1. Kai sura-suranta nandangi keluarganta?

NINA sekalak turang seninanta si gelarna Pauline, * “Mulai kenca aku erlajar Pustaka, ateku min radu aku ras keluargaku masuk Pardis. Khususna radu min ateku ngelayani Jahwe ras perbulangenku, Wayne, bage pe anak kami si kitik denga.” Lit nge keluargandu si lenga itandaina Jahwe janah lenga keleng atena Ia? Banci saja seri perasanndu ras Pauline.

2. Penungkunen kai si man bahasenta bas artikel enda?

² La banci sipaksa keluarganta gelah nggit ia erlajar Pustaka. Tapi banci sisampati ia gelah turah ukurna megiken berita si meriah arah Pustaka. (2 Tim. 3:14, 15) Engkai maka perlu kita erberita man keluarganta? Engkai maka perlu siangkai perasan kalak e? Kai si banci silakoken gelah keleng dungna atena Jahwe? Janah uga turang senina bas runggun banci nampatisa?

3. Menurut 2 Petrus 3:9, ngkai maka perlu kita erberita man keluarganta?

³ Ikernepken Jahwe me doni enda kentisik nari. Si banci selamat eme kalak si “pusuh ras perbahanenna ngaloken kebenaren guna kegeluhen si rasa lalap.” (Perb. 13:48) Enggo melala keri waktu ras gegehta guna erberita man kalak si la sitandai. Emaka, erberita ka ateta man keluarganta gelah banci radu ras kita ngelayani Jahwe. ‘Labo ate Jahwe sekalak pe ikernepken tapi gelah kerina min ertobat,’ enda me buktina Ia Bapakta si perkeleng.​—Baca 2 Petrus 3:9.

4. Kai si ula min silakoken sanga erberita man keluarganta?

 ⁴ Arus siteh maka lit cara si benar bage pe cara si salah i bas mberitaken berita si meriah. Banci saja man kalak si la sitandai mehuli kita ngerana tapi man keluarganta meser kita ngerana.

5. Kai si perlu siinget sope erberita man keluarganta?

⁵ Adi siukuri sanga tangtangna kita erberita man keluarganta, banci saja erkadiola kita perban kurang cocok siakap carana. Ikataken Rasul Paulus man kalak Kristen, ‘Teruslah mehuli janah ngena min ate kalak ranan kena bali bagi itama sira, gelah iteh kena carana mere jawapen man tiap kalak.’ (Kol. 4:5, 6) Perlu siinget pedah e sanga erberita man keluarganta. Adi la bage, banci saja kitik kari ukur kalak e janah la ia nggit megiken kita.

6-7. Ceritaken sada contoh si mbuktiken maka penting kel ngangkai perasan teman geluh si la Saksi.

⁶ Angkailah perasanna. Nina Pauline, si nggo ituriken ndai, “Tangtangna mbarenda, si rusur kucakapken ras perbulangenku kerna Dibata ras Pustaka. La lit si deban selain si e.” Tapi perbulangen Pauline eme Wayne, la mbue itehna kerna Pustaka, emaka la kapna masuk akal kai si ikataken Pauline. Menurut Wayne, si iukuri Pauline agamana saja lalap. Mbiar ia Pauline nggo itipu janah masuk ku sada sekte si bahaya.

⁷ Iakui Pauline maka mbarenda, nggo melala kel keri waktuna khususna bas ben wari bage pe sanga akhir pekan, perban bergaul ia ras turang senina bas perpulungen, erberita, bage pe ikut pulung-pulung. Nina Pauline, “Mon-mon sanga  mulih Wayne, la ise pe idapetina i rumah, emaka melungen iakapna.” Wajar adi ate Wayne i rumah min ndehara ras anakna. La iteh Wayne ise saja teman ndehara bage pe teman anakna. Menurut Wayne nggo pentingen iakap ndeharana teman-temanna si mbaru asangken ia. Emaka iancamna Pauline gelah cerai. Menurutndu, kai nge si banci ilakoken Pauline si mbuktiken maka iangkaina perasan perbulangenna?

