1. Kai si arus ilakoken kalak Kristen gelah banci terus kiam seh ku kedungenna?

KERINA kalak Kristen ikut bas perlumban guna kegeluhen. La soal kita mbaru denga ikut bas perlumban e ntah pe nggo ndekah, arus kita tetap kiam seh ku kedungenna. Surat si itulis Rasul Paulus man kalak Kristen i Pilipi banci ngiahken kita gelah la nyerah bas perlumban e. Sanga ikirim Paulus surat e, piga-piga kalak Kristen i Pilipi nggom ndekah ngelayani Jahwe. Amin pe setia kalak e ngelayani Jahwe, ipersingeti Paulus denga kalak e gelah terus megenggeng. Ate Paulus gelah iusih kalak e ia bas ‘ngayaki tujun guna ndatken hadiah.’​—Pil. 3:14.

2. Engkai maka cocok kel nasehat Paulus man kalak Kristen i Pilipi?

² Cocok kel nasehat Paulus man kalak Kristen i Pilipi. Mulai kenca runggun e lit, turang senina si i je nggo ngadapi tentangen. Isuruh Dibata me Paulus ras Silas ku Makedoni. Kenca si e lawes kalak e ku Pilipi guna erberita kira-kira tahun 50 M. (Perb. 16:9) I je jumpa kalak e ras Lidia, janah “ibuka Jahwe ukurna, e maka tutus kel atena megiken” berita si meriah. (Perb. 16:14) Dungna iperidiken ia bage pe keluargana. Tapi mis iban Iblis tentangen man Paulus ras Silas. Isaren kalak e ku lebe-lebe penguasa kota perban ituduh erban masalah bas kota e. Jenari, ipekpeki me Paulus ras Silas, ipenjaraken, janah ipaksa nadingken kota e. (Perb. 16:16-40) Tapi la kalak e nyerah! Kai pengaruhna man turang senina i bas runggun si mbaru e? Kalak e pe megenggeng, patut kel siusih! Terpegegehi kel kalak e ngidah Paulus ras Silas si la nyerah.

3. Kai si isedari Paulus? Penungkunen kai saja si man bahasenta?

³ Ertekad Paulus gelah la nyerah. (2 Kor. 4:16) Itehna maka gelah banci terus setia ngelayani Jahwe, arus tetap  iingetna upahna. Kai si banci sipelajari arah Paulus? Kai ka si banci sipelajari arah umat Jahwe si setia bas jamanta gundari? Janah ngkai maka arapen banci erban kita la nyerah?

4. Kai si ilakoken Paulus gelah banci ia erberita la soal uga pe keadanna?

⁴ Cuba ukuri keadan Paulus sanga itulisna surat man kalak Kristen i Pilipi. Ipenjaraken ia bas sada rumah i Roma. Lanai ia banci lawes erberita. Tapi, tetap ia erberita man kalak si reh ndahi ia janah itulisna ka surat man runggun-runggun si ndauh. Gundari pe, nterem Saksi Jahwe si lanai banci lawes erberita perban sakit ntah pe nggo metua. Tapi iusahaken kalak e erberita man kalak si reh ku rumahna. Itulis kalak e ka surat man kalak si la banci ijumpai sanga erberita.

5. Menurut Pilipi 3:12-14, kai si arus ilakoken Paulus gelah banci idatna upahna?

⁵ La ipediat Paulus kesuksesen ntah pe kesalahenna erbanca lanai tutus atena ngelayani Jahwe. Ikataken Paulus maka arus ‘ilupakenna kai si arah pudina’ gelah banci iusahakenna “ngayaki kai si arah lebe” ntah pe setia seh ku kedungenna. (Baca Pilipi 3:12-14.) Kai si ilakoken Paulus gelah la ia lupa nandangi tujunna? Si pertama, aminna pe Paulus kalak Jahudi si seh kel suksesna sope jadi kalak Kristen, tapi “sampah” nge ianggapna kerina e. (Pil. 3:3-8) Si peduaken, aminna pe salah kel akapna bana perban nggo isiksana kalak Kristen, tapi labo perban si e lanai ia ngelayani Jahwe. Si peteluken, labo iakapna bias kai si nggo ilakokenna man Jahwe. Tetap ia semangat erberita amin pe melala tentangen si iadapina, misalna ipenjaraken, ipekpeki, ibenteri alu batu, karam kapal, la lit si man pangan bage pe si man pakenna. (2 Kor. 11:23-27) La soal uga suksesna pe Paulus janah uga buena tentangen si iadapina, itehna maka arus terus ilayanina Jahwe. Kita pe arus bage.

