tandana enggo situlak Jahwe. (1 Sam. 8:4-7) Banci jadi arapken kalak ka gelah sibangun gedung-gedung sekolah, rumah sakit, janah ikut kita bas kegiaten sosial si debanna. Itulak kalak e beritata perban siusahaken asa ngasupta erberita, labo guna ndungi masalah si lit bas doni enda.

20. Menurut kata-kata Jesus bas Matius 7:21-23, kai pendahin si pentingna si arus silakoken?

²⁰ Kai si banci silakoken gelah tetap kita erkiniteken? (Baca Matius 7:21-23.) Pendahin si pentingna siakap eme ngelakoken perentah Jesus. (Mat. 28:19, 20) Emaka ula pernah kita sibuk guna ndungi masalah si lit bas doni enda. Memang keleng ateta kalak si deban janah ermediate kita man masalah si adapina. Tapi siteh maka cara si mehulina nampati kalak e eme alu ngajari kalak e kerna Kerajan Dibata ras nampati kalak e gelah rembak ras Jahwe.

21. Kai si arus siusahaken?

²¹ Bas artikel enda enggo sibahas empat alasen si erban enterem kalak bas abad pertama ras kalak si gundari la nggit ngikutken Jesus. Tapi si empat enda nge ngenca si erban kalak la nggit ngikutken Jesus? Lang. Bas artikel seterusna sibahas kari empat alasen si deban. Mbera siusahaken asa ngasupta gelah tetap kita tek man Jesus ras sijaga kinitekenta tetap paguh!