8. Menurut 1 Petrus 3:1, 2, kai si lebih iperdiateken keluarganta?

⁸ Mehulilah perbahanenndu. Biasana, si lebih iperdiateken keluarganta eme perbahanenta labo rananta. (Baca 1 Petrus 3:1, 2.) Dungna isadari Pauline kerna si e. Nina, “Situhuna keleng nge ate Wayne kami janah labo atena cerai. Sanga iancamna aku gelah cerai, kuteh maka arus ertutusna ateku ndalanken pedah Jahwe kerna perjabun. Emaka, asangken lalap kuturiken kerna Pustaka man bana, padin mehuli kuban perbahanenku.” Lanai ipaksa Pauline perbulangenna mbahas Pustaka, emaka mulai icakapkenna si deban. Iidah Wayne maka nggo reh ulina ndeharana e janah anakna pe reh patuhna. (Kua. 31:18, 27, 28) Idah Wayne ka maka reh sikapna keluargana perban ndalanken pedah Pustaka, emaka dungna turah ukurna megiken berita si meriah.​—1 Kor. 7:12-14, 16.

9. Engkai maka arus terus sisampati keluarganta?

⁹ Teruslah sampati keluargandu. Jahwe jadi usihen man banta. “Tetap” iberekenNa kesempaten man kalak guna megiken berita si meriah gelah banci nggeluh si  rasa lalap. (Jer. 44:4) Selain si e, ikataken Rasul Paulus man Timotius gelah terus isampatina kalak si deban. Engkai? Perban adi ilakoken Timotius e, iselamatkenna dirina bage pe kalak si megiken ia. (1 Tim. 4:16) Keleng ateta keluarganta, emaka iteh kalak e ateta kebenaren i bas Kata Dibata. Perban mehuli ranan ras perbahanen Pauline, mejile dungna hasilna. Gundari perbulangenna nggo ngelayani Jahwe, janah merintis ia duana. Perbulangenna pe nggo jadi sekalak pertua.

10. Engkai maka perlu kita sabar?

¹⁰ Sabarlah. Sanga siban keputusen guna ngelayani Dibata, nggo siban perubahen bas kegeluhenta bage pe kinitekenta. Banci saja mamang ate keluarganta ngidah kita. Biasana, si mis kel iperdiateken kalak e eme lanai kita ikut ras ia bas perayan agama bage pe bas politik. Tangtangna banci saja merawa keluarganta man banta. (Mat. 10:35, 36) Tapi ula mis kita nyerah. Adi lanai sisampati kalak e guna ngangkai kinitekenta, tempa-tempa nggo sihakimi kalak e janah sianggap la ia cocok nggeluh si rasa lalap. Labo tugasta nghakimi kalak, sebap tugas e nggo ibereken Jahwe man Jesus. (Joh. 5:22) Adi sabar kita, banci saja dungna nggit keluarganta megiken kita.​—Nen kotak “Gunaken Situs jw.org i bas Ngajar.”

11-13. Kai si banci sipelajari arah perbahanen Alice man orang tuana?

¹¹ Mehulilah, tapi tetap dalanken keputusenndu. (Kua. 15:2) Perdiateken pengalamen Alice. Orang tuana aktif bas politik janah kalak e la tek man Dibata. Alice erlajar kerna Jahwe sanga ndauh ia tading arah orang tuana. Isadarina maka arus mis ikatakenna man orang tuana kerna kai si nggo ipelajarina. Nina, “Adi tertaren-taren kita lalap ngataken man keluarganta kerna kinitekenta si mbaru, dungna reh serana kari akap kalak e ngangkai kita.” Idarami Alice topik si banci saja meriah iakap orang tuana, misalna kerna kekelengen. Itulisna surat man orang tuana janah ijelaskenna uga nina Pustaka kerna topik e, kenca e isungkunna ka pendapat kalak e. (1 Kor. 13:1-13) Ngata bujur Alice man orang tuana perban nggo ipebelin kalak e ia janah ikirimken Alice ka hadiah man kalak e. Sanga reh ia ku rumah orang tuana, iusahakenna kel nampati mamakna. Tangtangna, la senang orang tua Alice sanga iceritakenna kerna kinitekenna si mbaru.

¹² Sanga i rumah orang tuana Alice, tetap ibacana Pustaka tiap wari. Nina, “Dungna banci iangkai Mamak maka penting kel Pustaka man bangku.” Bapak Alice pe itehna atena kerna Pustaka gelah banci iangkaina ngkai maka nggo berubah anakna, janah idaramina ka atena kesalahen bas Pustaka. Nina Alice, “Kubereken Pustaka man Bapak janah kuban cataten man bana i je.” Kai hasilna? La lit idat bapak Alice kesalahen kai pe, malahen kena kel ku pusuhna kai si ibacana.