6. Kai saja maksudna ‘si arah pudi’ si perlu silupaken?

⁶ Kai si banci silakoken guna ngusih Paulus i bas ‘ngelupaken kai si arah pudi’? Mungkin piga-piga kita, salah lalap siakap banta perban dosa-dosanta mbarenda. Adi bage perasanndu, pelajarilah kerna korban tebusen Kristus bas pelajaren pribadindu. Adi sipelajari e, siukuri, janah sitotoken, banci kita terpegegehi. Dungna, lanai sisalahken banta perban situhuna dosa-dosanta e nggo iampuni Jahwe. Kai ka si banci sipelajari arah Paulus? Lit piga-piga kalak itadingkenna pendahinna si galang kel gajina gelah banci reh buena waktuna ngelayani Jahwe. Adi bage, lupakenlah kai si arah pudi si nggo sitadingken janah ulanai simorahi. (Bil. 11:4-6; Peng. 7:10) ‘Si arah pudi’ banci ka maksudna kai si nggo silakoken bas pelayanenta man Jahwe ntah pe tentangen si pernah siadapi. Memang adi siukuri pasu-pasu bage pe penampat Jahwe man banta, erdeherna kita ras Ia. Tapi, ula min nggo bias siakap kai si nggo silakoken man Jahwe.​—1 Kor. 15:58.

7. Menurut 1 Korinti 9:24-27, kai si arus ilakoken kalak Kristen gelah menang bas perlumban guna kegeluhen? Ban contohna.

⁷ Iangkai Paulus kel kata-kata Jesus, “Usahakenlah asa ngasupndu.” (Luk. 13: 23, 24) Iteh Paulus maka arus ia erjuang asa ngasupna bali bagi Kristus. Ikataken Paulus maka kalak Kristen bali bagi kalak si ikut lomba lari. (Baca 1 Korinti 9:24-27.) Kalak si ikut lomba lari, arus tutus atena kiam janah ula banna dahinna si deban. Contohna, lit perlumban si iban bas sada kota. Segedang dalan melala kel toko i je. Banci nge kapndu menang kalak si ikut bas perlumban e adi ngadi ia ngenen-ngenen kai si lit bas toko e? Pasti la banci! Bas perlumban guna kegeluhen pe, arus tutus ateta. Bali bagi Paulus, adi terus siinget tujunta janah semangat kita ngelayani Jahwe, pasti sidat upahta!

8. Telu tantangen kai si man bahasenta?

⁸ Mari sibahas telu tantangen si banci erban kurang semangatta. Si pertama, kai si iarapken kita lenga terjadi. Si peduaken, reh kurangna gegehta perban nggo metua. Si peteluken, la erngadi-ngadi masalahta. Adi erlajar kita arah umat Dibata si pernah ngadapi masalah si bage, banci kita reh semangatna.​—Pil. 3:17.

9. Uga perasanta adi lenga terjadi kai si iarapken kita?

⁹ Si iarapken kita lenga terjadi. Siarapken kel gelah janji-janji Jahwe meter terjadi. Habakuk pe meter atena imasapken Jahwe kejahaten si lit i Juda. Tapi isuruh Jahwe ia ‘nimai.’ (Haba. 2:3) Sanga ndekahsa siakap terjadi kai si iarapken kita, banci dungna kurang semangatta janah kitik ukurta. (Kua. 13:12) Enda me si iadapi turang seninanta sekitar tahun 1914. Enterem turang seninanta si ipilih ku surga iarapkenna ia lawes ku surga bas tahun e. Tapi sanga la terjadi arapenna e, kai si ilakokenna?

10. Kai si ilakoken turang seninanta Royal Spatz ras ndeharana sanga lenga terjadi kai si iarapkenna?

¹⁰ Perdiatekenlah pengalamen dua turang seninanta enda. Turang Senina  Royal Spatz iperidiken bas tahun 1908 sanga umurna 20 tahun. Tek ia maka lanai ndekah lawes me ia ku surga. Emaka bas tahun 1911, sanga erjabu atena ras Pearl, ikatakenna, “Tik nari tahun 1914. Me nggo siteh kai kari si terjadi? Adi erjabu kin ateta, gundari sajalah.” Kepeken bas tahun 1914 lenga bo kalak e ku surga. Nyerah nge kalak e bas perlumban guna kegeluhen? Lang, sebap si pentingna iakap kalak e labo upahna tapi tetap setia ngelayani Jahwe. Iusahaken kalak e gelah tetap megenggeng bas perlumban e. Janah puluhen tahun kenca si e pe, tetap kalak e semangat ngelayani Jahwe ngasa idungina kegeluhenna i doni. Gundari sitimai kel paksana ibersihken Jahwe gelarNa, ibuktikenNa maka cara Ia merentah me si mehulina, janah sitimai ka janji-janji Jahwe terjadi. Teklah kita maka kerina e pasti terjadi bas waktu si nggo itetapken Jahwe. Emaka, ula sempat kurang semangatta perban arapenta lenga terjadi. Janahta nimai teruslah kita ergiah-giah ngelayani Dibata!

11-12. Engkai maka banci tetap kita ngelayani Jahwe amin gia lanai bagi si mbarenda gegehta? Ban contohna.

¹¹ Reh kurangna gegehta perban nggo metua. Kalak si ikut bas lomba lari arus megegeh. Tapi, bas perlumban guna kegeluhen, labo arus megegeh dagingta. Enterem turang seninanta si lanai megegeh tetap denga atena mereken si mehulina man Jahwe. (2 Kor. 4:16) Contohna, sanga umur turang seninanta Arthur Secord 88 tahun, nggo 55 tahun ia ngelayani i Betel. Gundari nggo lemah kel ia janah rusur sakit. Bas sada wari, reh sekalak turang seninanta si diberu guna ngurus ia. Itatapna turang seninanta Secord si lit bas ingan medemna janah ipujina ia, nina, “Pasti nggo mbue kel si ilakokenndu man Jahwe me, Brur.” Janahna cirem ikataken turang seninanta Secord man turang seninanta ndai, “Payo, tapi labo e kuakap si pentingna. Si pentingna tetap kita setia.”

¹² Banci saja nggo ndekah kel kam ngelayani Jahwe. Tapi gundari lanai bagi si mbarenda kam sehatna, emaka lanai melala si banci ilakokenndu. Adi bage keadanndu, ula kitik ukurndu. Teklah kam maka pasti iinget Jahwe kerina si ilakokenndu bas ngelayani Ia janah pasti iergaiNa. (Heb. 6:10) Kekelengenta man Jahwe labo inen arah uga buena si banci sibereken man baNa. Tapi, banci teridah adi tetap kita ermeriah ukur janah terus siinget arapenta. Selain si e, arus bulat  ukurta ngelayani Jahwe. (Kol. 3:23) Iteh Jahwe uga kengasupenta janah la iarapkenNa kai si la kita ngasup.​—Mrk. 12:43, 44.