¹³ Sanga itentang kita, arus kita tetap mehuli tapi perlu ka tetap sidalanken keputusenta. (1 Kor. 4:12b) Alice itentang mamakna. Nina, “Sanga iperidiken aku, ikataken Mamak aku ‘anak durhaka.’” Kai si ilakoken Alice? “Tetap kuceritaken man Mamak kerna kinitekenku si mbaru. Manjar-anjar kujelasken man bana maka nggo kuban keputusen jadi Saksi Jahwe janah keputusenku e la banci iubah. Kuusahaken gelah tek Mamak keleng kel ateku ia. Ngandung kami duana. Kenca e kuban pangan si sedapna kel  iakap Mamak. Dungna, ikataken Mamak maka nggo reh ulina aku perban erlajar Pustaka.”

14. Engkai maka ula sipediat iubah keluarganta keputusenta guna ngelayani Jahwe?

¹⁴ Banci saja la mis iangkai keluarganta ngkai maka penting kel siakap ngelayani Jahwe. Misalna, sanga iputusken Alice merintis janah la ngayaki pendahin si nggo ipilih orang tuana, ngandung ka mulihi mamakna. Tapi keputusen Alice la berubah. Nina, “Adi nyerah kita sekali, pasti iusahaken keluarganta ngubah keputusenta si debanna. Emaka arus tetap sidalanken keputusenta, tapi tetap ka kita mehuli man keluarganta. Adi silakoken e, banci saja lit piga-piga keluarganta si nggit dungna megiken kita.” E me si terjadi man Alice. Gundari nggo jadi perintis duana orang tuana, janah bapakna pe nggo jadi pertua.

15. Menurut Matius 5:14-16 ras 1 Petrus 2:12, uga perbahanen si mehuli arah turang seninanta banci nampati keluarganta?

¹⁵ ‘Perbahanenta si mehuli’ banci igunaken Jahwe narik kalak ku Ia. (Baca Matius 5:14-16; 1 Petrus 2:12.) Adi teman geluhndu la Saksi Jahwe, nggo pernah nge ia jumpa ras turang senina bas runggunndu? Pauline, si nggo ituriken ndai, rusur iundangna turang senina ku rumahna gelah perbulangenna, Wayne, banci lebih itandaina kalak e. Iceritaken Wayne kai si ilakoken sekalak turang senina si erbanca banci dungna iangkaina uga kin situhuna Saksi Jahwe e. Nina, “Ibuatna  cuti sada wari gelah banci itemanina aku nonton pertandingen olahraga. Ningku bas ukurku, ‘Normal kepeken geluh kalak e!’”

16. Engkai maka perlu siundang keluarganta ku perpulungen?

¹⁶ Salah sada cara si mehulina bas nampati keluarganta eme siundang ia gelah reh ku perpulungenta. (1 Kor. 14:24, 25) Perpulungen si tangtangna kel idahi Wayne eme acara Peringet-ingeten. Nggit ia reh perban acara e ibenaken kenca mulih ia erdahin janah acara e labo ndekah. Nina, “Situhuna labo kuinget isi khotbahna, tapi si kuinget kalak si reh ku je. Ialo-alo kalak e aku janah isalamina. Banci kugejapken maka kalak e kerina kalak bujur.” Lit sekalak perbulangen ras ndeharana si mehuli kel man Pauline. Rusur isampatina Pauline ras anakna bas perpulungen bage pe sanga erberita. Emaka, sanga nggit Wayne dungna erlajar Pustaka, ipindona man perbulangen ndai gelah isampatina ia erlajar Pustaka.

17. Engkai maka mon-mon sisalahken banta? Tapi ngkai maka arus terus siusahaken nampati keluarganta?

¹⁷ Ateta min gelah kerina keluarganta ngelayani Jahwe radu ras kita. Tapi, aminna pe nggo siusahaken kel nampati keluarganta gelah jadi umat Dibata, banci saja tetap lit piga-piga keluarganta si la nggit ngelayani Jahwe. Adi bage si iadapindu, ula salahkenndu bandu perban e keputusen kalak e. Selain si e, la banci sipaksa ise pe gelah seri kinitekenna ras kita. Tapi ingetlah, mbelin kel pengaruhna man keluargandu adi idahna meriah kel iakapndu ngelayani Jahwe. Totokenlah kalak e janah mehulilah kam ngerana. Teruslah sampati kalak e! (Perb. 20:20) Teklah kam maka pasti ipasu-pasu Jahwe usahandu. Janah adi nggit dungna keluargandu megiken kam, selamat me pagi kalak e!