13. Kai saja masalah Anatoly ras Lidiya? Janah kai si banci sipelajari arah kalak e sanga la erngadi-ngadi masalahta?

¹³ Masalah si la erngadi-ngadi. Lit piga-piga umat Jahwe si nggo ndekah ngadapi masalah bage pe penganiayan. Contohna, sanga umur turang seninanta Anatoly Melnik * 12 tahun, itangkap me bapakna, ipenjaraken, janah iasingken ku Siberia, si dauhna lebih 7.000 km arah rumah kalak e i Moldova. Setahun kenca si e, iasingken ka Anatoly, mamakna, bage pe nini ras bulangna ku Siberia. Dungna banci ka kalak e reh ku perpulungen bas kuta si deban, tapi arus kalak e erdalan 30 km dauhna ngelewati salju si seh kel bergehna. Selain si e, turang seninanta Melnik pe ipenjaraken telu tahun janah arus itadingkenna ndeharana eme Lidiya bage pe anakna si umurna sada tahun denga. Amin gia la erngadi-ngadi masalah Anatoly ras keluargana, tapi tetap kalak e setia ngelayani Jahwe. Gundari umur Anatoly 82 tahun janah ia ngelayani selaku anggota Panitia Cabang bas sada negeri i Asia Tengah. Siusihlah Anatoly ras Lidiya, silayanilah Jahwe asa ngasupta janah teruslah kita megenggeng, bagi si nggo silakoken gundari.​—Gal. 6:9.

14. Menurut Paulus, kai si arus ilakokenna gelah banci datna upahna?

¹⁴ Tek Paulus maka banci ia menang bas perlumban guna kegeluhen janah idatna upahna. Itimaina “hadiah i bas Dibata nari, eme idilo guna nggeluh i surga.” Tapi itehna maka gelah banci datna upahna e, arus terus ‘iayakina.’ (Pil. 3:14) Ituriken Paulus anding-andingen guna nampati kalak Kristen i Pilipi gelah tutus ate kalak e ngayaki upahna.

15. Anding-andingen kai si ituriken Paulus guna ngiahken kalak Kristen i Pilipi gelah terus ‘ngayaki’ upahna?

¹⁵ Isingetken Paulus man kalak Kristen i Pilipi maka kalak e nggeluh pagi i surga. (Pil. 3:20) Engkai maka arus iinget kalak e arapenna e? Paksa si e, nterem kel kalak merhat jadi warga negara Roma  perban mbue kel untungna. * Tapi, kalak Kristen si ipilih ku surga jadi warga negara bas pemerentahen si seh kel ulina, emaka reh buena ka untung si idat kalak e. Labo lit kai pe ertina jadi warga negara Roma adi ibandingken jadi warga negara surga! E me sebapna iiahken Paulus kalak Kristen i Pilipi gelah ‘perbahanen kalak e sue ras berita si meriah kerna Kristus.’ Kata “perbahanen” bas ayat e maksudna “jadi warga negara.” (Pil. 1:27) Gundari kalak Kristen si ipilih ku surga jadi usihen bas ngayaki upahna guna nggeluh rasa lalap i surga.

16. Menurut Pilipi 4:6, 7, kai si arus terus silakoken la soal arapenta nggeluh i surga ntah pe i doni?

¹⁶ La soal arapenta nggeluh rasa lalap i surga ntah pe bas pardis i doni, teruslah siayaki upahta e. La soal uga pe keadanta, ula sinen ku pudi janah ula sipediat kai pe erban kita ngadi ngelayani Jahwe. (Pil. 3:16) Banci saja nggo ndekah kel sitimai janji-janji Jahwe, ntah pe nggo kita metua janah lanai megegeh. Banci saja arus ka siadapi tantangen ras penganiayan ertahun-tahun dekahna. Uga pe keadanndu, ‘ula kam kuatir kerna kai pe.’ Turikenlah kerina man Dibata janah pasti iberekenNa kedamen man bandu. Tuhu-tuhu luar biasa kel kedamen si banci igejapkenndu!​—Baca Pilipi 4:6, 7.

17. Kai si man bahasenta bas artikel seterusna?

¹⁷ Kalak si ikut lomba lari, pasti iempetkenna kel kiam sanga nandangi seh ku garis finis. Kita pe arus tutus kel ateta kiam janah terus siinget janji Dibata kerna wari si pepagi sebap nggo nandangi seh kita ku je. Emaka, teruslah kita kiam asa ngasupta. Uga carana gelah banci kita tetap megenggeng? Bas artikel seterusna sibahas kari kai si arus siutamaken bas geluhta bage pe uga carana gelah banci ‘sipastiken kai si lebih penting.’​—Pil. 1:9, 10.